Read KapsikiDC 2 Ka Korɛnte 10 Bible Online

2 Ka Korɛnte 10 - KapsikiDC bible

2 Ka Korɛnte 10

¹Ma 'ya Pol ne, ka'yɛwe ghena 'ya le ghəa ɗa va gheyɛ tewəmbəreke gwedə ba'a ganyɛa Kriste, 'ya nya kagwedə vəa ŋkwa nya nza 'ya kwa kema ta ŋayɛ, kande hwepe ghə vəa ŋkwa nya nza 'ya cakeɗake yitea gheyɛ.

²Kampi ŋayɛ dzeve 'ya, ŋka ɗa ma yɛ yitea nza kande hwepe ghə vəa ŋkwa nya tenza 'ya hwa gheyɛ ma. Kwa nza ŋkɛ katenza 'ya le hwepe ghə laka mbeli nyi kezəzə kezha yɛ zəzə ta wəndə ŋelɛ mene slene ghen'yɛ.

³Mbeli ghen'yɛ kaganda, ama kampa n'yɛ kala mbeli nyi te hɛɗi we.

⁴Mbe mpa ta n'yɛ ne, keghə keghə wəshi kempa ta n'yɛ le ŋa mbeli nyi te hɛɗi. Va Shala se wəshi kempa nyi berete berete ta n'yɛ kezha ŋzla ŋkwa nyi berete berete nyi ŋate mbeli. Yɛ zəzə kele ghə ta mbeli yaŋzla ghen'yɛ.

⁵Pɛtɛ ŋzla ghena kele ghə nyi kefɛa mbeli keɗepe Shala ghen'yɛ, kese yakese ghena nyi zəzə mbeli ghen'yɛ yitea yɛ nda fete mbelia shɛhɛ ke Kriste.

⁶Ma veci nya teyɛ nda fete yɛ ke Kriste fate fate ne, kate'yɛ yayata wəndə nya keɗema kayɛ fete ghen'yɛ.

⁷Zəzə ɓəmə ghena fate fate, ma kezəzəte wəndə kawəndə Kriste ŋkɛ ne, nda ŋkɛ kaɗepete ghena nya megela: ma kenza ŋkɛ kawəndəa Kriste ne, tsagha ghen'yɛ perə.

⁸Kazhɛ ɗa hawe kenza 'ya kamene fege le berete nya ndeke n'yɛ Nde sleke ŋkwa we. Kezha kemane ŋayɛ kayɛ ghena ta Yɛsə ndeke n'yɛ beretea shɛ ŋkɛ, kaɗema kezha beze ŋayɛ.

⁹Kaɗe 'ya karafe ŋayɛ palepa ta ɗa nyi kawəsə kedake ŋayɛ we.

¹⁰Kwa nza ŋkɛ ma ke kweci sha geze: «Nahe yɛ palepa ta Pol kenza dzawe dzawe ba'a ghyanake nake. Ama kwa nza ŋkɛ teke hwa gheɓəmə ne, kande dewə ŋeli ŋkɛ, ghena ganyɛ ghena ta ŋkɛ we.»

¹¹Ma wəndə nya kegeze kala nya ne, jara ɗepe ŋkɛ fəyitekeghə: yipə yipə ghena nya rafete ghen'yɛ te palepa le nya temene ghen'yɛ veci nya tenza n'yɛ le gheyɛ.

¹²Kaganda ne, ashɛ ghen'yɛ kayipəte ghəa n'yɛ le mbeli nyi kekele ghəa nci gəmə we. Ma ghenci ne, ghəa nci yatsahe hɛ. Deke berete ta nci yaɓela hɛ, ama gezhi hɛ deŋwa.

¹³Ma ghen'yɛ ne, kafege ghen'yɛ kala nyagha we, kazlake ghala nya mɓeyi n'yɛ Shala ghen'yɛ we. Slene nya ndeke n'yɛ Shala kwa pelakɛ n'yɛ ŋkɛ kalə sha gheyɛ ne, gheŋkɛ ya kaghala ta ŋa n'yɛ fege.

¹⁴Ma kwa lə n'yɛ sha gheyɛ ne, kezlakemte ghala shɛhɛ ghen'yɛ we. Kwa nza nde ghen'yɛ ka ghate kase sha gheyɛ kaganda le Ghena kwatenca nya ganyɛ ta Kriste.

¹⁵Kamene fege ghen'yɛ le slene ta kweci mbeli we. Ama mbake ta ghena ta Shala nya yɛhwe yɛ yaneghe ghen'yɛ. Tsagha ne, kwele ma temene slene ta n'yɛ hwa gheyɛ. Ama kazlake ghala nya mɓeyi n'yɛ Shala ghen'yɛ we.

¹⁶Katelə n'yɛ kazlape nda Ghena kwatenca nya ganyɛ ke kweci mbeli zlake ke meleme ta ŋayɛ, kaɗema n'yɛ kamene fege le slene nya menete kweci mbeli te ŋa nci ŋkwa.

¹⁷Ma ke Ghena ta Shala: Ma wəndə nya keɗe mene fege ne, te slene nya menete Nde sleke ŋkwa hi ŋkɛ kamene fege.

¹⁸Wəndə nya ketsahekɛ ghəa ŋkɛ yanza zləvə te we, ama wəndə nya tsahekɛ Nde sleke ŋkwa.