Read KapsikiDC Zhozəwɛ 7 Bible Online

Zhozəwɛ 7 - KapsikiDC bible

Zhozəwɛ 7

¹Nahe ka Israyɛl kebezemte ghena dzawe laka wəshi nyi kefɛake geva: Pa Akan wəzege ta Karmi, wəzege ta Zabdi, wəzege ta Zɛra hwa hwelefe ta Zhəwda fəte kweci wəshi nyi kefɛake geva. Pa Mahwətə hwepete wənə va ka Israyɛl.

²Pa Zhozəwɛ ghwenakɛ mbeli se mbe Zhɛriko kadzeyi Ay, meleme nya cakeɗake yitea meleme Bɛt-Avɛn, laka ŋkwa kesame ta veci ŋkɛ yitea meleme ta Bɛtɛl. Ma ke: Kwiɗi mə kadzeme kanewe meleme ta Ay. Pa hɛ dzeme kanewe Ay.

³Ma ke hɛ se kagezete nda ke Zhozəwɛ: «Mba mbeli pɛtɛ kedzeme. Mbeli slibə bake keɗema slibə mahekene ka dzeme kaha nda mpa ke Ay. Mba na keleɓe mbeli, kwa nza ŋkɛ keɓɛhwɛ kempa ta ɓəmə ŋkɛ.»

⁴Pa mbeli gare slibə mahekene dzeme, ama kweracɛ hɛ te hwɛ kwa kema ta ka Ay.

⁵Pa ka Ay mpəmte mbeli mahekenemsə ŋkwaŋeghəmbe yitea hɛ, pa hɛ kekate kweci slə mɛa degha ta Ay hwa'a mbe Shɛbarim, pa hɛ mpəmte hɛ dzawa vare ghweme. Tagha gɛ, pa geva ta ka Israyɛl tanji ba'a pa hɛ denenji.

⁶Pa yɛ Zhozəwɛ le mbelia jama ta ka Israyɛl ŋkwahemte lekwesa ta nci, kərəaghe keləwə kənəa ghəa nci ba'a gwəɗəŋənji ntiŋə ghə mbe hɛɗi kwa kema ta səndəkwəa Mahwətə, pa va tɛhwɛɗi.

⁷Ma ke Zhozəwɛ: «Shala Mahwətə ta ɗa, wa raberə fəakave mbeli nyi na shave te Zhəwrdɛŋe wa? Kezha ve nda n'yɛ ke ka Amor ba'a kezha za n'yɛ na? Awema, megela ma nza ghen'yɛ pelɛ kema ta hələa Zhəwrdɛŋe.

⁸Tehwə tehwə Mahwətə, wa pe 'ya sha geze, kwa nza ŋkɛ nahe ka Israyɛl kehwɛnji te kema ta ka ghema ta nci tsetsenya wa?

⁹Ma kefate ka Kanan ba'a kweci mbeli nyi te hɛɗi nya ne, pɛtɛ tejikə geva hɛ yitea ghen'yɛ ba'a kateza sebe hɛ te ghen'yɛ te hɛɗi. Tsema temene na kezha yate sləa ŋa nya wəba nya wa?»

¹⁰Ma ke Mahwətə sha Zhozəwɛ: «sate ŋa, wa raberə negheyi ghəa ŋa na hwa hɛɗi wa?

¹¹Nahe ka Israyɛl kemenete jaɗafa. Nahe hɛ kepelemte ghena nya tsahwe 'ya le hɛ. Kaganda ne, nahe hɛ kefəte wəshi nyi fɛake hɛ 'ya yite, nahe hɛ keghərəhwe hɛ, keslate tseŋwə ba'a kebeteyi wəshia shɛhɛ hwa wəshia nci.

¹²Katezhɛne ka Israyɛl kaghereŋe kwa kema ta ka ghema ta nci we, katehwɛ hɛ kwa kema ta ka ghema ta nci. Nahe hɛ keveyi geva kezha mpə hɛ mbeli. Ma keɗema yɛ kezamte sebe te wəshi nyi fɛake ŋayɛ 'ya kefə ne, katezhɛne 'ya kanza le gheyɛ we.

¹³Sate te ŋkwa, yaɓemte mbeli wɛŋe. Ma pa na sha hɛ: Yaɓemte mə ghəa ŋayɛ kezha hendɛ, kwa nza ŋkɛ ma ke Shala Mahwətə ta Israyɛl: Katezhɛne yɛ kaghereŋe kwa kema ta ka jaga ta ŋayɛ keɗema yɛ kekelemte wəsə nya fɛake ŋayɛ 'ya yite hwa gheyɛ we.

