Read KapsikiDC Zhozəwɛ 6 Bible Online

Zhozəwɛ 6 - KapsikiDC bible

Zhozəwɛ 6

¹Pa mbeli ŋzlemte mɛ degha ta meleme ta Zhɛriko jaslɛ va ka Israyɛl. Wəndə shɛ kashave keɗema kadzeki we.

²Ma ke Mahwətə sha Zhozəwɛ: «Newema, 'ya kave ŋa Zhɛriko le meghe nya mbe ba'a ka katsala kɛfia ŋkɛ.

³Katentəslə melemea shɛ gheyɛ le megelɛgeshi kempa ta ŋa kwetɛŋe zhigə mbe vəghwə, kahɛ ŋkwaŋe.

⁴Mberefaŋe tenza ka dzeghe Shala te kema ta səndəkwə, yayata wəndəa nci le tereme kevɛ yitea mpa. Ma te kwa mberefaŋe ta hɛ ne, mberefaŋe zhigə ntəslə meleme yɛ, nda tevɛ tereme hɛ.

⁵Ma vəa ŋkwa nya fate vɛ ta tereme ta game hɛ kajive kajive ne, katetsa kaka mbeli kwele kwele. Tagha gɛ, ghwəpə teŋzla zli le ghəa ŋkɛ, yayata wəndə kadzeki kekema kekema.»

⁶Pa Zhozəwɛ, wəzege ta Nəwn hekakɛ ka dzeghe Shala, ma ke sha hɛ: «Kelete mə səndəkwəa jikə geva ta Mahwətə ba'a dzeghwa kweci mbelia ŋayɛ mberefaŋe te kema le tereme ta game.»

⁷Ma ke sha mbeli: «Kwiɗi mə kalə kantəslə meleme, dzeghwa wəvəsəa ka sewajɛ nyi keya ŋkwa te kema ta səndəkwəa Mahwətə.»

⁸Pa hɛ menete kala nya gezete nda Zhozəwɛ ke mbeli, ntəŋə ka dzeghe Shala mberefaŋe nyi le tereme ta game slə te kema ta səndəkwəa Mahwətə le vɛ tereme ta nci. Katəkwə təkwə hɛ səndəkwə kwa sebe.

⁹Ma wəvəsə ka sewajɛ nyi keya ŋkwa te kema ne, kadzeghwa hɛ te kema ta ka dzeghe Shala nyi kevɛ tereme, ma wəvəsə nyi kaya ŋkwa nyi kwa sebe ne, katəkwə təkwə hɛ kwa sebe. Kadzeghwa mbeli ne, le vɛ ta tereme.

¹⁰Ma ke Zhozəwɛ gezave nda ke mbeli: «Mba yɛ ketsa lewela, mba mbeli kefa mɛa wəndə, mba ghena ya kwetɛŋe kesame kwa mɛa ŋayɛ, pa te hɛ nya tegeze ŋayɛ 'ya katsa lewela, tagha gɛ, katetsa lewela yɛ.»

¹¹Pa ka dzeghe Shala ntəsləte meleme kwetɛŋe zhigə le səndəkwəa Mahwətə. Kwa sebe ta ŋkɛ, pa hɛ zhɛneke geva kadzembe ghedəkwə kezha hɛ.

¹²Pa Zhozəwɛ feɗeghe masheke masheke, pa ka dzeghe Shala kelete səndəkwəa Mahwətə zhɛkwa.

¹³Ntake ka dzeghe Shala nyi mberefaŋe nyi nza tereme ta game mberefaŋe va hɛ kadzeghwa te kema ta səndəkwə, ntəŋə hɛ yitea dzeghwa le vɛ tereme. Te kema kwete wəvəsəa ka sewajɛ kaya ŋkwa, te tepe səndəkwəa Mahwətə, kwa sebe kwete wəvəsəa ka sewajɛ kaya ŋkwa. Ma vəa ŋkwa nya dzeghwa ka sewajɛ ne, kakiɗi vɛ ta tereme we.

¹⁴Pa hɛ ntəsləte meleme kwetɛŋe zhigə te kwa bake ta hɛ. Pa hɛ zhɛneke geva kadzembe ghedəkwə, tsagha shɛ mene hɛ kahɛ ŋkwaŋe.

