Read KapsikiDC 2 Ka Korɛnte 6 Bible Online

2 Ka Korɛnte 6 - KapsikiDC bible

2 Ka Korɛnte 6

¹Ma ghen'yɛ nyi kemene slene le Shala ne, kasəkwə ŋayɛ n'yɛ kezha ɗema yɛ kapele se yitea zlaɓa nya ndeke ŋayɛ Shala.

²Kwa nza ŋkɛ ne, ma ke Shala: «Nahe 'ya keveyite sleme yitea səkwə ghə ta ŋa te veci nya kehite geva, nahe 'ya kekemanakɛ ŋa te və nya mbelete mbeli 'ya.» Yawa, tsetsenya ne, nahe və kenza megela kezha yɛ zlaɓa ta Shala, nahe vecia mbele kese.

³Kaɗe n'yɛ kanza slene ta n'yɛ kawəsə nya teɗe wəndə ve, yagha fete nza te slene ta n'yɛ we.

⁴Ama kaka mene slene ta Shala ncɛ nda ghəa n'yɛ ghen'yɛ ke mbeli: kasəwə yɛ yaka, yɛ yirə ba'a yɛ taze ta mehele n'yɛ le zereghe ghena kwele kwele.

⁵Nahe mbeli keɗate n'yɛ, kekeseyi n'yɛ kwa daŋgayɛ, kehave n'yɛ mpa ba'a kendeke n'yɛ slene nyi dzawe dzawe. Nahe n'yɛ kekemavema dzete hɛ ba'a wəsə kezeme.

⁶Kancɛ ghəa n'yɛ n'yɛ kaka mene slene ta Shala laka nza wɛŋe, ɗepe wəsə, zereghe ghena, ndeɗea mehele, slene ta Sefəa Shala, ɗe ganyɛ,

⁷zlape kaganda ba'a te zlaɓa ta berete ta Shala. Wəsə nya tiɗiɗi yakele n'yɛ kawəsə kempa kezha ha nda mpa ke mbeli keɗema kezha ya ghəa n'yɛ.

⁸Kave zləvə mbeli te ghen'yɛ ba'a kayiɗə n'yɛ mbeli, kaŋele n'yɛ mbeli ba'a kahawe mbeli va ghen'yɛ, kaka tseŋwə newe n'yɛ mbeli, ndagwara kaganda yageze ghen'yɛ.

⁹Kala mbeli nyi ɗepema hɛ mbeli newe n'yɛ mbeli, ama nahe mbeli pɛtɛ keɗepe n'yɛ. Kambeli nyi kempə mpə newe n'yɛ mbeli, ndagwara mba ghen'yɛ teghweme. Kaɗa n'yɛ mbeli, ama kampə n'yɛ mbeli we.

¹⁰Kave n'yɛ heɗe kema mbeli, ndagwara zlama ya va ghen'yɛ keveci keveci. Kaka titikwə newe n'yɛ mbeli, ndagwara nahe pɛtɛa wəshi kenza va ghen'yɛ.

¹¹Nahe n'yɛ kegezete ŋayɛ ghena fəyitekeghə, gheyɛ ka Korɛnte, waɗe pelave ŋayɛ wənəa n'yɛ ghen'yɛ.

¹²Keŋzlemte wənəa n'yɛ ghen'yɛ we, ama gheyɛ ka ŋzlemte ŋa ŋayɛ.

¹³Kala ŋwalea ɗa geze ŋayɛ ghena 'ya, menete n'yɛ mə kala nya menete ŋayɛ n'yɛ, pelemte n'yɛ mə wənəa ŋayɛ fate fate.

¹⁴Mba yɛ kezlaɓe geva le mbeli nyi keɗema kayɛ ghena ta Yɛsə. Tsema nza ghena nya tiɗiɗi kajikəte geva le ghena mefətekwə wa? Tsema nza waŋe kajikəte geva le ŋkwesle wa?

¹⁵Tsema nza Kriste katseɓate ghena le gətəli wa? Wa wəsə nya kenza kajikəte wəndə nya keyɛ Shala le wəndə nya keyɛma ŋkɛ wa?

¹⁶Wa wəsə nya kwele yɛ ghɛa Shala le yɛ shala tseŋwə wa? Kwa nza ŋkɛ ma gheɓəmə ne, nahe gheɓəmə kenza kaghɛa Shala teghweme, ma ke Shala le ghəa ŋkɛ: «Katenza 'ya ba'a katedzeghwa 'ya hwa hɛ. Katenza 'ya kaShala ta nci ba'a katenza hɛ kambelia ɗa.»

¹⁷Vatse gɛ ma ke Mahwətə: «Shave ŋayɛ mə hwa mbelia shɛhɛ, nehemte mə geva le hɛ. Kwaɗema wəsə nya wale wale yɛ ma. Ma tsagha ne, katekemaneve ŋayɛ 'ya.»

¹⁸Ma ke Mahwətə nde berete ɓiyitsa: «Katenza 'ya kayiteyɛa ŋayɛ, katenza yɛ kaŋwale tezhili ba'a kaŋwalea kwɛa ɗa.»