Read KapsikiDC 2 Ka Korɛnte 4 Bible Online

2 Ka Korɛnte 4 - KapsikiDC bible

2 Ka Korɛnte 4

¹Shala le ndeɗea mehele ta ŋkɛ nde dapave n'yɛ slene ta ŋkɛ, vatse hwepe ghə ghen'yɛ yite.

²Nahe n'yɛ kesərəakɛ slene nyi mene mbeli tewəfərə ba'a ghena hawe, le ntsehwele mene slene ghen'yɛ we, kazhɛrete ghena ta Shala n'yɛ tekeleke we. Ama kaganda ta ghena ta ŋkɛ yancɛ nda n'yɛ ke mbeli dazhɛ dazhɛ, kezha keseve mehele mbeli pɛtɛ kwa kema ta Shala.

³Ma nda tewəfərə Ghena kwatenca nya ganyɛ nya zlape ghen'yɛ ne, deke sha mbeli nyi keza za nza ŋkɛ tewəfərə.

⁴Kayɛ ghena shɛ hɛ va nya ghwələpəmte ɗepe wəsəa nci gətəli nya kesleke ŋkwa nya te hɛɗi we. Tsagha menete ŋkɛ yitea ɗema hɛ kafa Ghena kwatenca nya ganyɛ nya kewaŋe nda ŋkwa ke mbeli. Ghena shɛ nde ncɛ zləvəa Kriste, nya kapa ta Shala le ghəa ŋkɛ.

⁵Ghena ta ghəa n'yɛ yazlape ghen'yɛ we, ama ŋa Yɛsə Kriste nya kaNde sleke ŋkwa. Ma ghen'yɛ le ŋa n'yɛ ne, kaka mene ŋayɛ slene nza ghen'yɛ tewəmbəreke Yɛsə.

⁶Ma ke Shala gezete: «Ɓelete geva waŋe mbe ŋkwesle.» Gheŋkɛ le ghəa ŋkɛ nde waŋete ŋkwa nya mbe wənəa n'yɛ, yitea ɗepe zləvəa ŋkɛ nya keɓele kwa kema ta Kriste n'yɛ.

⁷Ama ghen'yɛ nyi kekele wəsə nya nza shɛ zləvə te ne, kala dəghwə rekɛ ghen'yɛ, yitea ɗepe mbeli va Shala se berete ta n'yɛ, kaɗema va ghen'yɛ.

⁸Kwele kwele sa n'yɛ yaka mbeli, ama shaŋe ghen'yɛ kampə, kataze n'yɛ mehele mbeli, ama kenza n'yɛ keyirə yirə we.

⁹Kaghweze mɛ mbeli hwa ghen'yɛ, ama kesərəakɛ n'yɛ Shala we, kawele n'yɛ mbeli, ama shaŋe hɛ va hərə n'yɛ.

¹⁰Keveci keveci dzeghwa ghen'yɛ le mte ta Yɛsə mbe geva ta n'yɛ kezha baŋe mpia ŋkɛ kancɛte geva mbe geva ta n'yɛ perə.

¹¹Keveci keveci nza n'yɛ mbe dzeve ta mte tewəmbəreke Yɛsə, ghen'yɛ nyi teghweme, kezha ncɛte geva mpia Yɛsə mbe geva ta n'yɛ nya ketemte.

¹²Ma kamene slene ta ŋkɛ mte mbe geva ta n'yɛ ne, kamene ŋa ŋkɛ mpi mbe gheyɛ.

¹³Ma ke rafete geva: «Nahe 'ya keyɛhwe, vatse gezete ghena 'ya.» Tsagha ghen'yɛ ɓiyitsa, va Sefəa Shala se yɛa shɛ, kwa yɛhwe ghen'yɛ nda geze ghena n'yɛ.

¹⁴Kwa nza ŋkɛ nahe n'yɛ keɗepe Shala nya kekelakame Nde sleke ŋkwa Yɛsə same kwa kwele, gheŋkɛ nde tefə n'yɛ same kwa perə le Yɛsə, kateve ɓəmə ŋkɛ le gheyɛ terasle yite.

¹⁵Kezha gheyɛ mene n'yɛ geva pɛtɛa wəshia shɛhɛ, kezha kekave kweci mbeli zlaɓa ta Shala, nda mbake geva mbeli kwele kwele katsa nda hana ba'a katsahe ŋkɛ.

¹⁶Vatse ɗema n'yɛ kasərəakɛ hwepe ghə. Ya geva ta n'yɛ nza kakiɗinyɛ ne, kazhɛre mehele ta n'yɛ kamɛnɛfɛ keveci keveci.

¹⁷Nahe yaka nyi sa n'yɛ tsetsenya kenza kɛfe kɛfe yitea zləvə nya wəba ba'a kaghala ghala nyi hi n'yɛ yaka shɛhɛ.

¹⁸Wəshi nyi newe mbeli yavate ntsə n'yɛ te hɛ we, ama wəshi nyi ɗema mbeli kanakɛ. Katemə wəsə nya newe mbeli we, ama wəsə nya newema mbeli nde nza kaghala ghala.