Read KapsikiDC Zhozəwɛ 3 Bible Online

Zhozəwɛ 3 - KapsikiDC bible

Zhozəwɛ 3

¹Te hendɛ ta ŋkwa, cape Zhozəwɛ masheke masheke le pɛtɛa ka Israyɛl slə mbe Shitim, hwa'a hɛ kwa Zhəwrdɛŋe, hwencɛke hɛ kwagha nda tejive hɛ te hələ.

²Ma kwetere wəmbəa hɛ mahekene ne, cape mbelia jama kadzeyi mbe ghedəkwə.

³Ma ke hɛ gezete nda ke mbeli: «Ma vəa ŋkwa nya nakɛ səndəkwəa jikə geva ta Shala Mahwətə ta ŋayɛ ba'a ka dzeghe Shala nyi kaka Lɛvi nyi kekele ŋkɛ yɛ ne, kateslə yɛ te ŋkwa nya nza yɛ ba'a katetəkwə təkwə ŋkɛ yɛ.

⁴Ama kateŋa ŋkwa yɛ kwelɛ ghəa ŋayɛ le səndəkwəa shɛ gare kilemɛtre kwetɛŋe, hende nda ma geva yɛ ma. Tsagha nza yɛ kaɗepete hweŋkwa nya lə yɛ kwa, va nya ghama yɛ kase kwa hweŋkwa shɛ ghalanza yɛ.»

⁵Ma ke Zhozəwɛ sha mbeli: «Yaɓemte mə ghəa ŋayɛ megela, kwa nza ŋkɛ katemene wəsə meŋele Mahwətə hwa gheyɛ hendɛ.»

⁶Ma ke Zhozəwɛ sha ka dzeghe Shala: «Kele mə səndəkwəa jikə geva ba'a kwiɗi mə te kema ta mbeli.» Pa hɛ kelete səndəkwəa shɛ, ntəŋə hɛ te kema ta mbeli.

⁷Ma ke Mahwətə sha Zhozəwɛ: «Ma ɓeshi ne, kategha 'ya kave ŋa kawəndə nya wəba kwa ntsə ta pɛtɛa ka Israyɛl. Tagha gɛ, kateɗepe hɛ katenza 'ya le gha kala nya se 'ya le Moyize.

⁸Ma pa na sha ka dzeghe Shala nyi kekele səndəkwəa jikə geva: Ma vəa ŋkwa nya tedzawa hələa Zhəwrdɛŋe yɛ ne, ghereŋe ŋayɛ mə vare hələbəa ŋkɛ.»

⁹Ma ke Zhozəwɛ sha ka Israyɛl: «Hendeke ɗa mə geva, fa mə ghena ta Shala Mahwətə ta ŋayɛ.»

¹⁰Kwa sebe ta ŋkɛ, ma ke Zhozəwɛ: «Kateɗepe yɛ hwa gheyɛ Shala teghweme ba'a kateŋka ka Kanan, ka Hɛt, ka Pɛrɛs, ka Girgash, ka Amor ba'a ka Zhɛbəs ŋkɛ te kema ta ŋayɛ.

¹¹Wa nya mə səndəkwəa jikə geva ta Mahwətə ta hɛɗi lema nya katejive te hələa Zhəwrdɛŋe te kema ta ŋayɛ.

¹²Tsetsenya gɛ, ntave mə mbeli meŋe bakeghəmbe hwa ka Israyɛl, wəndə kwetɛŋe mbe yita.

¹³Ma hwa'a kentsehe seɗa ta ka dzeghe Shala nyi kekele səndəkwəa Mahwətə, Mahwətə ta hɛɗi lema, hwa yɛməa Zhəwrdɛŋe ne, katesla geva yɛməa Zhəwrdɛŋe mbe, lateghə ne, kateghereŋe yɛmə kala zli.»

¹⁴Pa mbeli shave mbe ghedəkwə kezha jive te Zhəwrdɛŋe. Te kema dzeghwa ka dzeghe Shala nyi kekele səndəkwəa jikə geva.

¹⁵Ma kwa ntsehe ka kekele səndəkwə kwa Zhəwrdɛŋe ba'a kwa hahwe geva seɗa ta ka kekele Səndəkwə hwa yɛmə ne, pa yɛməa Zhəwrdɛŋe samenyɛ pelɛ yɛ hələbə te pɛtɛa vəa mene wəshi seyi te wəve,

¹⁶ma yɛmə nya kehwɛ sawase ne, ghereŋe nza ŋkɛ kala zli cakeɗake lateghə, mbe Adam, meleme nya vare Sartan. Ma liyite ne, pa yɛmə nya kehwɛ dzawa laka ndərə kwa Ghwənəghwə ghereŋenyɛ. Pa mbeli jivenji tiɗiɗi le meleme Zhɛriko.

¹⁷Pa ka dzeghe Shala nyi kekele səndəkwəa jikə geva ta Mahwətə nzanji te ŋkwa kwa ghwele ghwele nya kwa hələ, nda jive ka Israyɛl le seɗa te tepe ta Zhəwrdɛŋe hwa'a te və nya jivenji mbeli pɛtɛ te hələa shɛ.