Read KapsikiDC Zhozəwɛ 13 Bible Online

Zhozəwɛ 13 - KapsikiDC bible

Zhozəwɛ 13

¹Ma kwa halenyɛ Zhozəwɛ ne, ma ke Mahwətə shɛ: «Nahe na kehale, kwele kwele va ta ŋa, ma hɛɗi nya ketene kanehe na ne, kwele kwele ŋkɛ.

²Wa nyi hɛɗi nyi ketene nyi: Pɛtɛ hɛɗia ka Filisti, pɛtɛ ŋa ka Gɛshəwr,

³geze ta ŋkɛ, ghala se kwa hələa Shihor nya kwa ghala ta Ɛzhipte hwa'a te hɛɗia Ɛkron, laka bela kwa gwela nya ɓelahwe mbeli hwa ŋkwa nya sleke ka Kanan. Tagha nzanji mbeli nyi te ghəa ka Filisti mcɛfe, ghenci ka sleke Gaza, Asdod, Askalon, Gat ba'a Ɛkron, tsagha hɛɗia ka Ava

⁴nya laka bela kwa zeme. Nda mbeli kazehwe pɛtɛa hɛɗia Kanan, se mbe Ara, nya kaŋa ka Sidon hwa'a mbe Afɛk, kwa ghala ta ka Amor,

⁵tsagha hɛɗia Gɛbal, pɛtɛ ŋa Liban nya laka nya same veci kwa yitea Ba'al-Gad, yitea seɗa ta ghweme ta Hɛrmon hwa'a kwa Lebo-Hamat,

⁶pɛtɛa hɛɗi nya pelɛ ghweme se te Liban hwa'a va Misrefot-Mayim, pɛtɛ ŋa ka Sidon. Ma kahende geva ka Israyɛl kadzate mbe kema ne, kaŋka hɛ 'ya te kema ta nci. Ama gha ne, nehave nda bela ta hɛɗi nyi laka sla kwasheghediɗi ke ka Israyɛl kala nya gezave ŋa 'ya.

⁷Nehete nda hɛɗia shɛ tsetsenya kawəsə kezeme ghɛ ke hwelefefi mesli ba'a kwa bake ta bela ta mbelia Manasɛ.»

⁸Nahe hwelefefia Rəbɛn, Gad ba'a kwete kwa bake ta bela ta Manasɛ kekemave ŋa nci hɛɗi nyi ndeke nda Moyize, nde mene slene ta Mahwətə ke hɛ pelɛ kema ta Zhəwrdɛŋe laka same ta veci,

⁹se te Arowɛr, mɛa hələbəa hələa Arnon ba'a se te meleme nya kwa zlərə ne, pɛtɛa ŋkwa nya pelɛ ŋwela ta Mɛdeba hwa'a va Dibon kaŋa nci,

¹⁰tsagha meleme nyi kese va Sihon, meghea ka Amor, nya kemene meghe te Hɛshebon pa kwa ghala le Amon,

¹¹tsagha Gala'ad, hɛɗia ka Gɛshəwr ba'a ŋa ka Ma'akat, pɛtɛa ghweme ta Hɛrmon, pɛtɛa Bashan hwa'a mbe Salka.

¹²Ma mbe Bashan, pɛtɛa hɛɗia meghe Og nya kesleke Ashetarot ba'a Ɛdrɛyi, kwa keɗaŋe ta wəndəa ka Refay. Moyize nde hərəte ka meghea kɛfi nyi mahekenea shɛhɛ ba'a nde ŋkamte hɛ.

¹³Ama keŋkamte ka Gɛshəwr ba'a ka Ma'akat ka Israyɛl we, mba hɛ hwa hɛ le nza ta nci pa ɓeshi.

¹⁴Deke hwelefe ta Lɛvi yandeke nda ma hɛɗi mbeli kawəsə kezeme ghɛ. Ma wəshi nyi dzeghe Shala mbeli le hɛ ba'a nyi tere mbeli te ghwə kwa kema ta Shala Mahwətə ta ka Israyɛl ne, ghenci ya kaŋa nci wəsə kezeme ghɛ, kala nya gezave nda mbeli ke hɛ.

¹⁵Pa Moyize ndeke nda ŋa hwelefe ta Rəbɛn bela ta ŋkwa kala yɛ peləa nci.

