Read KapsikiDC 1 Ka Korɛnte 9 Bible Online

1 Ka Korɛnte 9 - KapsikiDC bible

1 Ka Korɛnte 9

¹Kenza 'ya kawəndə nya waɗe wəka? Ashɛ wəndə nya ghwenakɛ Yɛsə Kriste 'ya wəka? Ashɛ 'ya kenakɛ Yɛsə Nde sleke ɓəmə wəka? Gheyɛ ne, ashɛ meleɓe ta slene ta Nde sleke ŋkwa nya menete 'ya yɛ wəka?

²Ya tsema ɗema 'ya kande ghwene ta Yɛsə sha kweci mbeli ne, kande ghwene ta Yɛsə nza 'ya sha gheyɛ. Ma wəsə nya kenegha fete yitea nza ta ɗa kande ghwene ta Nde sleke ŋkwa ne, gheyɛ nyi kenza kambelia Nde sleke ŋkwa.

³Wa nya zhɛne ta ɗa nya kaŋa mbeli nyi keve ɗa fete:

⁴Ashɛ hweŋkwa va gheɓəmə kezha zeme wəsə kezeme ba'a kasa wəsə kesa te slene ta ɓəmə wəka?

⁵Ashɛ hweŋkwa va gheɓəmə kadzehwa mte le male nya kakwa Kriste kala nya mene kweci ka ghwene ta Yɛsə Kriste, ka kesaka meghekɛa Yɛsə ba'a Piyɛre wəka?

⁶Na, deke ghen'yɛ le Barnabas ka hi kamene slene kezha zeme nda wəsə kezeme ke ghəa n'yɛ na?

⁷Wa sewajɛ nya kepa nda wəshi kezeme ke ghəa ŋkɛ wa? Na, wa wəndə nya keɗema zeme ya ta rɛzɛŋe nya mɓete ŋkɛ wa? Na, wa wəndə nya keya sla nya keɗema kasa ŋ'wa ta sla shɛ wa?

⁸Va nya nza kawəndə ŋelɛ gezete 'ya kala nya, kaɗema wəsə mahalegə kegezete tsagha na?

⁹Kwa nza ŋkɛ ma ke rafete geva mbe wəsə mahalegəa Moyize: «Katehwepe nda wəsə yɛ mbe mɛ ke mca nya keleke ha we.» Sla yazəzə Shala na?

¹⁰Ma nda gezete geva ŋkɛ kala nya ne, kezha gheɓəmə wəka? Ghəpə yite we, kezha gheɓəmə rafete geva ghena shɛ. Ma nda wəza wəndə ba'a nda leke ha wəndə ne, va nya vate ghə ŋkɛ te kemave ŋa ŋkɛ bela ta wəsə kese te wəve.

¹¹Nahe ghen'yɛ ketsawete wəshi ganjia Sefəa Shala mbe gheyɛ. Wəsə kwa ndiremi yamene ghen'yɛ kekemave bela ta wəshia ŋayɛ n'yɛ kazhɛme ta n'yɛ na?

¹²Ma kwa nza ŋkɛ berete ya va kweci mbeli te ghəa ŋayɛ ne, ashɛ za ma nza ŋa n'yɛ ke hɛ wəka? Ama kese ghen'yɛ kamene beretea shɛ te gheyɛ we. Nahe n'yɛ kesəwəhwe pɛtɛa wəshi yagha Ghena kwatenca nya ganyɛ ta Kriste kabeze.

¹³Nahe yɛ keɗepe mbeli nyi kemene slene mbe ghɛa Shala ne, mbe ghɛa shɛ kema ŋa nci wəsə kezeme hɛ. Ma nyi kemene slene te reghwetɛ ne, te reghwetɛa shɛ kema ŋa nci hɛ bela.

¹⁴Tsagha gezete nda Nde sleke ŋkwa ke mbeli nyi kegeze Ghena kwatenca nya ganyɛ ta ŋkɛ kezha kemave wəsə kezemea nci hɛ le.

