Read KapsikiDC Zhozəwɛ 20 Bible Online

Zhozəwɛ 20 - KapsikiDC bible

Zhozəwɛ 20

¹Ma ke Mahwətə sha Zhozəwɛ:

²«Geze nda ke ŋwalea Israyɛl, ma pa na sha hɛ: Ntave mə yɛ meleme kewəfərə nyi gezete ŋayɛ 'ya laka Moyize.

³Ma yayata wəndə nya ketsave kelɛhe le wəndə ne, katehwɛ ŋkɛ kezha wəfərə mbe melemea shɛ. Tsagha ne, katembele ŋkɛ va wəndə nya keveyi geva kezha wa kelɛhea shɛ.

⁴Katehwɛ wəndə nya ketsave kelɛhe kaɗema le ɗe ta ŋkɛ kadzembe kwete meleme hwa melemea shɛhɛ, kateghereŋe ŋkɛ mɛa ŋkwa kedzembe meleme nda tegeze nda ghena ta ŋkɛ ŋkɛ ke mbelia jama nyi mbe melemea shɛ. Katekemaneve ŋkwa ŋkɛ vare hɛ mbe melemea shɛ, kateve nda ŋkwa kenza hɛ hwa hɛ.

⁵Ma kese nde wa kelɛhe ne, kateve wəndə nya ketsave kelɛhe hɛ mbe dzeve ta ŋkɛ we. Kwa nza ŋkɛ le ɗe ta ŋkɛ peslekɛ nde ghedəkwəa ŋkɛ ŋkɛ we, kenza va nya ɗema ghena ta ŋkɛ ŋkɛ we.

⁶Mbe melemea shɛ nza ŋkɛ nda tekele ŋkɛ mbeli kadzawa kema ta tsene ta mbeli kezha meha ghwə mbeli te, keɗema hwa'a te vəa mte ta nde dzeghe Shala nya wəba nya te slene vəa ŋkwa shɛ. Ma tsagha gɛ, katezhɛne geva wəndə nya ketsave kelɛhe kalə sha meleme ta ŋkɛ, slə mbe meleme nya se ŋkɛ tentikə, kadzeki ghɛa ŋkɛ.»

⁷Pa hɛ veyi meleme nyi mbe Kɛdɛsh nya mbe Galilɛ, pelɛ ghweme ta Nɛftali, Sishɛm, pelɛ ghweme ta Ɛfrayim ba'a Kiriyat-Arba nya kaHɛbron, pelɛ ghweme ta Zhəwda.

⁸Ma pelɛ kwete kema ta hələa Zhəwrdɛŋe, laka ŋkwa kesame ta veci yitea Zhɛriko ne, pa hɛ ntave Bɛsɛr, te ɓerama nya kaŋa hwelefe ta Rəbɛn, Ramot, mbe Gala'ad nya kaŋa hwelefe ta Gad ba'a Golan, mbe Bashan nya kaŋa hwelefe ta Manasɛ.

⁹Tsetse meleme nyi nteyi hɛ kezha ka pɛtɛa ka Israyɛl ba'a kezha ka mentiɓə nyi hwa hɛ le nza, kezha baŋe wəndə nya ketsave kelɛhe kaɗema le ɗe ta ŋkɛ kahwɛ kezha ntikə mbe hɛ, nda ɗema ŋkɛ kamte mbe dzeve ta nde wa kelɛhe, tewə mbeli keleke ŋkɛ kadzete kema ta tsene ta mbeli.