Read KapsikiDC Zhozəwɛ 5 Bible Online

Zhozəwɛ 5 - KapsikiDC bible

Zhozəwɛ 5

¹Ma kwa fate ka meghea kɛfia ka Amor nya laka ŋkwa kepəkwə ta veci ta Zhəwrdɛŋe le ŋa ka kanan pɛtɛa nyi dekwede yitea ndərə nahe Mahwətə keghwelemte yɛməa Zhəwrdɛŋe te kema ta ka Israyɛl nda jivenji hɛ ne, pa hɛ ghazlənənji, pɛtɛ helia nci kesla sla va ka Israyɛl.

²Ma vəa ŋkwa shɛ ne, ma ke Mahwətə sha Zhozəwɛ: «Menete yɛ hwa yitea pelɛ shɛ na slamte nda mɓɛta zhɛkwa ke ka Israyɛl nyi kwa sebe.»

³Pa Zhozəwɛ menete yɛ hwa yitea pelɛ ba'a pa slamte nda mɓɛta ke ka Israyɛl pelɛ wəmbə kesla mɓɛta.

⁴Wa nya wəsə nya slamte nda mɓɛta Zhozəwɛ te ke hɛ nya: nahe pɛtɛa zhili nyi keshave mbe Ɛzhipte le nyi kenza gare mpa kempənji kwa hweŋkwa kwamte te ɓerama keslamte mɓɛta. Ama nyi keya kwamte te ɓerama kwa kadzeghwa hɛ shave mbe Ɛzhipte ne, keslamte mɓɛta hɛ we.

⁶Kwa nza ŋkɛ ne, va wəfaɗemsə menete ka Israyɛl kadzeghwa kwamte te ɓerama, pa te za ta sebe te zhili nyi gare mpa kwa shave hɛ mbe Ɛzhipte, nyi kefatema ghena va Mahwətə. Ma ke Mahwətə zemete nda fela ke hɛ: «Katesərə hɛ 'ya kanewe hɛɗi nya zemete 'ya kafela kave nda ŋkɛ ke shihɛ nci, hɛɗi nya hwɛ ŋ'wa ba'a yɛməa mze te we.»

⁷Ŋwalea nci ka tedzete te ŋkwa nci. Pa Zhozəwɛ slamte nda mɓɛta ke hɛ kwa slama ŋkɛ te hɛ, kwa slamtema mbeli te hɛ kwa hweŋkwa.

⁸Ma vəa ŋkwa nya slamte nda mɓɛta mbeli ke hɛ pɛtɛ ne, mba hɛ te ŋkwa shɛ mbe ghedəkwə hwa'a te mpi ta zhia nci.

⁹Ma ke Mahwətə sha Zhozəwɛ: «Ma ɓeshi ne, nahe 'ya kekelemte hawe nya te gheyɛ shave mbe Ɛzhipte.» Vatse heka ŋkwa shɛ mbeli kaGilgal pa ɓeshi.

¹⁰Pa ka Israyɛl nzanji mbe Gilgal ba'a menete gəsəkə Pake, te kwa meŋe wəfaɗeghəmbe ta hɛa tere, hetɛhwɛɗi te ŋwela ta Zhɛriko.

¹¹Te hendɛ ta ŋkɛ ne, ntake hɛ kazeme wəshi nyi wəzate mbeli te hɛɗia Kanan, pɛaŋe nya ɗema tenjɛne hwe ba'a ghəa ha nyi kesere sere.

¹²Gatse mane te hendɛ ta ŋkwa, ghala zeme wəshi nyi te hɛɗia shɛ hɛ, mba mane shɛ kezha ka Israyɛl zhɛkwa we, wəshi nyi te hɛɗia shɛ yazehwe hɛ te va shɛ.

¹³Ma te kwete hɛ kwa nza Zhozəwɛ dekwede yitea Zhɛriko ne, pa ŋkɛ nakɛ tagha kwete za kwa kema ta ŋkɛ le kafayɛ yitea dzeve ve, tenteɗe shave mbe kwəɓə. Pa Zhozəwɛ lə shɛ, ma ke 'yɛwete ve: «Yitea ghen'yɛ na na, na yitea ka ghema ta n'yɛ na na?»

¹⁴Ma ke: «Ewə, nahe 'ya kenza kawəndə nya te ghəa ka sewajɛa Mahwətə, se ta ɗa nya tsetsenya.» Gwəɗəŋə Zhozəwɛ ntiŋə ghə mbe hɛɗi, ma ke shɛ: «Wa ghena nya geze ɗa na, 'ya nya kande mene slene ta ŋa wa?»

¹⁵Ma ke wəndə nya te ghəa ka sewajɛa Mahwətə sha Zhozəwɛ: «Seɗemte tsahwa ta ŋa mbe seɗa, kwa nza ŋkɛ ma ŋkwa nya nza nya na te ne, ŋkwa nya keveyi geva tekeleke ŋkɛ.» Tsagha shɛ Zhozəwɛ menete.