Read KapsikiDC Zhozəwɛ 22 Bible Online

Zhozəwɛ 22 - KapsikiDC bible

Zhozəwɛ 22

¹Tagha gɛ, pa Zhozəwɛ hekakɛ hwelefefia Rəbɛn ba'a ŋa Gad, tsagha kwete kwa bake ta bela ta Manasɛ.

²Ma ke sha hɛ: Nahe yɛ kemenete wəshi nyi gezete Moyize, nde mene slene ta Mahwətə, nahe yɛ kemenete kala nya gezete ɗa ŋkɛ.

³Mbe va nyi kejivenji kwele kwele pa ɓeshi nya ne, kesərəakɛ ka menəhɛ ŋayɛ yɛ we, nahe yɛ keyɛte fete yitea ghena ta Shala Mahwətə ta ŋayɛ.

⁴Ma tsetsenya gɛ ne, nahe Shala Mahwətə ta ŋayɛ kendeke nda zhɛne mpi ke ka menəhɛ ŋayɛ kala nya gezete nda ŋkɛ ke hɛ, zhɛne mə geva kalə sha ghɛa ŋayɛ, kadzete hɛɗi nya kaŋa ŋayɛ, nya ndeke ŋayɛ Moyize, nde mene slene ta Mahwətə pelɛ kema ta Zhəwrdɛŋe.

⁵Ama mene mə slene le ghena nyi gezete ŋayɛ Moyize, nde mene slene ta Mahwətə: ɗe mə Shala Mahwətə ta ŋayɛ, dzeghwa mə kala nya ɗe ghena ta ŋkɛ, yɛ nda mə fete ke wəshi mahalegə nyi gezeke ŋkɛ le wənə kwetɛŋe ba'a le pɛtɛa berete ta ŋayɛ.

⁶Pa Zhozəwɛ wəpikɛ hɛ ba'a gezete nda ke hɛ kalə sha ghɛa nci,

⁷ma ke sha hɛ: «Kwiɗi mə kalə sha meleme ta ŋayɛ le mcɛlə nyi fəte nyi yɛ kwele kwele: wəshi keseɗa, mze kwa tɛawetɛa ba'a mze kwa tere tere, mze kwa gheme ba'a lɛ, yɛ lekwesa kwele kwele. Neheve mə wəshi nyi fəhwe yɛ va ka ghema ta ŋayɛ le kweci hwelefefia ŋayɛ. Nahe Moyize kendeke nda ŋkwa ke kwa ghate ta hwelefe ta Manasɛ mbe Bashan, laka ŋkwa kesame ta veci yitea Zhəwrdɛŋe.» Ma ke kwete kwa bale ta bela ne, nahe Zhozəwɛ kendeke nda ŋkwa pelɛ kwete kema ta Zhəwrdɛŋe, kala kweci hwelefefi.

⁹Pa ŋwalea Rəbɛn, ŋwalea Gad ba'a kwete kwa bake ta bela ta Manasɛ zhɛneghe geva kalə sha ghɛa nci. Pa hɛ slənji yitea kweci ka Israyɛl shave mbe Silo, nya pelɛ Kanan kezha dzembe Gala'ad, hɛɗi nya kemave hɛ kaŋa nci, kala ghena nya gezete Mahwətə laka Moyize.

¹⁰Ma kwa kekave ŋkwa nya mɛa hələa Zhəwrdɛŋe nya te hɛɗia Kanan ŋwalea Rəbɛn, ŋwalea Gad ba'a kwete kwa bake ta bela ta Manasɛ ne, pa hɛ pate reghwetɛ nya wəba vare hələa Zhəwrdɛŋe.

¹¹Pa kweci ka Israyɛl fate nahe ŋwalea Rəbɛn, ŋa Gad ba'a kwete kwa bake ta bela ta Manasɛ keŋate reghwetɛ te hɛɗia Kanan, mɛa Zhəwrdɛŋe te bela ta ka Israyɛl.

¹²Ma kwa fave ka Israyɛl ne, pɛtɛ hɛ tsenete geva mbe Silo kezha lə kampa le hwelefefi nyi laka ŋkwa kesame ta veci.

