Read KapsikiDC Zhozəwɛ 8 Bible Online

Zhozəwɛ 8 - KapsikiDC bible

Zhozəwɛ 8

¹Ma ke Mahwətə sha Zhozəwɛ: «Ghazlənəma na ma, tama geva ta ŋa ma. Kwiɗi mə le mbeli kempa pɛtɛ kadzeme Ay. Wa nya 'ya kendeke ŋa mbe dzeve ta ŋa, meghea Ay ba'a mbelia ŋkɛ, meleme ta ŋkɛ le hɛɗia ŋkɛ.

²Kala nya menete nda na ke Zhɛriko le meghea ŋkɛ temene nda na ke Ay. Ama wərə yɛ kafə wəshi ba'a wəshi keseɗa kaŋa ŋayɛ, wəmbə wəmbə hɛ yɛ se kwa sebe ta meleme.»

³Cape Zhozəwɛ le pɛtɛa zhili kempa kadzeme Ay: Pa ŋkɛ tsehave ka meyidala kempa kaslibə mahekenemsə ba'a ghwenakɛ hɛ heviɗi.

⁴Ma ke sha hɛ: «Ntsehwele mə, ŋsleyi nda mə ghweɓe ke melemea shɛ se kwetere wəmbə. Mba yɛ kenza cakeɗake le meleme, nza ŋayɛ mə dekwede yite.

⁵Ma 'ya le mbeli nyi yitea 'ya ne, katehende nda geva ghen'yɛ ke meleme, ma keshave hɛ sha ghen'yɛ ne, katehwɛ ghen'yɛ kala nya kaghate te kema ta nci.

⁶Katekeka n'yɛ hɛ ba'a katehendemte hɛ ghen'yɛ cakeɗake le meleme. Kwa nza ŋkɛ ma ke hɛ sha tegeze: Hwɛ yahwɛ hɛ va gheɓəmə kala kwa ghate ta zhigə.

⁷Tagha gɛ, katesate yɛ te ŋkwa ŋayɛ ba'a katekele meleme yɛ. Nahe Shala Mahwətə ta ŋayɛ kendeke ŋayɛ ŋkɛ.

⁸Ma kwa kelehwe meleme yɛ ne, katendə ghwə yɛ yite kala nya gezete Mahwətə. Ntsehwele mə yitea ghena nyi gezave ŋayɛ 'ya.»

⁹Pa Zhozəwɛ ghwenakɛ hɛ, pa hɛ ŋsleyi ghweɓe. Tsene hɛ kwelɛ yɛ Bɛtɛl le Ay, laka ŋkwa kepəkwə ta veci yitea Ay. Hwa mbeli hɛ Zhozəwɛ te viɗia shɛ.

¹⁰Pa Zhozəwɛ sate masheke masheke kanewe mbeli. Cape ŋkɛ le mbelia jama ta ka Israyɛl te kema ta mbeli kadzeme Ay.

¹¹Pa pɛtɛa ka sewajɛ nyi le Zhozəwɛ dzeme ba'a hendave nda geva ke meleme. Ma kwa ntsehe hɛ yitea Ay ne, pa hɛ menete ghedəkwə laka bela kwa gwela. Zlərə ya kwelɛ hɛ le Ay.

¹²Pa Zhozəwɛ slə le mbeli gare slibə mcɛfe ba'a gezete nda ke hɛ kawəfərə kwelɛ yɛ Bɛtɛl le Ay, laka pəkwə ta veci yitea meleme.

¹³Ma kwa ntishɛte geva mbeli pɛtɛ mbe ghedəkwə nya wəba, laka bela kwa gwela ta melemea shɛ, laka bela kepəkwə ta veci kweci wəvəsəa ka ya ŋkwa ne, pa Zhozəwɛ dzawa zlərə heviɗia shɛ.

¹⁴Masheke kwa nakɛ ka Israyɛl meghea ka Ay le mbelia ŋkɛ ne, ntake ŋkɛ kawədə geva kashave le mbeli nyi mbe meleme kezha lə kampa te ŋkwa nya vecagha, laka zlərə Zhəwrdɛŋe. Keɗepe ŋkɛ nahe mbeli kehite geva yitea hwa sebe we.

¹⁵Ntake yɛ Zhozəwɛ le pɛtɛa ka Israyɛl kahwɛ te kema ta nci te ŋwela nya laka hweŋkwa ta ɓerama.

¹⁶Pɛtɛ mbeli nyi mbe meleme ta Ay kekemave ghena kezha keka hɛ. Kakeka hɛ hɛ nda hendemte geva hɛ seyi yitea meleme.

¹⁷Ketene wəndə nya keshavema mbe meleme ta Ay kezha keka ka Israyɛl we, nahe hɛ kesərəakɛ meleme kaɗema mbeli keya ŋkɛ shɛ.

