Read KapsikiDC Ka Kolose 1 Bible Online

Ka Kolose 1 - KapsikiDC bible

Ka Kolose 1

¹Se va Pol nya hekakɛ Shala le ɗe ta ŋkɛ, kezha nza kande ghwene ta Yɛsə Kriste ba'a se Timotɛ, wəza meyɛ ɓəmə.

²Ke gheyɛ mbelia Shala nyi mbe Kolose, gheyɛ ka kesaka ma nyi dɛŋe dɛŋe te Kriste. Pa Shala Yiteyɛ ɓəmə ndeke ŋayɛ zlaɓa ta ŋkɛ ba'a kwelɛŋea ŋkɛ.

³Katsa nda hana n'yɛ ke Shala Yiteyɛa Nde sleke ŋkwa Yɛsə Kriste, vəa ŋkwa nya səkwə ghə ghen'yɛ kezha gheyɛ.

⁴Nahe ghen'yɛ kefate yɛ nya yɛte Kriste yɛ ba'a ɗe nya ɗe pɛtɛa mbelia Shala yɛ.

⁵Ma kwa ntsehe ghena nya kaganda, Ghena kwatenca nya ganyɛ sha gheyɛ ne, nahe mbeli kegezete ŋayɛ wəshi nyi keveyi ŋayɛ geva pelɛ ghweme: Nahe yɛ ta ŋayɛ ba'a ɗe ta ŋayɛ keveyi geva te ve ghəa shɛ.

⁶Nahe Ghena kwatenca nya ganyɛ kembakete geva, kekeleke wəpi ŋkwa ta ŋkɛ kezha hɛɗi pɛtɛ, kala nya menete ŋkɛ hwa gheyɛ kwa ghate yɛ kafate, nahe yɛ kefate ghena ta zlaɓa ta Shala, nahe yɛ ketekeve nza ta ŋkɛ le kaganda ta ŋkɛ.

⁷Ɛpafras, wəndə nya kande mene slene ta Kriste kala ghen'yɛ nde tekete ŋayɛ, gheŋkɛ nde mene slene te ŋkwa n'yɛ kala wəndə nya dɛŋe dɛŋe te slene ta Kriste.

⁸Nahe ŋkɛ kegezete n'yɛ ɗe nya ndeke ŋayɛ Sefəa Shala.

⁹Vatse ɗema ghen'yɛ kasərəakɛ səkwə Shala kezha gheyɛ, ghala fate ghena ta ŋayɛ ghen'yɛ. Ka'yɛwe ghen'yɛ va Shala kezha viɗikɛ ŋayɛ ŋkɛ le ɗepe ɗe ta ŋkɛ laka ntsehwele ba'a ɗepe wəsə nya ve nda Sefəa ŋkɛ ke mbeli.

¹⁰Ma kala nya gɛ, nza mə kala nya ɗe Nde sleke ŋkwa, mene mə wəsə nya ɗe ŋkɛ. Katemene slene nyi ganji yɛ ba'a katemtsehe berete yɛ mbe ɗepe Shala.

¹¹Ka'yɛwe ghen'yɛ va Shala kamtsehe ŋayɛ berete ŋkɛ, yitea kemave berete ta ŋkɛ nya wəba yɛ, baŋe yɛ kasəwə wəshi le zereghe ghena.

¹²Tsa nda mə hana le zlama ke Shala Yita nya keveyi ŋayɛ kambeli nyi gare dzembe meghea ŋkɛ nya waŋe, kezha kele wəsə nya veyi nda Shala ke mbelia ŋkɛ.

¹³Nahe ŋkɛ kezləgwəke ɓəmə shave mbe berete ta ŋkwesle, keveyi ɓəmə mbe meghea Wəzege ta ŋkɛ nya ɗe ŋkɛ kwele kwele,

¹⁴laka gheŋkɛ mbelemte ɓəmə ŋkɛ, nahe ŋkɛ kekelemte jaɗafa ta ɓəmə te wənə.

¹⁵Kriste nde ncɛte pa ta Shala nya ɗema mbeli kanakɛ. Gheŋkɛ ya kaTezhɛa Wəzege ta Shala, nya kwele te ghəa wəshi nyi pate ŋkɛ pɛtɛ.

