Read KapsikiDC Ka Ɛfɛze 1 Bible Online

Ka Ɛfɛze 1 - KapsikiDC bible

Ka Ɛfɛze 1

¹Se va Pol nya kande ghwene ta Yɛsə Kriste laka ɗe ta Shala. Ke mbeli nyi kaŋa Shala mbe Ɛfɛze ba'a nyi kenza dɛŋe dɛŋe mbe jikə ghə le Yɛsə Kriste.

²Pa Shala, Yiteyɛ ɓəmə ba'a Nde sleke ŋkwa Yɛsə Kriste wəpikɛ ŋayɛ ba'a ndeke ŋayɛ kwelɛŋe.

³Tsahe ɓəmə Shala, Yiteyɛa Yɛsə Kriste Nde sleke ɓəmə. Nahe ŋkɛ kewəpikɛ ɓəmə mbe Kriste laka ve ɓəmə wəshi nyi kese va Sefəa ŋkɛ sawa pelɛ ghweme.

⁴Nahe ŋkɛ ketsehave ɓəmə tewə hɛɗi kenaka kapate geva kezha nza gheɓəmə kaŋa ŋkɛ laka Kriste, yitea nza gheɓəmə kambeli nyi keveyi geva kaŋa Shala ba'a nyi ɗema fete te hɛ kwa kema ta ŋkɛ mbe ɗe.

⁵Nahe Shala kezəzəte ɓəmə ghalanza kave ɓəmə kaŋwalea ŋkɛ laka Yɛsə Kriste, se te ɗe ta ŋkɛ nda menete ŋkɛ tsagha.

⁶Tsahe ɓəmə zləvəa ŋkɛ kezha zlaɓa ta ŋkɛ nya kwele kwele le gheɓəmə laka Wəzege ta ŋkɛ nya ɗe ŋkɛ.

⁷Laka mimia Yɛsə ne, nahe Shala kembeɗeke ɓəmə. Laka gheŋkɛ ɓiyitsa ne, nahe Shala kekelemte jaɗafa ta ɓəmə te wənə, kala mcɛləa zlaɓa ta ŋkɛ.

⁸Nahe ŋkɛ kebehekɛ ɓəmə le ɗe ta ŋkɛ, nahe ŋkɛ kendeke ɓəmə pɛtɛa ntsehwele ba'a mehele.

⁹Nahe ŋkɛ kencɛte ɓəmə zəzə ta ŋkɛ nya tewəfərə. Ma mbe ganyɛa ŋkɛ ne, nahe ŋkɛ ketarete kamene wəsəa shɛ laka Kriste mpelɛa.

¹⁰Ma zəzə nya tetseramea shɛ Shala te keɗaŋe ta və ne, gheŋkɛ tsene pɛtɛa wəshi nyi pelɛ ghweme ba'a nyi te hɛɗi yitea hwəa wəndə nya te ghə kwetɛŋe, gheŋkɛ Kriste.

¹¹Kwa nza mə jikə le Yɛsəa shɛ ne, nahe gheɓəmə kembelete geva perə, kwa nza ŋkɛ nahe Shala ketsehave ɓəmə kala nya zəzəte ŋkɛ vəashi, gheŋkɛ nya kemene wəsə kala nya tarete ba'a ɗete ŋkɛ.

¹²Tsahe ɓəmə zləvəa ŋkɛ, gheɓəmə nyi kaka ghate ta mbeli nyi keneghete wəshi nyi kese va Kriste.

¹³Gheyɛ perə, kwa fate ghena nya kaganda yɛ ne, Ghena kwatenca nya ganyɛa shɛ nde mbelete ŋayɛ, gheyɛ nyi keyɛte Kriste. Nahe Shala kevate lamba ta ŋkɛ te gheyɛ kwa kemave Sefəa ŋkɛ yɛ kala nya meɗeyi ŋayɛ ŋkɛ.

¹⁴Sefəa Shala nde veyi ɓəmə kaganda kala wəsə kezeme ghɛ nya veyi nda Shala ke mbelia ŋkɛ nyi ketezeme ghɛa ŋkɛ, lamba shɛ nde ncɛ nza ta ɓəmə kambeli kezeme ghɛ, vəa ŋkwa nya tembele gheɓəmə fate fate. Tsahe ɓəmə zləvəa Shala.

¹⁵Ma kwa fave ghena nyi zəzə mbeli te gheyɛ 'ya, yɛ nya yɛte Nde sleke ŋkwa Yɛsə yɛ ba'a ɗe nya ɗe mbelia Shala yɛ ne,

¹⁶kaleɓe 'ya va tsa nda hana ke Shala kwa zəzə ŋayɛ 'ya hwa səkwə ghə we.

¹⁷Pa Shala ta Nde sleke ɓəmə Yɛsə Kriste, Yita nya nza zləvə te, ndeke ŋayɛ ntsehwele yitea ncɛ ŋayɛ Shala ba'a yitea ɗepe ŋkɛ yɛ ndeɗekə.

¹⁸Pa Shala shɛ pelemte ŋayɛ wənəa ŋayɛ yitea ɗepe ve ghə nya hekakɛ ŋayɛ ŋkɛ yite yɛ, tsagha mcɛləa zləvəa ŋkɛ laka wəshi ganji nyi teve ŋayɛ ŋkɛ jikə le mbelia ŋkɛ.

¹⁹Ncɛte ŋayɛ berete nya wəba kemanakɛ ɓəmə ŋkɛ le ŋkɛ, gheɓəmə mbelia Yɛsə Kriste.

²⁰Nahe ŋkɛ kencɛte ɓəmə berete ta ŋkɛ kwa kelakame Kriste ŋkɛ same kwa kwele le mpi ba'a kwa veyi ŋkɛ ŋkɛ te kwa zeme ta ŋkɛ pelɛ ghweme.

²¹Nahe Shala keveyi Kriste kwele ma ke nza te ghə, berete, mene meghe, kwele ba'a ke kwete slə nya nza mbeli kahekate deke te nya və we, ama tsagha te və nya ketese perə.

²²Nahe Shala keveyi pɛtɛa wəshi mbe dzeve ta Yɛsə Kriste, nahe keveyi Kriste te ghəa pɛtɛa wəshi, te ghəa Jikə ta ka Kriste.

²³Jikə ta ka Kristea shɛ ya kageva ta ŋkɛ. Mbe ncɛ geva Kriste darahwe rahwe, gheŋkɛ nya keviɗikɛ pɛtɛa wəshi.