Read KapsikiDC 2 Ka Korɛnte 1 Bible Online

2 Ka Korɛnte 1 - KapsikiDC bible

2 Ka Korɛnte 1

¹Se va Pol nya kande ghwene ta Yɛsə Kriste laka ɗe ta Shala ba'a se va Timotɛ, wəza meyɛ ɓəmə, ke Jikə ta ka Kriste nya kaŋa Shala mbe Korɛnte ba'a ke pɛtɛa mbelia Shala nyi te hɛɗia Akay pɛtɛ.

²Pa Shala Yiteyɛ ɓəmə ba'a Nde sleke ŋkwa Yɛsə Kriste ndeke ŋayɛ kwelɛŋe ba'a zlaɓa.

³Tsahe ɓəmə Shala, Yitenyɛa Nde sleke ɓəmə Yɛsə Kriste, Yita nde zhɛ heli yitea mbeli, Shala nya kegweɗakwe nda wənə ke mbeli keveci keveci.

⁴Gheŋkɛ nde kemane ɓəmə mbe pɛtɛa yaka nyi sa gheɓəmə, kezha kemane kweci mbeli nyi kesa yaka shɛ le ghena nya kegweɗakwe ŋkwa nya kemave mə va Shala.

⁵Kala nya nza yaka ta Kriste kwele kwele kezha gheɓə, tsagha nza gweɗakwe ta wənəa ŋkɛ kwele kwele kezha gheɓəmə.

⁶Ma kenza n'yɛ kasa yaka ne, nahe ŋkɛ kenza kezha kemave gweɗakwe yɛ ba'a kezha mbele yɛ. Ma kekemave gweɗakwe n'yɛ ne, nahe ŋkɛ kenza kezha gweɗakwe ŋayɛ yitea səwə yaka nyi səwə ghen'yɛ yɛ.

⁷Kaganda ne, nahe n'yɛ kenza le gezleŋema ghə laka gheyɛ. Ma kwa nza ŋkɛ nahe yɛ kenza mbe yaka ta n'yɛ ne, nahe yɛ kenza mbe gweɗakwe ta wənəa n'yɛ perə.

⁸Ka kesaka ma, kaɗe n'yɛ kancɛ ŋayɛ ghena nya dzawe nya kemenete n'yɛ geva mbe Azi. Ɗaŋe ɗaŋe dzawea shɛ kənəa ghen'yɛ za ma ke berete ta n'yɛ, bətə tenza mpia n'yɛ, ke ghen'yɛ te vecia shɛ.

⁹Kala mbeli nyi telə mbeli kampə newe ghəa n'yɛ ghen'yɛ te vecia shɛ. Ma nda menete n'yɛ geva ŋkɛ tsagha ne, kezha ɗema n'yɛ kaɓela ŋa n'yɛ berete, yitea ŋa Shala nya kekele mbeli same kwa kwele le mpi.

¹⁰Gheŋkɛ nde mbelete n'yɛ va mtea shɛ vəa ŋkwa shɛ, kaganda, gheŋkɛ nde tembele n'yɛ zhɛkwa ve, mbe veyi zəzə ta n'yɛ n'yɛ katembele n'yɛ ŋkɛ ve zhɛkwa.

¹¹Tsagha tekemane n'yɛ yɛ le səkwə ghə ta ŋayɛ. Ma tsagha ne, katefa səkwə ghə ta mbeli kwele kwele Shala kezha ghen'yɛ, katezhɛre geva səkwə ghəa shɛ kahana nya tsa nda mbeli ke Shala te mbele ta n'yɛ.

¹²Wa nya wəsə nya fege ghen'yɛ te nya: mehele ta n'yɛ nde ncɛ n'yɛ megela nza ta n'yɛ hwa mbeli te yayata ŋkwa, halama hwa gheyɛ le gwedə ba'a kaganda nya kese va Shala, laka ntsehwelea wəndə ŋelɛ menete ghen'yɛ we, ama laka zlaɓa ta Shala.

¹³Kwete ghena shɛ mbe palepa ta n'yɛ we, deke ghena nya jaŋga yɛ ba'a nya fate yɛ. Ma zəzə 'ya ne, pɛtɛ tefa ghena nya yɛ,

¹⁴kwa nza ŋkɛ nahe yɛ kefave bela ta ghena ta n'yɛ: wərə yɛ kafege le ghen'yɛ tsetsenya kala nya tefege n'yɛ te gheyɛ veci nya tese Yɛsə Kriste.

¹⁵Te wəsə nya kala nya nda ɗema 'ya kaghazlənə va lə sha gheyɛ, kezha kemave zlaɓa ta Shala yɛ kakwa bake zhigə,

¹⁶nahe 'ya kezəzəte lə sha gheyɛ nda dzeme Masɛdowane 'ya, kwa sebe ta ŋkɛ, katezhɛne geva 'ya kase sha gheyɛ. Ma tsagha ne, katekemane ɗa yɛ kadzembe Zhəwdɛ.

¹⁷Ma kemenete 'ya kala nya ne, kala wəndə nya ɗema ghə ve menete 'ya na? Na, kala nya mene mbeli nyi te hɛɗi zəzəte 'ya na? Ma tsagha ne, bake tenza ghena va 'ya, E'e ba'a Ewə.

¹⁸Shala nde negha fete yitea 'ya. Kenza ghena nya gezete ŋayɛ 'ya kaE'e ba'a kaEwə we.

¹⁹Ma Yɛsə Kriste, Wəzege ta Shala nya ncɛte ŋayɛ ghen'yɛ le Silas ba'a Timotɛ ne, ghena kezhɛne E'e ba'a Ewə ŋkɛ we, ama E'e ŋkɛ nahe.

²⁰Gheŋkɛ ya kaE'e nya keve ɓəmə ghena nya meɗeyi nda Shala ke mbeli vəashi. Laka gheŋkɛ geze nda Amɛn gheɓəmə ke Shala kezha zləvəa ŋkɛ.

²¹Shala le ghəa ŋkɛ nde ve n'yɛ berete le gheyɛ laka Kriste. Gheŋkɛ nde veyi n'yɛ tekeleke.

²²Gheŋkɛ nde rafeyi sləa ŋkɛ te ghen'yɛ ba'a nde viɗikɛ wənəa n'yɛ le Sefəa ŋkɛ kawəsə ganyɛ nya wəmbə n'yɛ ŋkɛ.

²³Shala nde negha fete yitea 'ya. Gheŋkɛ nde meha ghwə te 'ya keslate tseŋwə 'ya. Va nya zhɛ ɗa heli yitea gheyɛ nda ɗema 'ya dzembe Korɛnte zhɛkwa.

²⁴Kaɗe n'yɛ kageze ŋayɛ ghena nya teyɛ yɛ le berete we, va nya nza ŋkɛ bake bake dzeve keseve yɛ ta ŋayɛ yɛ, ama kaɗe ghen'yɛ kakemane ŋayɛ nda nza yɛ megela.