¹⁶Kwa nza ŋkɛ laka gheŋkɛ ne, nahe Shala kepate wəshi nyi pelɛ ghweme ba'a nyi kwake te hɛɗi, wəshi nyi nza wəndə kanakɛ ba'a nyi ɗema wəndə kanakɛ, pasla ta meghe ba'a mbelia jama nyi kesleke ŋkwa. Nahe Shala kepate wəshi pɛtɛ laka gheŋkɛ ba'a kezha gheŋkɛ.

¹⁷Te ŋwela ŋkɛ nda tepate geva wəshi pɛtɛ, laka gheŋkɛ veyi geva pɛtɛa wəshi te ŋkwa nci.

¹⁸Gheŋkɛ ya kaghəa geva, geze ta ŋkɛ, Jikə ta ka Kriste, gheŋkɛ ya kagha ta wəshi pɛtɛ, gheŋkɛ nde ghate same kwa kwele le mpi hwa mbelia kwahɛɗi kezha nza kande ghate.

¹⁹Kwa nza ŋkɛ tsagha ɗe Shala kanza ŋkɛ mbe Wəzege ta ŋkɛ fate fate.

²⁰Tsagha ɓiyitsa, nahe ŋkɛ keɗe katseɓate ŋkwa, hɛɗi ba'a ghweme le ghəa ŋkɛ. Nahe ŋkɛ kekeleke kwelɛŋe laka mimia ŋkɛ nya kesheke te sheghwə kwa zleŋkwa.

²¹Gheyɛ vəashi perə ne, cakeɗake se yɛ le Shala, kaka jaga ta ŋkɛ se yɛ va wəshi nyi ndiremi ndiremi nyi zəzə yɛ ba'a nyi mene yɛ.

²²Ama tsetsenya, laka mte nya mtenyɛ Wəzege ta ŋkɛ mbe geva ta wəndə ŋelɛ ne, nahe Shala ketseɓate ŋayɛ le gheŋkɛ, kezha nca yɛ kwa kema ta ŋkɛ kambeli nyi keveyi geva tekeleke, kaɗema beze ba'a ŋele te gheyɛ.

²³Ma kala nya ŋkɛ, nza mə kambeli nyi nza yɛ va hɛ, nza mə te shihə nyi berete berete, mba yɛ kesərəakɛ ve ghə ta ŋayɛ se te və nya fate Ghena kwatenca nya ganyɛ yɛ. Ghena shɛ yagezete nda mbeli ke yayata wəndə kwake te hɛɗi, ghena shɛ yase 'ya kageze ŋayɛ, 'ya Pol nya le ghəa ɗa kande mene nda slene perə.

²⁴Kazlama 'ya tsetsenya yitea yaka nya sa 'ya tewəmbəreke gheyɛ. 'Ya kakiɗimte wəsə nya kedewə mbe yaka ta Kriste yitea Jikə ta ka Kriste nya kageva ta ŋkɛ mbe geva ta ɗa.

²⁵Kezha gheŋkɛ nza 'ya kande mene nda slene, kala nya dapate ɗa slene ta ŋkɛ Shala te dzeve kezha geze ghena ta ŋkɛ megela,

²⁶geze ta ŋkɛ, ghena nyi tentikə se vəashi va mbeli pɛtɛ. Ama tsetsenya ne, nahe ŋkɛ kencɛte nda ke mbelia ŋkɛ.

²⁷Va nya ɗe Shala kancɛ nda ghena ta ŋkɛ nya tewəfərə, nya kamcɛləa ŋkɛ, nya nza zləvə ya te, nya kaŋa mbeli pɛtɛ ke hɛ. Wa nya ghena nya tewəfərə nya: mbe gheyɛ Kriste, gheŋkɛ nde ve ŋayɛ ve ghə kezha kemave zləvəa Shala.

²⁸Gheŋkɛ yageze nda ghen'yɛ ke yayata wəndə. Kancɛ nda ntsehwele n'yɛ ba'a kateke nda wəshi n'yɛ le ntsehwele ke yayata wəndə kezha zhɛre mbeli pɛtɛ kaka ntsə ntsə mbe Kriste.

²⁹Vatse mene slene 'ya ba'a mpa 'ya le berete ta Kriste nya kemene slene le berete mbe 'ya.