¹³Pa ka Israyɛl ghwenakɛ Pinhas, wəzege ta Ɛlazar, nde dzeghe Shala kalə sha ŋwalea Rəbɛn, ŋa Gad ba'a kwete kwa bake ta bela ta Manasɛ mbe Gala'ad,

¹⁴tsagha mbeli nyi te ghə meŋe yite, wəndə nya te ghə kwetɛŋe mbe yayata hwelefe. Nahe hɛ kenza kambeli nyi te ghəa yita kwa pelə nyi mbe Israyɛl.

¹⁵Pa hɛ lə sha ŋwalea Rəbɛn, ŋa Gad ba'a kwete kwa bake ta bela ta Manasɛ mbe Gala'ad, ma ke hɛ sha hɛ:

¹⁶«Ma ke tsene ta mbelia Mahwətə pɛtɛ: Wa sla nya wəsə kwa ndiremi menete yɛ kwa kema ta Shala ta ka Israyɛl wa? Nahe yɛ keɗema Mahwətə ɓeshi kwa pate reghwetɛ yɛ, Mahwətə yaɗema yɛ fa nda ghena.

¹⁷Ma fete nya menete gheɓəmə mbe Pɛyor ne, dewə ŋayɛ ŋkɛ na? Kenaka gheɓəmə kayaɓemte geva ve kaba, ya kwela ɗate ɓəmə Mahwətə le ndiremi we.

¹⁸Gheyɛ ne, wəmbə yazhɛre nda yɛ ke Mahwətə ɓeshi? Ma kefate nda ma ghena yɛ ɓeshi ne, kənəa gheɓəmə tenza hwepe wənəa ŋkɛ hendɛ, kənəa pɛtɛa ka Israyɛl.

¹⁹Ma kenza nde wale wale hɛɗi nya kaŋa ŋayɛ ne, se ŋayɛ mə kadzete hɛɗi nya kaŋa Mahwətə, te ŋkwa nya nza cɛ lekwesa ta ŋkɛ. Kemave mə ŋa ŋayɛ hɛɗi hwa ghen'yɛ. Ama nzama yɛ kaka fama ghena laka Mahwətə ba'a laka ghen'yɛ, laka ŋa kwete reghwetɛ tekeleke le ŋa Shala Mahwətə ta ɓəmə ma.

²⁰Ma kwa menete fete Akan, wəzege ta Zɛra laka wəshi nyi ɗete tere ta nci Shala ne, ashɛ kənəa jikə ta ka Israyɛl dzeghənyɛ hwepe wənəa Shala wəka? Deke wəndə kwetɛŋe yakeseve fetea shɛ na?»

²¹Pa ŋwalea Rəbɛn, ŋwalea Gad ba'a kwete kwa bake ta bela ta Manasɛ zhɛnete nda ke mbelia jama ta ka Israyɛl, ma ke hɛ:

²²«Mahwətə ya kaShala nya wəba, kaganda ne, Shala nya kwele ŋkɛ, nahe ŋkɛ keɗepe tewəmbəreke wa menete ghen'yɛ tsetse. Kateɗepe pɛtɛa ka Israyɛl perə! Ma kenza nde le fama ghena menete ghen'yɛ kala nya kwa kema ta Mahwətə ne, mba ŋkɛ kesərə n'yɛ teghweme kavə kwele kwele!

²³Ma kenza nde kezha zhɛre nda wəmbə ke Mahwətə ŋate reghwetɛ ghen'yɛ laka dzeghe yɛ melɛ kwa tere tere, fə ta wəshi nyi kese te wəve ba'a yɛ melɛ kejikə ghə kase ne, gheŋkɛ le ghəa ŋkɛ nde teɗa n'yɛ!

²⁴Ama tsagha nde we, ma nda menete ghen'yɛ kala nya ne, kezha ɗema ŋwalea ŋayɛ kageze sha ŋwalea n'yɛ hendɛ: Wa nde jikəte ŋayɛ le Shala Mahwətə ta ka Israyɛl wa?