¹⁵Te kwa mberefaŋe ta hɛ ne, mba ŋkwa slənji hɛ kezha ntəslə meleme tsagha shɛ mberefaŋe zhigə. Deke gheŋkɛ ya kaveci nya ntəslə meleme hɛ mberefaŋe zhigə te.

¹⁶Ma te kwa mberefaŋe ta zhigə ne, ntake ka dzeghe Shala kavɛ tereme, ma ke Zhozəwɛ sha mbeli: «Tsa mə lewela kwa nza nde nahe Mahwətə kendeke ŋayɛ meleme.

¹⁷Pɛtɛ teza sebe mbeli te meleme le wəshi nyi mbe, kwa nza ŋkɛ kaŋa Mahwətə veyi geva ŋkɛ. Deke Rahab male mefətekwə nya nde tenza teghweme, mbelete mə mpia nta ba'a ŋa mbeli nyi ki ghɛa nta, kwa nza nde nahe nde kentikəakɛ mbelia ɓəmə nyi ghwenakɛ gheɓəmə.

¹⁸Ama ntsehwele mə kezha ɗema kakele wəsə nya fɛake ŋkwa Shala yite, yagha yɛ kakeleke ndiremi ba'a za kadzembe ghedəkwəa ka Israyɛl.

¹⁹Mze kwa tɛawetɛa ba'a mze kwa tere tere, wəshi nyi le mze kwa ghwə ghwə keɗema lɛ ne, kateve geva hɛ kaŋa Mahwətə ba'a katedzehwa mcɛləa Mahwətə hɛ.»

²⁰Pa ka dzeghe Shala vɛte tereme, kɛake mbeli sha lewela le berete, ghwəpə zli ŋzlanyɛ le ghəa ŋkɛ. Shilimə mbeli mbe melemea shɛ, yayata wəndə te kema ta ŋkɛ.

²¹Pɛtɛ hɛ mpəmte wəshi nyi mbe meleme, zhili ba'a mi, meha mehɛɗi ba'a ka mempɛhwetɛti, tsagha yɛ sla, timɛti ba'a kwara lɛmə.

²²Ma ke Zhozəwɛ sha mbeli nyi bake nyi kese kanewe hɛɗi: «Kwiɗi mə kalə kadzeki ghɛa male mefətekwə, fəakave mə ŋkɛ le mbeli nyi ki ghɛa nta kala nya meɗeyi nda yɛ.»

²³Pa mempɛhwetɛti nyi kese nyi kanewe hɛɗi dzeki ba'a kelakave Rahab, yite nda, meghekɛ, ka kesaka meghekɛ ba'a pɛtɛa mbeli nyi ki ghɛa nta ba'a beteyi hɛ pelɛke mɛa ghedəkwəa ka Israyɛl.

²⁴Pɛtɛ hɛ ndəmte meleme ba'a wəshi nyi mbe, deke mze kwa tɛawetɛa, mze kwa tere tere, wəshi mze kwa ghwə ghwə keɗema lɛ yafəyi hɛ hwa wəshi nyi mbe ghɛa Mahwətə.

²⁵Pa Zhozəwɛ sərəakɛ Rahab, male mefətekwə le mbelia nta pɛtɛ. Mba hwelefe ta nta hwa ka Israyɛl pa ɓeshi, va nya ntikəakɛ mbeli nyi kese kanewe hɛɗi Zhɛriko, nyi ghwenakɛ Zhozəwɛ nde.

²⁶Ma vəa ŋkwa shɛ, ma ke Zhozəwɛ zememte fela: «Kebezla bezla va Mahwətə nza wəndə nya kezhɛne kaŋate meleme ta Zhɛriko. Ma keghate shihɛ ŋkɛ yite ne, mbəhə tenza tezhɛa wəzege ta ŋkɛ, ma kemɓete gelembe ŋkɛ mɛa yɛ ŋkwa kadzeki ne, mtiwə tenza kwa keɗaŋe ta wəzege ta ŋkɛ.»

²⁷Le Zhozəwɛ se Mahwətə, kwele kwele pesleyi geva zləvəa ŋkɛ te yayata ŋkwa te hɛɗi.