Read KapsikiDC Ka Ɛfɛze 2 Bible Online

Ka Ɛfɛze 2 - KapsikiDC bible

Ka Ɛfɛze 2

¹Ma kaghate ne, kempə mpə yɛ sha Shala va beze ghena ta ŋayɛ ba'a va jaɗafa ta ŋayɛ.

²Vəa ŋkwa shɛ ne, ghena ta berete nya kesleke ŋkwa nya te hɛɗi yafa yɛ, wəndə nya te ghəa berete nyi ndiremi ndiremi nyi kenza kwelɛ yɛ ghweme le hɛɗi, 'yi'yɛghwəa shɛ nde sleke mbeli nyi keɗema kayɛ nda fete ke Shala tsetsenya.

³Tsagha se nza ta ɓəmə vəashi kala hɛ perə, kala wəndə nya kepelave nda ghəa ŋkɛ ke zəzə ta geva ta ŋkɛ se gheɓəmə. Wəshi nyi ɗe geva yamene gheɓəmə. Va nza ta ɓəmə nya kala nya ne, nahe gheɓəmə ketareyi geva kezha ɗa ɓəmə Shala kala nya teɗa kweci mbeli ŋkɛ.

⁴Ama Shala ne, kwele kwele zhɛ heli ŋkɛ yitea mbeli, kwele kwele ɗe ɓəmə ŋkɛ.

⁵Ma kwa nza gheɓəmə kala mbeli nyi kempə mpə sha Shala va jaɗafa ta ɓəmə ne, nahe ŋkɛ kezhɛname mpi mbe gheɓəmə laka Kriste. Nahe yɛ kembele tsetsenya va nya zlaɓa Shala yitea gheyɛ.

⁶Nahe Shala kekelakame ɓəmə same kwa kwele mbe jikə ta ɓəmə le Yɛsə Kriste, nahe ŋkɛ keveyi ɓəmə mbe meghea ŋkɛ pelɛ ghweme.

⁷Ma nda menete ɓəmə ganyɛa ŋkɛ Shala mbe Yɛsə Kriste kala nya ne, kezha ncɛ nda mcɛləa zlaɓa ta ŋkɛ nya wəba ke mbeli pɛtɛ mbe və nyi ketese.

⁸Kwa nza ŋkɛ Shala nde mbele ŋayɛ gəmə laka zlaɓa ta ŋkɛ kwa yɛte ŋkɛ yɛ. Kenza va slene ta ŋayɛ we, gəmə ndeke ŋayɛ Shala.

⁹Te wəshi ganji nyi mene yɛ se ŋkɛ we, yagha wəndə temene fege.

¹⁰Shala nde pate ɓəmə. Mbe nza gheɓəmə jikə le Yɛsə ne, nahe Shala kepate ɓəmə yitea mene wəshi ganji, wəshi nyi hite ŋkɛ kezha ghalanza kezha mene gheɓəmə.

¹¹Zəzəte mə nza ta ŋayɛ vəashi, kambeli nyi keɗema kaka Zhəwif yake geva yɛ. Ka slama mɓɛta heka ŋayɛ ka Zhəwif te vecia shɛ, ghenci nyi keheka ghəa nci kaka sla sla mɓɛta, va nya slamte kwete bela mbeli te geva ta nci.

¹²Zəzə mə ma vəa ŋkwa shɛ ne, Mɛsi shɛ va gheyɛ we. Hwa mbeli nyi ntave Shala yɛ we. Cakeɗake se yɛ le jikə geva nya meɗeyi nda Shala ke mbelia ŋkɛ. Vəa ŋkwa shɛ ne, nahe yɛ kenza kwake te hɛɗi kaɗema ve ghə ba'a Shala shɛ.

¹³Ama tsetsenya kwa nza yɛ jikə le Yɛsə Kriste ne, terasle yɛ yitea Shala laka mimia Kriste, gheyɛ nyi kenza cakeɗake le ghalanza.

¹⁴Kwa nza ŋkɛ Kriste le ghəa ŋkɛ ya kakwelɛŋea ɓəmə, laka mte ta ŋkɛ jikəte ka Zhəwif ŋkɛ le kweci hwelefefi, ŋzlamte ŋkwa nya keneheve hɛ ŋkɛ, geze ta ŋkɛ ɗema ntsə ta nci.

¹⁵Nahe ŋkɛ kekelemte zləvə te wəsə mahalegəa Moyize, te ghena nyi gezete ŋkɛ ba'a te wəshi nyi gezete ŋkɛ, yitea zhɛre ka Zhəwif ba'a kweci hwelefefi kahwelefe mɛnɛfɛ mbe jikə geva le. Tsagha ne, nahe ŋkɛ keveyi kwelɛŋe kwelɛ hɛ.

¹⁶Pa ŋkɛ jikəte hɛ kanya kwetɛŋe le Shala laka mte ta ŋkɛ te sheghwə kwa zleŋkwa ba'a tseɓate hɛ kanya kwetɛŋe. Ma tsagha nde ne, pa zamte ɗema ntsə.

¹⁷Kala nya se Kriste kazlape nda ghena ta kwelɛŋe ke gheyɛ kweci hwelefefi nyi kenza cakeɗake le Shala ghalanza ne, pa zlapete nda ke ka Zhəwif nyi kenza dekwe yitea Shala se te shinyɛ.

¹⁸Laka Kriste nza gheɓəmə kantsehe kwa kema ta Shala, ka Zhəwif ba'a kweci hwelefefi laka Sefəa Shala nya kwetɛŋe.

¹⁹Vatse gɛ, ma gheyɛ kweci hwelefefi ne, mba yɛ kaka se se we, kaka mentiɓə we. Ama kaka hɛɗi yɛ jikə le ka Kriste, kambelia Shala yɛ.

²⁰Gheyɛ ne, nahe yɛ keŋate geva te ŋkwa nya shihəa ŋkɛ kaka ghwene ta Yɛsə Kriste ba'a ka mɛ ŋkwa, Yɛsə le ghəa ŋkɛ ya kapelɛa megwekwe.

²¹Gheŋkɛ nde keseyi ŋkwa pɛtɛ kezha ve nda berete, yitea nza ŋkɛ kaghɛ nya keveyi geva tekeleke kaŋa Nde sleke ŋkwa.

²²Kwa nza yɛ jikə le ne, kakwete yɛ bela ta ŋkwa shɛ kezha zlaɓe le kweci mbeli kaŋkwa kenza ta Shala laka Sefəa ŋkɛ.