Read KapsikiDC 1 Ka Korɛnte 3 Bible Online

1 Ka Korɛnte 3 - KapsikiDC bible

1 Ka Korɛnte 3

¹Ka kesaka ma, ma 'ya le ŋa ɗa ne, shaŋe 'ya kageze ŋayɛ ghena kala mbeli nyi nza Sefəa Shala va hɛ, kala mbeli nyi teke te hɛɗi, kala ŋwalea fəshi nyi keyɛhwe Kriste gezete ŋayɛ 'ya.

²Ŋ'wa yase 'ya kasa ŋayɛ, kaɗema kawəsə kezeme nya ntɛaŋe, va nya nza nde dewə berete ta ŋayɛ. Ya tsetsenya ne, kapesle yɛ yite we,

³kwa nza ŋkɛ mba mehele ta ŋayɛ kala ŋa mbeli nyi teke te hɛɗi. Ma kwa nza ŋkɛ kazlɛ yɛ kwelɛ ghəa ŋayɛ ba'a kaghəpə yɛ ne, kaɗema yɛ kaka dewə berete tsagha na? Ashɛ kala nza ta zəzə ta mbeli nza ta ŋayɛ tsagha wəka?

⁴Ma ke kwete wəndəa ŋayɛ sha geze: «Ŋa Pol 'ya», ma ke kwete: «Ŋa Apolos 'ya wəndə.» Ashɛ deke kala zəzə ta mbeli mene yɛ tsagha wəka?

⁵Wa ŋkɛ Apolos wa? Wa ŋkɛ Pol wa? Nahe n'yɛ kenza kaka mene nda slene ke Shala, nyi kekemanakɛ ŋayɛ yitea yɛ ghena ta Yɛsə. Nahe yayata wəndəa n'yɛ kemenete slene kala nya dapave nda Nde sleke ŋkwa.

⁶Nahe 'ya kemɓete wəfə, Apolos nde gəyite yɛmə yite, ama Shala nde kelete wəfea shɛ.

⁷Nahe wəndə nya kemɓe ba'a nya kegəyite yɛmə yite kenza gəmə, deke Shala yaɓela mbeli, gheŋkɛ nya kekelete ŋkɛ.

⁸Ma wəndə nya kemɓe ba'a nya kegəyite yɛmə yite ne, yipə yipə hɛ. Ama kateve nda zhɛme ta ŋkɛ Shala ke yayata wəndəa nci kala slene nya menete hɛ.

⁹Kwa nza ŋkɛ nahe n'yɛ kenza kaka mene slene ta Shala, ma gheyɛ ne, wəve nya wəza Shala yɛ. Nahe yɛ kenza kaghɛa Shala.

¹⁰Kala zlaɓa ta ŋkɛ nya ndeke ɗa Shala ne, nahe 'ya keghate shihə tiɗiɗi kala wəndə nya keɗepe ŋa ŋkwa. Kwete wəndə nde ŋa dewe tsetsenya kadzeghə. Ama ntsehwele yayata wəndə yitea ŋa ŋkwa ta ŋkɛ.

¹¹Nahe shihəa shɛ keveyi geva, gheŋkɛ Yɛsə Kriste, kwete wəndə shɛ kaveyi kwete we.

¹²Le mze kwa tere tere ŋa ŋkwa kwete te shihəa shɛ, le mze kwa tɛawetɛa kwete, le pelɛ nyi nza zləvə te hɛ kwete, le sheghwə kwete, le tsafetse kwete, le mezaɗe kwete.

¹³Ama vəa ŋkwa nya temeha ghwə Shala te mbeli tencɛ geva slene ta mbeli, ghwə nde tedzeghe berete ta slene ta nci.

¹⁴Ma wəndə nya shaŋe ghwə katere slene ta ŋkɛ ne, katekemave zhɛme ta ŋkɛ ŋkɛ.

¹⁵Ama wəndə nya teremte slene ta ŋkɛ ghwə ne, ndaŋe tenza ŋkɛ te zhɛme. Ma gheŋkɛ ne, katembele ŋkɛ, ama tekwazhizhi kala wəndə nya kejive hwa ghwə.

¹⁶Keɗepe yɛ nahe yɛ kenza kaghɛa Shala ba'a nahe Sefəa Shala kenza mbe gheyɛ wəka?

¹⁷Ma keŋzlamte ghɛa Shala wəndə ne, kateza wəndəa shɛ Shala. Kwa nza ŋkɛ ne, nahe ghɛa Shala shɛ keveyi geva tekeleke, gheyɛ ya kaghɛa Shala.

¹⁸Yagha wəndə teghwete ghəa ŋkɛ. Ma kenza ŋkɛ kazəzə kwete wəndəa ŋayɛ nahe ŋkɛ kenza kentsehwele ntsehwele kala mbeli nyi te hɛɗi nya ne, zhɛrete ghəa ŋkɛ ŋkɛ kagezhi yitea nza ŋkɛ kande ntsehwele ntsehwele ganyɛ.

¹⁹Kwa nza ŋkɛ wəsə nya heka mbeli nyi te hɛɗi kantsehwele ne, kala wəsə gezhi newe Shala. Kwa nza ŋkɛ ma ke rafete geva: «Katekese ka ntsehwele ntsehwele nyi te hɛɗi Shala mbe keleŋa ta ntsehwele gezhia nci.»

²⁰Ma ke Ghena ta Shala zhɛkwa: «Nahe Nde sleke ŋkwa keɗepe ghena nyi zəzə ka ntsehwele ntsehwele. Nahe ŋkɛ keɗepe gəmə ghena ta ncia shɛhɛ.»

²¹Ma tsagha ŋkɛ ne, yagha wəndə kamene fege le ghena nya kese va wəndə ŋelɛ, kwa nza ŋkɛ ŋa ŋayɛ wəshi pɛtɛ:

²²Pol, Apolos keɗema Kɛfas, ŋkwa nya te hɛɗi, nza teghweme, mte, wəshi nyi tsetsenya ba'a nyi ketese ne, ŋa ŋayɛ pɛtɛa wəshia shɛhɛ.

²³Ama gheyɛ ne, ŋa Kriste yɛ, Kriste ne, ŋa Shala ŋkɛ.