Read KapsikiDC 2 Ka Korɛnte 3 Bible Online

2 Ka Korɛnte 3 - KapsikiDC bible

2 Ka Korɛnte 3

¹Ghen'yɛ kazhɛne kave ghəa n'yɛ te kema na? Nahe n'yɛ kehi kala kweci mbeli karafe ŋayɛ palepa yitea ncɛ ŋayɛ ghəa n'yɛ na? Na, gheyɛ ka rafe n'yɛ kala nyagha na?

²Gheyɛ ya kapalepa ta n'yɛ, nya kerafeyi geva kwa wənəa n'yɛ, nya ɗepete ba'a nya jaŋgate mbeli pɛtɛ.

³Kaganda ne, gheyɛ ya kapalepa nya rafete Kriste laka ghen'yɛ. Kerafete geva le yirə we, ama le Sefəa Shala nya teghweme. Kenza te pelɛ nyi slapesla slapesla tsaslate geva ŋkɛ we, ama dzeyi kwa yɛ wənəa mbeli.

⁴Ma nda geze ghen'yɛ kala nya ne, va nya ɗema ghen'yɛ kaghazlənə va nza kwa kema ta Shala te zlaɓa ta Kriste.

⁵Kamenete slene nya ghen'yɛ le ghəa n'yɛ we, ama va Shala se berete ta n'yɛ.

⁶Gheŋkɛ nde ndeke n'yɛ berete kezha mene slene ta jikə geva mɛnɛfɛ nya kesema laka wəsə mahalegə nya kerafete geva vəashi, ama laka Sefəa Shala. Pesle yapesle ŋkwa wəsə mahalegə nya kerafete geva vəashi, ama Sefəa Shala ne, mpi yave nda ŋkɛ ke mbeli.

⁷Nahe wəsə mahalegə ketsaslate geva kerafe kerafe te pelɛ nyi slapesla slapesla ba'a nahe zləvəa Shala kencɛte geva te vecia shɛ. Kaɓele kema ta Moyize kala veci, shaŋe ka Israyɛl kanewe va ɓele ta ŋkɛ, ndagwara katekiɗi ɓele ta ŋkɛa shɛ. Ma ya nahe wəsə mahalegə nya nza slene ta ŋkɛ kakele mte kase kencɛte geva kala nya ne,

⁸tsema tenza kwelea zləvəa slene nya mene wəndə le Sefəa Shala tsagha wa?

⁹Ma slene nya keve nda fete kemte ke mbeli kanza zləvə te ne, halama slene nya keve mbeli tiɗiɗi kwa kema ta Shala na?

¹⁰Ma zləvə nya vəashi ne, wəsə ŋkɛ yitea nya tsetsenya we. Zləvə ma te nya tsetsenya zhɛkwa.

¹¹Ma kenakɛ zləvəa wəsə nya keɗema katemə mbeli ne, za ma tenewe zləvəa nya keɗema kakiɗi hɛ.

¹²Le ve ghə nya kala nya ne, nahe gheɓəmə kendeke nda ghə fate fate.

¹³Kala Moyize nya kedəpəte kema ta ŋkɛ nya keɓele le zlave yagha ka Zhəwif tenakɛ kiɗi ta ɓelea shɛ mene gheɓəmə we.

¹⁴Ama shaŋe hɛ kafa ghena shɛ, pa tsetsenya, kala wəsə nya le zlavea shɛ dəpəte geva ɗepe wəsəa nci kwa jaŋga kwa ghate ta jikə geva hɛ. Deke kejikəte geva wəndə le Yɛsə nda nza zlavea shɛ kakiɗinyɛ.

¹⁵Ya ɓeshi, kwa jaŋga ghena ta Moyize hɛ ne, tedəpə ɗepe wəsə ta nci va zlavea shɛ.

¹⁶Ma wəndə nya kezhɛre geva kalə sha Nde sleke ŋkwa ne, nahe zlavea shɛ kekelemte geva kala nya gezete Ghena ta Shala.

¹⁷Ma Nde sleke ŋkwa ne, gheŋkɛ Sefəa ŋkɛ. Ma te ŋkwa nya nza Sefəa Nde sleke ŋkwa ne, kamamza nza wəndə.

¹⁸Gheɓəmə pɛtɛ, nahe zlave kekelemte geva kwa kema ta ɓəmə, kanewe zləvəa Nde sleke ŋkwa gheɓəmə, kanewe zləvəa shɛ mbeli laka gheɓəmə kala wəsə nya kwa deraŋgale. Nahe pa ta ɓəmə kezhɛrenyɛ, yipə yipə nza gheɓəmə le Nde sleke ŋkwa. Tsagha jive zləvəa ɓəmə mbe kema mbe kema. Tsetse slene nya mene Sefəa Shala mbe gheɓəmə.