Read KapsikiDC 2 Ka Korɛnte 8 Bible Online

2 Ka Korɛnte 8 - KapsikiDC bible

2 Ka Korɛnte 8

¹Ka kesaka ma, kaɗe n'yɛ kancɛ ŋayɛ slene nya menete Shala le zlaɓa ta ŋkɛ mbe Jikə ta ka Kriste nya mbe Masɛdowane.

²Yaka nya sahwe hɛ kwele kwele nde dzeghete berete ta nci yitea yɛ ghena ta Shala, ama kwele kwele se hɛ kazlama. Vatse tsenete wəshi hɛ kwele kwele ya kwela nza hɛ kaka titikwə.

³'Ya nde negha fete yitea hɛ, yipə yipə le berete ta nci kemanakɛ ŋkwa hɛ, za ma ke berete ta nci menete hɛ laka ɗe.

⁴Ghenci le ghəa nci ka se kasəkwə n'yɛ kwele kwele kezha kemane mbelia Shala nyi te hɛɗia Zhəwdɛ.

⁵Za ma ke nya zəzəte ghen'yɛ ndeke nda ghəa nci hɛ ke Nde sleke ŋkwa kaba ba'a ke ghen'yɛ kala nya ɗete Shala.

⁶Vatse se n'yɛ kageze nda ke Tite yitea lə ŋkɛ sha gheyɛ kakeɗaŋe slene nya ganyɛ nya ghate ŋkɛ.

⁷Nahe pɛtɛa wəshi kenza va gheyɛ: yɛ, geze ghena megela, ɗepe wəsə, hwepe ghə ba'a ɗe ŋkwa nya feɗeghete n'yɛ mbe gheyɛ. Tsagha gɛ, kaɗe n'yɛ kezha ncɛte wəshi nyi va gheyɛ yɛ laka vele perə.

⁸Kenza le berete geze ŋayɛ 'ya we, ama laka ncɛ ŋayɛ hwepe ghə ta kweci mbeli ne, nahe 'ya kendeke ŋayɛ və yitea ncɛ ɗe ta ŋayɛ yɛ.

⁹Nahe yɛ keɗepe vele nya vele Nde sleke ɓəmə Yɛsə Kriste kwele kwele, kamcɛlə se ŋkɛ, pa ŋkɛ zhɛrete ghəa ŋkɛ kande titikwə kezha gheyɛ, kezha zhɛre ŋayɛ kaka mcɛlə laka titikwəa ŋkɛ.

¹⁰Wəsə nya zəzə 'ya te slenea shɛ yageze ŋayɛ 'ya, ndeɗe ma keɗaŋete yɛ, va nya nza ŋkɛ gheyɛ ka ghate kamene vatamɗa. Kenza deke yipə ta ŋkɛ kadzawa we, ama gheyɛ ka tarete mene ta ŋkɛ mpelɛa.

¹¹Tsetsenya tse ne, kiɗimte mə slenea shɛ. Mene mə kala nya tarete yɛ, yipə yipə le berete ta ŋayɛ.

¹²Ma kwa ve nda wəsə na ke wəndə le wənə kwetɛŋe ne, wəsə nya keleke na yazlama wəndəa shɛ te, kaɓela nya keɗema va gha ŋkɛ we.

¹³Kegezete 'ya kezha nza yɛ kaka titikwə va nya kemane kweci yɛ mbeli we, ama kaɗe 'ya kanza yɛ yipə yipə le hɛ.

¹⁴Ma tsetsenya va nya nza wəshi va gheyɛ ne, kemanakɛ mə mbeli nyi ɗema wəshi va hɛ. Ma kenza titikwə te gheyɛ te kwete hɛ, vəa ŋkwa nya nza wəshi va hɛ ne, katekemane ŋayɛ hɛ perə. Kala nya teyipə geva mbeli.

¹⁵Kwa nza ŋkɛ ma ke Ghena ta Shala: «Ma wəndə nya ketsenete wəshi kwele kwele ne, kenza hɛ kewəba ve we. Ma nya kedewə tsenete wəshi ne, keshaŋe ŋkɛ va kwete wəsə we.»

¹⁶Ŋ'wese ke ghen'yɛ sha Shala kwa ndeke nda hwepe ghə ŋkɛ ke Tite kala ghen'yɛ kezha kemane ŋayɛ.

¹⁷Nahe ŋkɛ keyɛhwe wəsə nya gezete nda n'yɛ. Za ma hwepete ghəa ŋkɛ ɓiyitsa, gheŋkɛ le ghəa ŋkɛ nde zəzəte kalə sha gheyɛ.

¹⁸Nahe n'yɛ keghwenakɛ kwete wəza meyɛ ɓəmə yite, nya tsahe pɛtɛa yɛ Jikə ta ka Kriste yitea Ghena kwatenca nya ganyɛ nya zlape ŋkɛ.

¹⁹Ɓiyitsa ne, nahe Jikə ta ka Kriste kentave ŋkɛ yitea beghe n'yɛ mbe dzeghwa nya temene ghen'yɛ kezha slene ta tsene wəshi, mbe slene ta n'yɛ nya yitea ncɛ zləvəa Nde sleke ŋkwa ba'a ɗe ta n'yɛ yitea kemane kweci mbeli.

²⁰Kaɗe n'yɛ kaya ghəa n'yɛ kezha ɗema mbeli kave n'yɛ fete te slene nya mene ghen'yɛ le cɛdɛ nya kwele kwele nya.

²¹Deke kwa kema ta Nde sleke ŋkwa ɗe n'yɛ kamene wəshi ganji we, ama kwa kema ta mbeli perə.

²²Nahe n'yɛ keghwenakɛ kwete wəza meyɛ ɓəmə nya ɗepe yɛ zlaɓe le hɛ. Nahe n'yɛ kedzeghakɛ hwepe ghə ta ŋkɛ kwele kwele zhigə. Ma tsetsenya gɛ, za ma hwepe ghə ŋkɛ yitea slene va nya vate ghə te gheyɛ.

²³Ma Tite ne, gheŋkɛ nde beghe ɗa keveci keveci, jikə mene slene 'ya le ghen'yɛ yitea gheyɛ. Ma kweci ka kesaka ma nyi yite ne, Jikə ta ka Kriste nde ghwenakɛ hɛ, kezha zləvəa Kriste.

²⁴Ncɛte nda mə ɗe ta ŋayɛ ke hɛ, yitea ɗepe kweci Jikə ta ka Kriste fəyitekeghə kaganda ya va n'yɛ kezha nza fare fare te gheyɛ.