Read KapsikiDC 1 Ka Tɛsalonike 2 Bible Online

1 Ka Tɛsalonike 2 - KapsikiDC bible

1 Ka Tɛsalonike 2

¹Ka kesaka ma, nahe gheyɛ keɗepe le ghəa ŋayɛ kaɗema se ta n'yɛ sha gheyɛ kenza gəmə.

²Ma nda tese ghen'yɛ sha gheyɛ ne, nahe mbeli kesahwe n'yɛ yaka mbe meleme ta ka Filipe, nahe yɛ keɗepe perə. Ma kwa ntsehe ghen'yɛ sha gheyɛ mbe Tɛsalonike ne, kwele kwele kweci mbeli nyi keɗema ghena ta n'yɛ tagha shanda. Ama nahe Shala kemtsehete n'yɛ berete kezha geze ŋayɛ Ghena kwatenca nya ganyɛ ta ŋkɛ.

³Ma kwa ncɛ nda hweŋkwa n'yɛ ke mbeli kezha kelete ghena ta Shala hɛ ne, tseŋwə yaslave n'yɛ we. Wəsə nya ɗe ghen'yɛ kageze ne, megela ŋkɛ, wəsə kwa ndiremi hwe we. Kaghwete ŋkwa ghen'yɛ we.

⁴Deke wəshi nyi gezete n'yɛ Shala kageze yageze ghen'yɛ, va nya neweve n'yɛ ŋkɛ ndeɗekə kwa kema ta ŋkɛ, pa dapate n'yɛ Ghena kwatenca nya ganyɛa ŋkɛ nya te dzeve. Ghena nya ɗe wəndə ŋelɛ yageze ghen'yɛ we, ama nya ɗe Shala nya keɗepemte zəzə ta n'yɛ.

⁵Nahe yɛ keɗepe kaɗema n'yɛ kese kageze ghena keghwete ŋkwa, kese n'yɛ kageze ghena kezha ɗa n'yɛ wəsə yɛ we, ama Shala nde negha fete yitea ghen'yɛ.

⁶Kese n'yɛ kazele zləvə va yayata wəndə, ya va gheyɛ, ya va kweci mbeli we.

⁷Ndagwara wərə ghen'yɛ kanzate nza kambelia jama hwa gheyɛ, va nya nza ghen'yɛ kaka ghwene ta Yɛsə Kriste. Ama kese n'yɛ kamene tsagha we. Kaka gwedəa mbeli se ghen'yɛ hwa gheyɛ, kala ma nya kenewe ghweme te ŋwalea nta.

⁸Ma va nya ɗehwe ŋayɛ ghen'yɛ kwele kwele ne, nahe ghen'yɛ keɗete kageze ŋayɛ kaɗema deke Ghena kwatenca nya ganyɛ ta Shala, ama kave ŋayɛ mpia n'yɛ perə. Nahe ɗe ta n'yɛ kezha gheyɛ kenza wəbake.

⁹Ka kesaka ma, mba slene nya dzawe nya menete ghen'yɛ hwa gheyɛ viɗi le veci, yagha ghen'yɛ ka'yɛwe wəsə kezeme va kwete wəndəa ŋayɛ, vəa ŋkwa nya nza ghen'yɛ hwa gheyɛ kageze ŋayɛ Ghena kwatenca nya ganyɛ nya kese va Shala yitea ghəa ŋayɛ.

¹⁰Gheyɛ mbelia Shala, nahe yɛ keɗepe wəsə nya menete n'yɛ, nahe Shala keɗepe perə. Ma kwa se n'yɛ hwa gheyɛ ne, kambeli nyi keveyi geva tekeleke, kambeli nyi tiɗiɗi ba'a nyi ɗema ŋele te se ghen'yɛ.

¹¹Nahe yɛ keɗepe wəsə nya menete nda n'yɛ ke yayata wəndəa ŋayɛ, kala nya mene yɛ yita le ŋwalea ŋkɛ.

¹²Nahe n'yɛ kemtsehete ŋayɛ berete kehwepe ghə, nahe n'yɛ kencɛte ŋayɛ ntsehwele kezha dzeghwa tiɗiɗi kala nya ɗe Shala nya kehekakɛ ŋayɛ kezha dzembe Meghea ŋkɛ ba'a zləvəa ŋkɛ.

¹³Katsa nda ŋ'wese ghen'yɛ ke Shala zhɛkwa keveci keveci, kwa nza ŋkɛ ma kwa gezete ghena ta Shala ghen'yɛ ne, nahe yɛ kefate, nahe yɛ keyɛhwe. Kala nyagha shɛ, nahe yɛ keɗepe ghena ta Shala ŋkɛ, kaɗema kaghena ta wəndə ŋelɛ. Tiɗiɗi ghena ta ŋayɛ, vatse nda mene slene ghena ta Shala mbe gheyɛ mbeli nyi keyɛte.

¹⁴Ka kesaka ma, wəsə nya kemenete nda geva ke Jikə ta ka Kriste nya kaŋa Shala te hɛɗia Zhəwdɛ, nyi kambelia Yɛsə Kriste nde menete ŋayɛ geva perə, nahe mbelia ŋayɛ kesahwe ŋayɛ yaka kala nya ghwezakɛ mɛ ka Zhəwif hwa ka zele Yɛsə nyi mbe Zhəwdɛ.

¹⁵Ghenci ka mpəmte ka mɛ ŋkwa ta Shala vəashi, ghenci ka peslekɛ Nde sleke ŋkwa Yɛsə, ghenci ka se kaghweze mɛ hwa ghen'yɛ perə. Wəsə nya ɗema Shala yamene hɛ, kaka jaga ta mbeli pɛtɛ hɛ.

¹⁶Kaɗe hɛ kafɛa n'yɛ kegeze nda ghena ta Shala ke mbeli nyi keɗema kaka Zhəwif, kezha mbele mbelia shɛhɛ Shala. Ama tsetsenya ne, nahe hɛ kemtsehete mene jaɗafa ta nci zhɛkwa. Vatse me hwepe wənəa Shala kənəa hɛ kakwa keɗaŋe.

¹⁷Ka kesaka ma, ma kwa slə n'yɛ ghen'yɛ hwa gheyɛ ne, kwele kwele zhɛte n'yɛ mawe yitea lə kanewe ŋayɛ zhɛkwa. Geva ta n'yɛ nde slənyɛ hwa gheyɛ. Ama mba ghen'yɛ kazəzə ŋayɛ kwa wənəa n'yɛ. Kwele kwele zhigə se n'yɛ kaɗe kalə sha gheyɛ zhɛkwa kanewe ŋayɛ.

¹⁸Vatse ɗe ghen'yɛ kalə sha gheyɛ, 'ya Pol le ghəa ɗa ne, kwele kwele zhigə ɗete 'ya. Ama nahe Satan kefɛake n'yɛ.

¹⁹Va nya nza ŋkɛ gheyɛ ya kambeli nyi gwəfə ghəa n'yɛ te hɛ perə. Gheyɛ ya kambeli nyi vate ghə n'yɛ te, gheyɛ ka ve n'yɛ zlama, gheyɛ ya kawəsə kencɛ hərə ŋkwa ta n'yɛ, le gheyɛ fege ghen'yɛ kwa kema ta Nde sleke ŋkwa Yɛsə te veci nya tese ŋkɛ.

²⁰Kaganda ne, gheyɛ ya kazləvəa n'yɛ ba'a kazlama ta n'yɛ.