Read KapsikiDC Zhozəwɛ 9 Bible Online

Zhozəwɛ 9 - KapsikiDC bible

Zhozəwɛ 9

¹Ma kwa fate hərə ŋkwa ta ka Israyɛl ka meghe nyi pelɛ kwete kema ta hələa Zhəwrdɛŋe, nyi pelɛ ghweme, nyi te hɛɗi nya kwake kwake, nyi te ŋwela nya mɛa ndərəa Mɛditɛranɛ hwa'a mbe Liban, ka Hɛt, ka Amor, ka Kanan, ka Pɛrɛs, ka Hava ba'a ka Zhɛbəs ne,

²pa hɛ tseɓate kanya kwetɛŋe kezha mpa le Zhozəwɛ ba'a ka Israyɛl.

³Pa ka Gabawon fate perə tsema tsema menete nda Zhozəwɛ ke Zhɛriko ba'a Ay.

⁴Pa hɛ menete ntsehwele ba'a zhɛrete kwete pa. Pa hɛ fəyi slibə kwara nyi kehale hale pelɛ kwara lɛməa nci ba'a slibə hweta kesheke tɛ nyi keŋkwahe ŋkwahe ba'a nyi kentsəpə ntsəpə va ntsəzlə.

⁵Ma tsahwa nyi mbe seɗa ta nci ne, tsahwa kwa hale hale keslekwe slekwe, kentsəzlə ntsəzlə, lekwesa kwa hale hale ya kənəa hɛ. Ma ɗafa nyi va hɛ kazeme kwa hweŋkwa ne, keghwele ghwele ba'a kakwətiɓə.

⁶Pa hɛ se sha Zhozəwɛ mbe ghedəkwə mbe Gilgal, ma ke hɛ shɛ ba'a sha ka Israyɛl: «Te hɛɗi nya cakeɗa se ghen'yɛ kezha 'yɛwe va gheyɛ kamene jikə geva le ghen'yɛ.»

⁷Ma ke ka Israyɛl sha hɛ: «Nda kwete dekwede gheyɛ teke yite ghen'yɛ ne, tsema mene jikə geva n'yɛ le gheyɛ wa?»

⁸Ma ke hɛ sha Zhozəwɛ: «Ka mene ŋa slene ghen'yɛ.» Ma ke Zhozəwɛ 'yɛwete va hɛ: «Ka wa yɛ wa? Tema se yɛ wa?»

⁹Ma ke hɛ zhɛnete nda: «Ka mene ŋa slene ta ŋa ghen'yɛ, cakeɗake hɛɗia n'yɛ, kwa fate sləa Shala Mahwətə ta ŋa ghen'yɛ te ghena ta wəshi nyi menete ŋkɛ pelɛ Ɛzhipte.

¹⁰Le nya menete nda ŋkɛ ke ka meghea kɛfi ka Amor nyi bake nyi, nyi pelɛ kema ta hələa Zhəwrdɛŋe: Sihon, meghea ka Hɛshebon ba'a Og, meghea ka Bashan nya kenza mbe meleme Ashetarot.

¹¹Ma ke meha zhilia n'yɛ ba'a mbeli nyi te hɛɗia n'yɛ pɛtɛ sha ghen'yɛ: ɗave mə wəshi kezeme kwa hweŋkwa, kwiɗi mə kalə kabegeme le hɛ. Ma pe yɛ sha hɛ: Nahe n'yɛ kenza kaka mene ŋayɛ slene, menete mə jikə geva le ghen'yɛ.

¹²Newema mə ɗafa ta n'yɛ, mba hɛ ghyanake nda kelete ghen'yɛ kaslə ki ghɛ kawəsə kezeme kwa hweŋkwa, kwa kelete seɗa ghen'yɛ kase sha gheyɛ, newema pɛtɛ ŋkɛ keghwele ghwele, tene ŋkɛ kakwətiɓə.

