Read KapsikiDC 2 Ka Korɛnte 9 Bible Online

2 Ka Korɛnte 9 - KapsikiDC bible

2 Ka Korɛnte 9

¹Kaleɓe ghəa ɗa 'ya karafe ŋayɛ ghena te ghəa kemane ke mbelia Shala nyi mbe Zhəwdɛ we.

²Nahe 'ya keɗepe ɗe ta ŋayɛ. Nahe 'ya ketsahekɛ ŋayɛ kwa kema ta ka Masɛdowane vecagha, ma 'ya sha hɛ: «Nahe ka kesaka ma nyi mbe Akay kehite geva se mɛa vatamɗa.» Nahe hwepe ghə ta ŋayɛ kefeɗeghete mbeli kwele kwele hwa hɛ.

³'Ya kaghwene ŋayɛ ka kesaka ma yitea ɗema tsahe nya tsahekɛ ŋayɛ ghen'yɛ kanza gəmə. Kaɗe 'ya kezha hite geva yɛ fate fate, kala nya gezete 'ya.

⁴Ma kelə ka Masɛdowane le 'ya ba'a kesləyi ŋayɛ hɛ kaɗema yɛ kehite geva ne, kahawe tenza ghə nya vate n'yɛ te gheyɛ te ghen'yɛ, tsagha te gheyɛ perə.

⁵Vatse səkwəve ka kesaka ma 'ya yitea lə hɛ sha gheyɛ mpelɛa ke 'ya kezha newe ghweme te wəshi nyi meɗeyi yɛ. Tsagha ne, wəshi kwele kwele yatetsehe yɛ, kaɗema kala wəsə berete.

⁶Zəzəte mə ghena nya: ma wəndə nya ketsawete wəsə ɓɛhwɛ ne, ɓɛhwɛ tekemave ŋkɛ te wəve. Ma nya ketsawete kwele kwele ne, kwele kwele tekemave ŋkɛ.

⁷Pa yayata wəndə vele wəsə kala nya zəzəte ŋkɛ, kaɗema le nehwene kwa ntsə keɗema kala wəsə berete. Kwa nza ŋkɛ wəndə nya kevele wəsə le zlama yaɗe Shala.

⁸Berete ya va Shala kezha ve ŋayɛ pɛtɛa mama ta wəshi ganji. Tsagha ne, kete tenza yɛ va pɛtɛa wəshi keveci keveci, katekemane ŋkwa yɛ le wəshi nyi ketene.

⁹Kwa nza ŋkɛ ma ke Ghena ta Shala: «Kaɗa wəshi ŋkɛ kwele kwele ke ka titikwəa kɛfi, kaghala ghala tenza ganyɛa ŋkɛ.»

¹⁰Shala nde ve nda felehwe ta wəsə ke wəndə yitea tsawe ba'a ɗafa nya zeme wəndə. Gheŋkɛ nde ve ŋayɛ felehwe ta pɛtɛa wəshi nyi ɗe yɛ katsawe, gheŋkɛ nde tepese hɛ, kezha kele ya ta tiɗiɗia ŋayɛ kwele kwele.

¹¹Kateve ŋayɛ ŋkɛ kaka mcɛlə laka wəshi nyi ndeke ŋayɛ ŋkɛ, kezha kemanakɛ mbelia Shala. Tsagha ne, kwele kwele mbeli nyi ketetsa nda ŋ'wese ke Shala kezha wəshi nyi tsehete nda nyi yɛ ke hɛ.

¹²Kwa nza ŋkɛ ma wəshi nyi tsehete yɛ ne, deke mbelia Shala yatekemane hɛ we, ama kwele kwele tetsa nda hana mbeli ke Shala kezha wəshia shɛhɛ perə.

¹³Kemane ta ŋayɛ nde tencɛ nda mehele ta ŋayɛ ke hɛ. Katetsahe Shala hɛ, va nya yɛte nda fete yɛ ke Ghena kwatenca nya ganyɛ ta Kriste, va nya neheve wəshia ŋayɛ yɛ le hɛ ba'a kweci mbeli pɛtɛ.

¹⁴Səkwə ghə ta nci kezha gheyɛ nde tencɛ ŋayɛ ɗe nya ɗe ŋayɛ hɛ kwele kwele, va nya nza ŋkɛ kwele kwele ncɛte ŋayɛ zlaɓa ta ŋkɛ Shala.

¹⁵Hana ke gheɓəmə sha Shala yitea wəsə nya wəba nya ndeke ɓəmə ŋkɛ.