Read KapsikiDC Ka Galate 1 Bible Online

Ka Galate 1 - KapsikiDC bible

Ka Galate 1

¹Se va Pol, nde ghwene ta Yɛsə Kriste, kaɗema laka mbeli, ya laka wəndə ŋelɛ, ama laka Yɛsə Kriste ba'a Shala Yita nya kekelakame ŋkɛ kwa kwele le mpi.

²Pɛtɛa ka kesaka ma nyi teke kejikəte geva le 'ya kezha njiŋwe ŋayɛ, gheyɛ Jikə ta ka Kriste nyi mbe Galate.

³Pa Shala Yiteyɛ ɓəmə ba'a Nde sleke ɓəmə Yɛsə Kriste ndeke ŋayɛ zlaɓa ba'a kwelɛŋe.

⁴Nahe Kriste kesərəakɛ ghəa ŋkɛ kezha mbele ɓəmə shave mbe jaɗafa ta ɓəmə. Nahe ŋkɛ kezləgwəke ɓəmə va hɛɗi nya ndiremi nya, laka ɗe ta Shala, Yiteyɛ ɓəmə.

⁵Tsahe ɓəmə Shala kaghala ghala! Amɛn.

⁶Hake 'ya va nya zhɛrave nda wəmbə yɛ kahe kahe ke Shala nya kehekakɛ ŋayɛ laka zlaɓa ta Yɛsə Kriste kezha zele kwete Ghena kwatenca nya ganyɛ.

⁷Kaganda ne, kwete Ghena kwatenca nya ganyɛ shɛ we. Deke mbeli nyi taze mehele ta ŋayɛ ba'a nyi keɗe kazhɛremte Ghena kwatenca nya ganyɛ ta Kriste ya shɛ.

⁸Ama kese kwete wəndə, ya ghen'yɛ, ya nde ghwene ta Shala nya kesawa pelɛ ghweme kazlape ŋayɛ kwete Ghena kwatenca nya ganyɛ tekeleke ne, kebezla bezla nza wəndəa shɛ.

⁹Nahe ghen'yɛ kegezete ŋayɛ, gheŋkɛa shɛ yageze ŋayɛ 'ya zhɛkwa: ma kegezete ŋayɛ kwete Ghena kwatenca nya ganyɛ kwete wəndə tekeleke le nya kemave yɛ ne, kebezla bezla nza wəndəa shɛ.

¹⁰Kwa nza ŋkɛ tsahe ta mbeli na, na ŋa Shala yazele 'ya na? Na wəsə nya ɗe mbeli yasepa 'ya na? Ma kenza ŋkɛ wəsə nya ɗe mbeli yamene 'ya ne, nza kenza 'ya kande mene slene ta Kriste we.

¹¹Ɗepete mə, ka kesaka ma: ma Ghena kwatenca nya ganyɛ nya geze ŋayɛ nya 'ya ne, va wəndə ŋelɛ se ŋkɛ we.

¹²Se va wəndə kemave ba'a tekeve ghena shɛ 'ya we, ama Yɛsə Kriste nde ncɛte ɗa le ghəa ŋkɛ.

¹³Nahe yɛ kefate nza ta ɗa nya vəashi, kwa nza 'ya kwa hweŋkwa ta zele Shala ta ka Zhəwif. Nahe yɛ keɗepe mɛ nya se 'ya kaghweze hwa Jikə ta ka Kriste nya kaŋa Shala, kwa nza 'ya kantsə geva kabeze hɛ.

¹⁴Nahe 'ya kese kajive mbe kema mbe hweŋkwa ta zele Shala ta ka Zhəwif za ma ke ka mandalahɛ ɗa, za ma se ɗe ta ɗa ke ŋa nci yitea wəshi keshia ka shihɛ ɗa.

¹⁵Ama nahe Shala kentave ɗa kwa hwəa meyɛ ɗa 'ya ba'a kehekakɛ ɗa laka zlaɓa ta ŋkɛ kanza kande mene nda slene.

¹⁶Te kwete veci ne, pa Shala tarete kancɛ ɗa Wəzege ta ŋkɛ, kezha zlape nda ŋkɛ 'ya ke kweci hwelefefi. Kese 'ya ka'yɛwe ntsehwelea ŋkɛ va kwete wəndə we,

¹⁷kese 'ya kadzeme Zhɛrəzalɛm kezha newe ka ghwene ta Yɛsə Kriste nyi mpelɛa ma ke 'ya we, kata kata lə ɗa 'ya kadzete hɛɗia Arabi, kwa sebe ta ŋkɛ, pa 'ya zhɛneke geva kadzembe Damas.

¹⁸Kwetere wəmbəa va mahekene nda se 'ya kadzeme Zhɛrəzalɛm sha Piyɛre yitea ɗepe 'ya, hɛ meŋe mcɛfeghəmbe menete yite.

¹⁹Kebegeme 'ya le kweci ka ghwene ta Yɛsə Kriste we, deke Zhake, menəyɛa Nde sleke ŋkwa.

²⁰Ma wəsə nya rafe ŋayɛ nya 'ya ne, kaganda shɛ ŋkɛ. Kwa kema ta Shala ne, kasla tseŋwə 'ya we.

²¹Ma kwetere wəmbəa ŋkɛ ne, pa 'ya dzete hɛɗia Siri ba'a ŋa Silisi.

²²Ama keɗepe kema ta ɗa Jikə ta ka Kriste nyi mbe Zhəwdɛ we.

²³Ma ke hɛ fate va kweci mbeli: «Ma wəndə nya keghweze mɛ nya hwa gheɓəmə vəashi ne, wa nya ŋkɛ kageze ghena ta yɛ nya ntsə geva nya ŋkɛ kabeze vəashi.»

²⁴Ntake hɛ katsahe Shala tewəmbəreke 'ya.