Read KapsikiDC Zhozəwɛ 17 Bible Online

Zhozəwɛ 17 - KapsikiDC bible

Zhozəwɛ 17

¹Wa nya ŋa hwelefefia Manasɛ nya bela, kwa nza ŋkɛ nahe ŋkɛ kenza katezhɛa wəzege ta Zhozɛf. Makir ya katezhɛa Manasɛ, yitenyɛa Gala'ad nde kemave hɛɗia Gala'ad ba'a Bashan, kwa nza ŋkɛ nahe ŋkɛ kenza kawəndə kempa laka same ta veci yitea Zhəwrdɛŋe.

²Nahe mbeli kendeke nda hɛɗi ke kweci ŋwalea Manasɛ kala yɛ peləa nci, kezha ŋwalea Abiyɛzɛr, ŋa Hɛlɛk, ŋa Asriyɛl, ŋa Shɛkɛm, ŋa Hɛfɛr, ŋa Shemiday: ghenci ya kaŋwale tezhilia Manasɛ, wəzege ta Zhozɛf, kala yɛ peləa nci.

³Ma Selofad nya kenza kawəzege ta Hɛfɛr, wəzege ta Gala'ad, wəzege ta Makir, wəzege ta Manasɛ ne, kekemave ŋwale tezhili ŋkɛ we, ama ŋwalea kwɛ ya ve, wa nyi sləa nci nyi: Mala, Nowa, Hogla, Milka ba'a Tirsa.

⁴Pa hɛ se kasləyi nde dzeghe Shala Ɛlazar, Zhozəwɛ wəzege ta Nəwn ba'a mbelia jama, ma ke hɛ sha hɛ: «Nahe Mahwətə kegezave nda ke Moyize kezha ŋa n'yɛ ŋkwa mbeli hwa ka kesaka yiteyɛa yiteyɛ n'yɛ.» Pa mbeli ŋave nda ke hɛ hwa kweci hwelefefia nci kala nya gezeke Mahwətə.

⁵Pa mbeli ndeke nda ŋkwa meŋe ke mbelia Manasɛ laka sla kwasheghediɗi, kadzevare yɛ Gala'ad le Bashan nyi pelɛ kema ta Zhəwrdɛŋe.

⁶Keneheve nda hɛɗi mbeli deke ke ŋwale tezhili Manasɛ we, ama pa le ŋwalea kwɛa ŋkɛ. Ma hɛɗia Gala'ad ne, ŋa kweci ŋwale tezhilia Manasɛ ŋkɛ.

⁷Ma ghala ta hɛɗia Manasɛ ne, se mɛa Asɛr hwa'a mbe Mikmɛtat, laka ŋkwa kesame ta veci yitea Sishɛm. Kadzawa nde bela kwa zeme, laka mbeli nyi te hɛɗia Ɛn-Tapəwa.

⁸Ma hɛɗia Tapəwa ne, ŋa mbelia Manasɛ ŋkɛ, ama Tapəwa nya kameleme nya kwa ghala le Manasɛ ne, ŋa ŋwalea Ɛfrayim ŋkɛ.

⁹Kadzawa ghala shɛ laka hələa Kana nya laka bela kwa zeme. Ma meleme ta ŋkɛ nyi jama jama ne, ŋa Ɛfrayim hɛ. Ndagwara te hɛɗia Manasɛ hɛ. Kadzawa nde laka bela kwa gwela ta hələ kezha zhigə kwa ndərəa Mɛditɛranɛ.

¹⁰Ma laka bela kwa zeme ne, Ɛfrayim ya kaghala. Ma laka bela kwa gwela ne, Manasɛ. Ndərəa Mɛditɛranɛ ya kaghala ta nci nya laka ŋkwa kepəkwə ta veci. Kakwaɗe Asɛr ŋkɛ laka bela kwa gwela ba'a Isakar laka same ta veci.

¹¹Mbe ŋa Isakar ba'a ŋa Asɛr ne, nahe Manasɛ kekemave meleme bake: Bɛt-Shɛyan ba'a Iblɛyam nyi kaŋa ka Dor, tsagha kweci meleme nyi dzeyi yitea Dor, Ɛn-Dor, Ta'anak ba'a Mɛgido le mbeli nyi mbe hɛ, tsagha meleme nyi dzeyi yitea hɛ, geze ta ŋkɛ, ŋkwa nyi dzeyi yitea Dor.

¹²Ama shaŋe ŋwalea Manasɛ kaŋka ka Kanan nyi mbe melemea shɛhɛ, mba hɛ le nza te hɛɗia shɛ.

¹³Ya kwela kemave berete ka Israyɛl ne, keŋkamte hɛ hɛ we, pa hɛ zhɛrete ka Kanan shɛ kaka mavashi kemene nda slene ke hɛ.

¹⁴Ma ke ŋwalea Zhozɛf sha Zhozəwɛ: «Wa raberə nda ndeke n'yɛ bela ta hɛɗi na kwetɛŋe, ndagwara nahe Mahwətə kewəpikɛ n'yɛ ba'a keseghete n'yɛ kwele kwele wa?»

¹⁵Ma ke Zhozəwɛ sha hɛ: «Ma kenza nde mbeli nyi kwele kwele yɛ ba'a kenza nde dewə ŋayɛ ghweme ta Ɛfrayim ne, dzeme mə laka ghala ta ka Pɛrɛs ba'a ŋa ka Refay, tsəhwə mə ŋkwa mbe gamba.»

¹⁶Ma ke ŋwalea Zhozɛf: «Katenza ghwemea shɛ wərə n'yɛ we. Ɓiyitsa ne, wəmata gədəwə kwa lɛ lɛ ya va ka kanan nyi kwake kwake ba'a nyi mbe Bɛt-Shɛyan, tsagha nyi mbe meleme nyi dzeyi yitea zlərəa Zhizrɛyɛl.»

¹⁷Ma ke Zhozəwɛ sha mbelia Zhozɛf, yita ta Ɛfrayim ba'a kwa bake ta bela ta Manasɛ: «Kaganda nza yɛ kwele kwele ba'a keberete berete ŋayɛ, deke ŋkwa kwetɛŋe nde tenza va gheyɛ te hɛɗi nya we.

¹⁸Katenza pɛtɛa ŋkwa nya hwa ghweme nya bətə va yɛ wəfe kaŋa ŋayɛ. Katetsəhwə ŋkwa shɛ yɛ ba'a katenza yɛ yimə dzeme hwe. Kateŋkamte ka Kanan yɛ ya ghenci nza le wəmata gədəwə nyi kalɛ ba'a ya ghenci nza berete beretenji.»