Read KapsikiDC 1 Ka Korɛnte 13 Bible Online

1 Ka Korɛnte 13 - KapsikiDC bible

1 Ka Korɛnte 13

¹Ya 'ya nza kageze ghena ta mbeli ba'a ŋa ka ghwene ta Shala, keɗema ɗe va 'ya ne, gəmə ghena ta ɗa kala dimə nya kegaka, kala ciŋəci nya kekwaɗe.

²Ya kwela nza berete va 'ya kageze ghena kelɛŋəa Shala, ya kwela kemave berete 'ya kaɗepe wəshi nyi tewəfərə ba'a kemave yayata ɗepe wəsə 'ya, ya kwela kemave yɛ nya wəba 'ya kezha kelemte yɛ ghweme te ŋkwa nci, keɗema ɗe va 'ya ne, gəmə 'ya tsagha.

³Ya 'ya nehemte nda pɛtɛa wəshia ɗa ke ka titikwəa kɛfi ba'a ndeke nda geva ta ɗa ke tse ta ghwə, keɗema ɗe va 'ya ne, wəsə shɛ kaketekɛ ɗa ŋkɛ we.

⁴Kasəwə ghena ɗe, kakemane ŋkwa ɗe, kazlɛ ŋkɛ we, kamene fege ŋkɛ we, kakele ghə ŋkɛ we.

⁵Kamene wəsə hawe ɗe we, kazele wəsə ŋkɛ kezha ghəa ŋkɛ we, kahwepe wənə ŋkɛ kahe kahe we, kave ghena ŋkɛ te wənə we.

⁶Kazlama ŋkɛ yitea wəsə kwa ndiremi we, ama kaganda yazlama ŋkɛ te.

⁷Kasəwə yayata ghena ŋkɛ, kayɛ yayata wəsə ŋkɛ, kave ghə ŋkɛ te yayata wəsə, kazereghe yayata wəsə ŋkɛ.

⁸Kakiɗi ɗe tɛape we. Katekiɗi yɛ ghena kelɛŋə, berete kegeze kweci ghena ba'a ɗepe wəsə.

⁹Kwa nza ŋkɛ ne, dewə ɗepe wəshi gheɓəmə, kagezete ghena kelɛŋəa Shala gheɓəmə tserame we.

¹⁰Ama vəa ŋkwa nya tese wəsə nya ɗema ghala kwa ne, bətə tenza wəsə nya nza ghala kwa.

¹¹Ma kwa nza 'ya kawəzege, kala wəzege mene 'ya, geze ghena, zəzə ghena. Ama tsetsenya, kaza 'ya ne, nahe 'ya kesərəakɛ mene wəsə kala wəzege.

¹²Ma tsetsenya ne, ngərə ngərə newe wəshi gheɓəmə, kala wəsə nya hwa yɛmə newe hɛ gheɓəmə. Ama te kwete veci ne, kwa ntsə kwa ntsə tenewe hɛ gheɓəmə. Ma tsetsenya, keɗepe wəshi 'ya pɛtɛ we, ama te kwete veci ne, kateɗepe Shala 'ya fate fate, kala nya ɗepe ɗa ŋkɛ le ghəa ŋkɛ.

¹³Tsetsenya ne, wəshi mahekene ka nza: yɛ, ve ghə ba'a ɗe. Ama ɗe ya kwele ma hwa wəshi nyi mahekene nyi.