¹⁴Hendɛ masheke ne, katehende geva yɛ kase keyita keyita, ma yita nya ncɛte Mahwətə ne, kahende geva ŋkɛ kepelə kepelə kase, ma ghɛ nya ncɛte Mahwətə, kahende geva ŋkɛ kewəndə kewəndə kase.

¹⁵Ma wəndə nya ncɛte geva wəshi nyi fɛake ŋkwa Shala yite ve ne, katetere ŋkɛ mbeli le ghwə, gheŋkɛ ba'a pɛtɛa wəshia ŋkɛ: kwa nza ŋkɛ nahe ŋkɛ kepelemte ghena nya tsahwe Mahwətə le mbeli ba'a kekeleke wəsə kwa ndiremi kadzete ka Israyɛl.»

¹⁶Masheke masheke ne, pa Zhozəwɛ sate ba'a hendeke ka Israyɛl keyita keyita. Pa yita ta Zhəwda ntave geva.

¹⁷Pa ŋkɛ hendeke yita ta Zhəwda kepelə kepelə, pa peləa Zɛra ntave geva. Pa ŋkɛ hendeke peləa Zɛra keghɛ keghɛ, pa ghɛa Zabdi ntave geva.

¹⁸Pa ŋkɛ hendeke zhili nyi ki ghɛa shɛ kewəndə kewəndə, pa Akan, wəzege ta Karmi, wəzege ta Zabdi, wəzege ta Zɛra, kwa yita ta Zhəwda ntave geva.

¹⁹Ma ke Zhozəwɛ sha Akan: «Wəzege ta ɗa, vate zləvə te Mahwətə, Shala ta ka Israyɛl, gheŋkɛ nde ve nda zləvə ke ghəa ŋkɛ. Ncɛte wəsə nya menete na, ntikəma wəsə na va 'ya ma.»

²⁰Ma ke Akan zhɛnete nda ke Zhozəwɛ: «Kaganda ne, 'ya nde menete nda fete ke Shala Mahwətə ta ka Israyɛl. Wa nya wəsə nya menete 'ya nya:

²¹Pa 'ya nakɛ karalame nya ganyɛ nya kese te hɛɗia Mɛzopotami, dəɓərəa mze kwa tɛawetɛa gwəmsə bake ba'a mze kwa tere tere gare kwa bake ta bela ta kiləwə hwa wəshia shɛhɛ. Pa 'mawe zhɛte ɗa yitea hɛ ba'a pa 'ya fəte hɛ. Kwa hɛɗi leyi hɛ 'ya mbe cɛa ɗa, kwa zeweve ta nci mze kwa tɛawetɛa.»

²²Pa Zhozəwɛ ghwenakɛ mbeli le hwɛ kalə kadzeki ghɛ. Kaganda shɛ ntikəyi hɛ ŋkɛ, le mze kwa tɛawetɛa kwayite.

²³Pa hɛ kelakame hɛ ba'a fəke nda hɛ ke Zhozəwɛ ba'a ka Israyɛl. Pa hɛ beteyi hɛ te kema ta Mahwətə.

²⁴Pa Zhozəwɛ kelete Akan, wəzege ta Zɛra le mze kwa tɛawetɛa, karalame, mze kwa tere tere nya kakwa bake ta kiləwə ba'a ŋwalea ŋkɛ, yɛ sla ta ŋkɛ, kwara lɛməa ŋkɛ, wəshi keseɗa ta ŋkɛ nyi ɓɛhwɛ ɓɛhwɛ, cɛ lekwesa ta ŋkɛ ba'a pɛtɛa wəshia ŋkɛ. Pa pɛtɛa ka Israyɛl fəghe hɛ dzawa zlərəa Akor.

²⁵Ma ke Zhozəwɛ: «Wa raberə keleke ɓəmə nya na ndiremi wa? Ɓəshi nya ne, kənəa gha teve ndiremia ŋa Mahwətə.» Tagha gɛ, ntake pɛtɛa ka Israyɛl kabeza ŋkɛ le pelɛ, tsagha mbelia ŋkɛ, pa hɛ ndəmte wəshia ŋkɛ le ghwə.

²⁶Pa hɛ tsenaghe pelɛ təɗəmə kənəa hɛ, pelɛ nyi kenza pa ɓeshi. Vatse hekate nda slə mbeli ke ŋkwa shɛ kaZlərəa Akor. Ma kwa sebe ta ŋkɛ ne, gweɗakwe hwepe wənəa Mahwətə