¹⁶Ŋa nci ghala ta ŋkwa ne, se te Arowɛr dzeyi mɛa hələa Arnon ba'a meleme nya kwa tepe ta zlərə, tsagha ŋwela nya pelɛ ghweme nya takwa takwa yitea Mɛdeba,

¹⁷tsagha Hɛshebon ba'a pɛtɛa yɛ meleme ta ŋkɛ nyi pelɛ ŋwela nya pelɛ ghweme: Dibon, Bamot-Ba'al, Bɛt-Ba'al-Mɛyon,

¹⁸Yahas, Kedɛmot, Mɛfat,

¹⁹Kiriyatayim, Sibma, Sɛrɛt-Shahar pelɛ wəmbə nya mɛa zlərə,

²⁰Bɛt-Pɛyor, ŋkwa nyi dzawa vare Pisga ba'a Bɛt-Yeshimot.

²¹Kadzevare pɛtɛa meleme nyi pelɛ ŋwela ne, hɛɗi meghea Sihon, meghea ka Amor nya kese kasleke Hɛshebon. Nahe Moyize keɗate ŋkɛ, tsagha mbeli nyi te ghəa ka Madiyan: Ɛvi, Rɛkɛm, Səwr, Həwr ba'a Rɛba.

²²Hwa mbeli nyi mpəakawa ka Israyɛl le kafayɛ ne, Balam, nde ŋa zlera, wəzege ta Bɛyor ya shɛ.

²³Ghala ta ka Rəbɛn ne, Zhəwrdɛŋe ba'a ŋkwa nyi dzeyi yite. Nya ya kaŋa ka Rəbɛn nya bela kala nza ta peləa nci.

²⁴Nahe Moyize kendeke nda kwete bela ke pelə nyi mbe hwelefe ta Gad.

²⁵Ghala ta ŋa nci hɛɗi ne, Yazɛr, pɛtɛa meleme nyi mbe Gala'ad, kwete bela ta hɛɗia ka Amon hwa'a kwa Arowɛr, takwa yitea Raba,

²⁶se mbe Hɛshebon hwa'a kwa Ramat-Mispɛ ba'a Betonim, se te Mahanayim pa kwa hɛɗia Lo-Dabar.

²⁷Ma kwa zlərəa Zhəwrdɛŋe ne, Bɛt-Haram, Bɛt-Nimra, Səwkot ba'a Safon, bela ta hɛɗia Sihon, meghea ka Hɛshebon, tsagha Zhəwrdɛŋe ba'a hɛɗi nyi dzeyi mɛ hwa'a te mɛa ndərəa Zhɛnɛzarɛt, pelɛ kwete kema ta hələa Zhəwrdɛŋe laka ŋkwa kesame ta veci.

²⁸Nya ya kaŋa mbelia Gad ŋkwa kala peləa nci, meleme nyi jama jama ba'a nyi ɓɛhwɛ ɓɛhwɛ.

²⁹Ma hɛɗi nya ndeke nda Moyize ke kwa bake ta bela ta Manasɛ kala peləa nci ne,

³⁰Mahanayim ya kaghala ta ŋkɛ laka bela kwa zeme, geze ta ŋkɛ, pɛtɛa Bashan, pɛtɛa hɛɗia Og, meghea ka Bashan, pɛtɛa meleme nyi ɓɛhwɛ ɓɛhwɛ nyi ŋkwaŋemsə ta Yayir nya mbe Bashan,

³¹tsagha kwete bela ta Gala'ad, tsagha yɛ Ashetarot le Ɛdrɛyi, meleme ta Og, meghe nya mbe Bashan. Nya ya kaŋa Makir, Wəzege ta Manasɛ, kepelə kepelə.

³²Nya ya kaŋkwa nya ndeke nda Moyize ke hɛ pelɛ kema ta hələa Zhəwrdɛŋe ba'a laka ŋkwa kesame ta veci yitea Zhɛriko, vəa ŋkwa nya nza ŋkɛ te ŋwela ta Mowab.

³³Kenehave nda ŋkwa Moyize ke hwelefe ta Lɛvi we. Shala Mahwətə ta ka Israyɛl ya kaŋa nci ŋkwa kala nya gezete ŋkɛ.