Read KapsikiDC Zhozəwɛ 1 Bible Online

Zhozəwɛ 1 - KapsikiDC bible

Zhozəwɛ 1

¹Ma kwa sebe ta mte ta Moyize, nde mene slene ta Mahwətə ne, ma ke Mahwətə sha Zhozəwɛ, wəzege ta Nəwn, nde kemane Moyize:

²«Nahe Moyize nde mene slene ta ɗa kemte. Tsetsenya gɛ, sate kezha jive te kema ta hələa Zhəwrdɛŋe nya, gha le mbeli pɛtɛ kadzembe hɛɗi nya ve nda 'ya ke ka Israyɛl.

³Yayata ŋkwa nya teŋkeɗe seɗa ta ŋayɛ ne, kave ŋayɛ ŋkɛ 'ya kala nya gezete nda 'ya ke Moyize.

⁴Ma ghala ta ŋayɛ ne, se vare ɓerama hwa'a yitea ghweme ta Liban nya, hwa'a kwa hələ nya wəba, hələa Efrate, pɛtɛa hɛɗia ka Hɛt ba'a hwa'a kwa ndərə nya wəba laka ŋkwa kepəkwə ta veci.

⁵Wəndə shɛ kateghereŋe kwa kema ta ŋa mbe nza ta ŋa we, kwa nza ŋkɛ ne, katenza 'ya le gha kala nya se 'ya le Moyize. Katewəfə ŋa 'ya tɛape we, katesərə ŋa 'ya tɛape we.

⁶Nza bereteke ba'a hwepete ghə, kwa nza ŋkɛ gha nde teve nda hɛɗi nya meɗeyi nda 'ya gheci gheci ke ka shihɛ nci ke mbelia shɛhɛ.

⁷Ma gɛ ne, nza bereteke ba'a hwepete ghə. Ntsəte geva kahawe va pɛtɛa wəsə mahalegə nya ndeke ŋa Moyize, nde mene slene ta ɗa. Sləma na yite ya jive te kwa zeme keɗema jive te kwa gwela, yitea jive na mbe kema te yayata ŋkwa nya telə na ma.

⁸Nza ghena nyi mbe palepa ta wəsə mahalegə nya kwa mɛa ŋa ba'a ve nda mehele veci le viɗi kezha mene slene le ghena nyi kerafete geva mbe. Ma tsagha ne, kateyipə wəshi nyi zəzə na na kadzawa ba'a katejive hɛ te kema.

⁹Zaghəma na nahe 'ya kegezete ŋa kanza bereteke ba'a kande hwepe ghə ma. Bare barema na ma, ghazlənəma na ma, kwa nza ŋkɛ ma 'ya, 'ya Shala Mahwətə ta ŋa ne, katenza 'ya le gha te yayata ŋkwa nya telə na.»

¹⁰Ma ke Zhozəwɛ gezete nda ghena ke mbelia jama nyi te ghəa mbeli:

¹¹«Kwiɗi mə kadzeyi mbe ghedəkwə, ma pe yɛ sha mbeli: Hite mə wəshi kezemea ŋayɛ, kwa nza ŋkɛ mbe hɛ mahekene ne, katejive yɛ te hələa Zhəwrdɛŋe nya kezha lə kazeme hɛɗi nya geze Shala Mahwətə ta ŋayɛ kave ŋayɛ kaŋa ŋayɛ.»

¹²Ma ke Zhozəwɛ sha mbelia Rəbɛn ba'a ŋa Gad, tsagha kwete bela ta mbelia Manasɛ:

¹³«Zəzəte mə wəsə nya gezave ŋayɛ Moyize, nde mene slene ta Mahwətə kwa nza ŋkɛ ma ke: Shala Mahwətə ta ŋayɛ kave ŋayɛ zhɛne mpi. Nahe ŋkɛ kendeke ŋayɛ hɛɗi nya laka ŋkwa kesame ta veci yitea Zhəwrdɛŋe.

¹⁴Mia ŋayɛ, ŋwalea ŋayɛ ba'a wəshi keseɗa ta ŋayɛ ne, wərə hɛ kanza te hɛɗi nya ndeke ŋayɛ Moyize te nya bela ta Zhəwrdɛŋe. Ama gheyɛ zhili kewəvəsə kewəvəsə ne, katejive yɛ te hələ le wəshi kempa te kema ta ka menəhɛ ŋayɛ, gheyɛ nyi kamegelɛashia mpa, katekemane ka menəhɛ ŋayɛ yɛ,

¹⁵pa te veci nya ndeke nda zhɛne mpi Mahwətə ke hɛ kala gheyɛ nda nza hɛ te kaŋa nci ŋkwa kala nya gezete Shala Mahwətə ta ŋayɛ. Kwa sebe ta ŋkɛ ne, katezhɛne geva yɛ kashave te sebe kanza te ŋa ŋayɛ hɛɗi nya ndeke ŋayɛ Moyize, nde mene slene ta Mahwətə nya pelɛke pelɛke ta Zhəwrdɛŋe, laka ŋkwa kepəkwə ta veci.»

¹⁶Ma ke hɛ zhɛnete nda ke Zhozəwɛ: «Katemene wəsə nya gezete n'yɛ na ghen'yɛ ba'a katelə n'yɛ te yayata ŋkwa nya ghwene n'yɛ na.

¹⁷Kateyɛ ŋa fete ghen'yɛ kala nya yɛte nda ghen'yɛ ke Moyize. Le gha Shala Mahwətə ta ŋa kaganda kala nya se ŋkɛ le Moyize.

¹⁸Ma yayata wəndə nya keɗema kafa ghena ta ŋa ba'a kaɗema kamene yayata wəsə nya geze nda na ne, katepesle ŋkɛ mbeli. Ma gha le ŋa ŋa ne, nza le hwepe ghə ba'a bereteke.»