¹⁵Kese 'ya kamene kala nyagha we, kenza kezha 'yɛwe wəshi va gheyɛ rafete palepa nya 'ya we. Jara mte ɗa 'ya, wəndə shɛ kakelehwe tsahe nya te 'ya we.

¹⁶Kwa nza ŋkɛ wəsə fege ŋkɛ sha 'ya kwa zlape Ghena kwatenca nya ganyɛ 'ya we, nda 'ya kamene. Ndiremi ya te 'ya keɗema 'ya kazlape Ghena kwatenca nya ganyɛ.

¹⁷Ma ya 'ya le ghəa ɗa nde ntave slene nya ne, nza kateneghe zhɛme ta ŋkɛ 'ya. Ama kwa ghwenakɛ ɗa Shala yite ne, deke slene ta ŋkɛ yavate ghə 'ya te.

¹⁸Wa ya kaŋa ɗa zhɛme wa? Gheŋkɛ zlape nda Ghena kwatenca nya ganyɛ gəmə ke mbeli. Kazlape ŋkɛ 'ya kaɗema kafa deme te wəshi nyi kehi nyi ve ɗa ŋkɛ.

¹⁹Kaganda ne, nahe 'ya kenza kamamza, kenza 'ya kamava ta wəndə we. Ama nahe 'ya kezhɛrete ghəa ɗa kamava ta mbeli pɛtɛ yitea baŋe 'ya kakemave mbeli kwele kwele kaŋa Kriste.

²⁰Ma hwa ka Zhəwif ne, kala nde Zhəwif nza 'ya kezha kemave ka Zhəwif. Ma hwa ka hawe va wəsə mahalegəa Moyize ne, kahawe 'ya va wəsə mahalegə kezha kemave mbeli nyi kehawe ve. Ndagwara kenza hawe va wəsə mahalegəa shɛ le berete sha 'ya we.

²¹Ma kwa nza ghen'yɛ le mbeli nyi keɗepema wəshi mahalegə ne, kala hɛ nza 'ya, kazəzə ghena ta wəsə mahalegə 'ya, kezha hekakɛ hɛ kase sha Yɛsə we. Kegeze 'ya kaɗema 'ya kazele wəsə mahalegə we, kwa nza ŋkɛ Kriste ya kawəsə mahalegəa ɗa.

²²Kala nde dewə ŋeli se 'ya kanza hwa ka dewə ŋeli kezha hekakɛ hɛ. Kala yayata wəndə se 'ya kanza hwa hɛ yitea mbele kweci hwa hɛ.

²³Tewəmbəreke Ghena kwatenca nya ganyɛ nda menete 'ya, baŋe 'ya kakemave ŋa ɗa bela mbe mcɛləa ŋkɛ.

²⁴Ma mbeli nyi kedzeghe wampelɛa wampelɛa ne, pɛtɛ hwɛ hɛ, ama ashɛ kwetɛŋe tenza nde ncɛ kema wəka? Dzeghe mə wampelɛa wampelɛa baŋe yɛ kanza kaka ncɛ kema.

²⁵Ma mbeli nyi kedzeghe wampelɛa wampelɛa ne, ka'yɛ ghəa nci hɛ dzawe yitea zehwe, yitea kemave derə meghe nya ketekiɗi mene hɛ tsagha. Ama gheɓəmə ne, yitea kemave derə meghe nya keɗema katekiɗi nda 'yɛ ghəa ɓəmə gheɓəmə.

²⁶Tsetse hwɛ 'ya, deke ŋkwa nya te kema yanewe 'ya. Tsetse mpa dɛmbə 'ya, kanegha dzeve 'ya gəmə kala ghwələ we.

²⁷Dzawe 'yɛ geva ta ɗa 'ya, kese yakese ŋkɛ 'ya, yagha 'ya tenza kala wəndə nya tenegha mbeli, kwa sebe ta nya zlapete nda ghena ta Yɛsə 'ya ke kweci mbeli.