¹⁸Ma ke Mahwətə sha Zhozəwɛ: «Beza megha ta ŋa kadzembe Ay kwa nza ŋkɛ nahe 'ya kendeke ŋa meleme.» Pa Zhozəwɛ bezaghe megha ta ŋkɛ kadzembe Ay.

¹⁹Pelɛhetɛme mbeli nyi te ghweɓe kahe kahe kadzembe meleme kwa nakɛ dzeve hɛ. Pa hɛ se kandəyite ghwə yite.

²⁰Walaŋe ke ka Ay ne, geɗeɗe n'yia ghwə yitea ghweme mbe meleme. Ŋkwa kembele va hɛ ya laka ma laka ma ŋkɛ we. Tewətelɛwe mbeli nyi keka nyi hɛ zhɛrete geva kampa le hɛ.

²¹Nahe Zhozəwɛ le pɛtɛa ka Israyɛl kenakɛ nahe mbeli nyi kese te ghweɓe kekelehwe meleme ba'a kadzeme n'yia ghwə nya yitea meleme yitea ghweme, pa hɛ zhɛrete geva ba'a mpəmte ka Ay.

²²Kashave kweci ka Israyɛl mbe meleme kaɗa hɛ, tene ka Ay te tepe va ka Israyɛl, pa hɛ mpəmte hɛ, kesərəakɛ wəndə hɛ we, kembele wəndə we.

²³Ma meghea ka Ay ne, le mpi keseke ŋkɛ mbeli kandeke nda ke Zhozəwɛ.

²⁴Ma kwa mpəmte ka Ay ka Israyɛl ne, pelɛke hwa gamba, te ɓerama nya se hɛ kakeka hɛ. Pɛtɛ hɛ mpəmte hɛ le nyi kwa sebe te gamba le kafayɛ, nda tezhɛne geva hɛ kampə nyi mbe meleme.

²⁵Pɛtɛa mbeli nyi kempə, nahe zhili ba'a mi kemene gare meŋe bakeghəmbe slibə mbe meleme ta Ay nyi kempə te vecia shɛ.

²⁶Kese Zhozəwɛ kakelemte dzeve nya nza megha mbe, nya sletete ŋkɛ laka meleme ta Ay nda zamte hɛ mbeli we.

²⁷Nahe ka Israyɛl kefəte kweci wəshi kala ghena nya gezave nda Mahwətə ke Zhozəwɛ, tsagha wəshi keseɗa nyi mbe melemea shɛ.

²⁸Pa Zhozəwɛ teremte Ay, sərə kakwəfi pa ɓeshi.

²⁹Pa hwepate meghea ka Ay ŋalawe te wəfe veci veci pa va tɛhwɛɗi, ma kapəkwə veci ne, pa Zhozəwɛ gezete nda ke mbeli kezha kele wəndə kemte mtea ŋkɛ kasawa, pa mbeli negheyi ŋkɛ mɛa ŋkwa kedzembe meleme ba'a tsenaghe pelɛ nyi kenza pa ɓeshi kənə.

³⁰Pa Zhozəwɛ ŋate reghwetɛa Shala Mahwətə ta ka Israyɛl pelɛ ghweme ta Ɛbal.

³¹Kala nya gezete nda Moyize, nde mene slene ta Mahwətə ke ka Israyɛl, kala nya kerafete geva mbe palepa ta wəsə mahalegəa Moyize ŋate reghwetɛa shɛ ŋkɛ: le pelɛ pate ŋkɛ, pelɛ nyi ghama mbeli katsehe hɛ le lɛ. Pa mbeli dzeghekɛ nda melɛ kwa tere tere ba'a melɛ kejikə ghə te ke Mahwətə.

³²Pa mbeli rafeyi ghena ta wəshi mahalegəa Moyize zhɛkwa te pelɛa shɛ, nyi rafete Moyize kwa kema ta ka Israyɛl.

³³Pɛtɛa ka Israyɛl, mbelia jama ta nci, mbeli nyi te ghəa nci, ka meha ghwə, tsagha ka se se nyi hwa hɛ ghereŋenji laka yayata bela ta səndəkwəa jikə geva ta Mahwətə, kwa kema ta ka dzeghe Shala nyi kaka Lɛvi nyi kekele ŋkɛ. Nahe kwete bela kenza pelɛ ghweme ta Garizim, nahe kwete kenza pelɛ ghweme ta Ɛbal kala nya gezeke Moyize, nde mene slene ta Mahwətə kezha wəpi ka Israyɛl vəashi.

³⁴Tagha gɛ, pa Zhozəwɛ jaŋgate ghena nyi mbe wəsə mahalegə, yɛ wəpi ŋkwa ba'a yɛ bezla ŋkwa kala nya kerafete geva mbe wəsə mahalegə.

³⁵Kentamte ghena ya kwetɛŋe ŋkɛ we, pɛtɛ wəshi nyi rafete Moyize, gheŋkɛ yajaŋga nda Zhozəwɛ ke ka Israyɛl, zlaɓe le mi, ŋwale ba'a ka se se nyi hwa hɛ.