²⁵Nahe Mahwətə keveyi hələa Zhəwrdɛŋe kaghala kwelɛ ghen'yɛ le gheyɛ ŋwalea Rəbɛn ba'a ŋa Gad: wəsə shɛ kejikəte ŋayɛ le Mahwətə we. Tsagha ne, kateghwetete ŋwalea n'yɛ ŋwale ŋayɛ kezha ɗema hawe va Mahwətə we.

²⁶Vatse nda gezete ghen'yɛ kapa reghwetɛ nya, ama kenza kezha dzeghe melɛ kwa tere tere keɗema kweci melɛ we.

²⁷Ama kawəsə kenegha fete kwelɛ tepe ta ɓəmə, tsagha kwelɛ ŋwalea ɓəmə, kwa sebe ta ɓəmə kwa menete slene ta Shala n'yɛ megela, laka melɛ kwa tere tere, melɛ kejikə ghə ba'a kweci melɛ. Ma tsagha ne, kategeze ŋwalea ŋayɛ ke ŋa n'yɛ kaɗema hweŋkwa va hɛ kamene nda slene ke Mahwətə we.

²⁸Ma ke ghen'yɛ kwelɛ ghəa n'yɛ: Ma kegeze ɓəmə hɛ tsagha keɗema ke ŋwalea ɓəmə kageze nda hɛ ne, ma ke gheɓəmə sha zhɛne nda ke hɛ: Newema mə reghwetɛa Mahwətə nya pate ka shihɛ n'yɛ, kenza ŋkɛ kezha dzeghe melɛ we, ama kezha nza ŋkɛ kawəsə kenegha fete kwelɛ ghen'yɛ le gheyɛ.

²⁹Tɛape we, kamene nda fama ghena ghen'yɛ ke Mahwətə we, kegha ghen'yɛ kazəzə kazhɛre nda wəmbə ke Mahwətə pa ɓeshi we. Ma kwa pate reghwetɛ ghen'yɛ ne, kenza ŋkɛ kezha dzeghe melɛ we. Ma reghwetɛ kedzeghe melɛ ta n'yɛ ne, kwa kema ta ŋkwa kenza ta Mahwətə ŋkɛ.»

³⁰Ma kwa fate ghena ta ŋwalea Rəbɛn, ŋa Gad ba'a kwete kwa bake ta bela ta Manasɛ Pinhas nde dzeghe Shala, mbeli nyi te ghəa mbeli ba'a mbeli nyi te ghəa yɛ pelə ne, nahe mehele ta nci kedzawa.

³¹Ma ke Pinhas, wəzege ta Ɛlazar, nde dzeghe Shala sha ŋwalea Rəbɛn, ŋa Gad ba'a kwete kwa bake ta bela ta Manasɛ: «Tsetsenya ne, nahe ghen'yɛ keɗepe ɓeshi kwelɛ tepe ta ɓəmə Mahwətə kwa ɗema yɛ kemenete jaɗafa kwa kema ta Mahwətə, nahe yɛ kembelemte ka Israyɛl shave mbe dzeve ta ŋkɛ.»

³²Pa Pinhas, wəzege ta Ɛlazar, nde dzeghe Shala, mbelia jama ta mbelia slənji yitea hwelefe ta Rəbɛn ba'a ŋa Gad. Pa hɛ sərəakɛ hɛɗia Gala'ad kezha dzeme Kanan ba'a kezha geze nda ghena nyi kemenete geva ke ka Israyɛl nyi ketene.

³³Megela ghena shɛ sha ka Israyɛl. Pa hɛ wəpikɛ Shala ba'a sərəakɛ ha nda mpa le ka sewajɛ ke hɛɗia ŋwalea Rəbɛn ba'a ŋa Gad.

³⁴Tagha gɛ, pa ŋwalea Rəbɛn ba'a ŋwalea Gad ndeke nda slə ke reghwetɛa shɛ, ma ke hɛ: «Gheŋkɛ ya kawəsə kenegha fete kwelɛ gheɓəmə Mahwətə ya kaShala.» Pa hɛ ndeke nda slə ke reghwetɛa shɛ kande negha Fete.