¹³Ma slibə hweta kesheke tɛa nyi ne, kamɛnɛfɛ slə ghen'yɛ le hɛ, newema mə hɛ keŋkwahe ŋkwahe. Newe mə lekwesa ta n'yɛ ba'a tsahwa ta n'yɛ, pɛtɛ hɛ kehalenji va cakeɗa ta hweŋkwa.»

¹⁴Pa ka Israyɛl kelete wəshi kezemea shɛhɛ va hɛ, ama kese hɛ ka'yɛwe va Mahwətə we.

¹⁵Pa Zhozəwɛ menete nza kwelɛŋe le hɛ, menete jikə geva nya kesərə hɛ le mpi le hɛ, pa mbelia jama zememte nda fela ke hɛ.

¹⁶Mahekene hɛ kwa sebe ta nya menete jikə geva hɛ le hɛ ne, pa ka Israyɛl ɗepete tsema tsema nza hɛ kaka ghedəkwəa nci ba'a nza hɛ hwa hɛ.

¹⁷Cape ka Israyɛl hwa'a mbe meleme nyi nza hɛ te kwa maheke ta hɛ: Gabawon, Kefira, Beyɛrot ba'a Kiriyat-Yɛyarim.

¹⁸Kempəmte hɛ ka Israyɛl va fela nya zemeyi nda mbelia jama ke hɛ laka Shala Mahwətə ta ka Israyɛl we. Ama pɛtɛ mbeli pɛtɛ kandəghwə ndəghwə va mbelia jama.

¹⁹Ama ma ke mbelia jama gezete nda ke mbelia nci: «Ghen'yɛ ka zemete nda fela ke hɛ laka Shala Mahwətə ta ka Israyɛl. Tsetsenya ne, kashɛ gheɓəmə kwaɗe hɛ we.

²⁰Wa nya tsetse temene nda gheɓəmə ke hɛ: katesərə hɛ gheɓəmə kanza teghweme yagha hwepe wənəa Mahwətə kadzeghəa gheɓəmə va fela nya zememte nda gheɓəmə ke hɛ.

²¹Pa mbelia jama gezete kezha nza hɛ teghweme.» Ama katenza hɛ kaka tsasle sheghwə ba'a kaka gə nda yɛmə ke mbeli pɛtɛ kala nya gezete mbelia jama.

²²Tagha gɛ, pa Zhozəwɛ hekakɛ hɛ, ma ke sha hɛ: «Wa raberə ghwetete n'yɛ yɛ laka geze n'yɛ cakeɗake se yɛ, nda teke yɛ le nza vare ghen'yɛ wa?

²³Ma tsetsenya gɛ, nahe yɛ kenza kebezla bezla. Wəndəa ŋayɛ shɛ katembele va nza kamava we, katetsasle sheghwə yɛ ba'a kategə yɛmə yɛ kadzembe ghɛa Shala ta ɗa.»

²⁴Ma ke hɛ zhɛnete nda ke Zhozəwɛ: «Ma ghena nyi gezete nda mbeli ke ka mene ŋa slene, nahe Mahwətə Shala ta ŋa kegezave nda ke nde mene nda slene Moyize kezha ve ŋayɛ hɛɗi nya pɛtɛ, kateza sebe yɛ te mbeli nyi te pɛtɛ te kema ta ŋayɛ. Nahe ghen'yɛ keghazlənə n'yɛ va gheyɛ kezha mpia n'yɛ, vatse menete ghen'yɛ kala nya.

²⁵Ma tsetsenya, wa nyi ghen'yɛ nyi mbe dzeve ta ŋa. Mene le ghen'yɛ kala wəsə nya nakɛ na tiɗiɗi gare mene n'yɛ.»

²⁶Tsetse menete ŋkɛ le hɛ, mbelete hɛ ŋkɛ shave mbe dzeve ta ka Israyɛl nyi keɗema kempəmte hɛ.

²⁷Pa Zhozəwɛ veyi hɛ se te vecia shɛ kezha tsasle sheghwə ba'a kezha gə yɛmə kezha mbeli pɛtɛ ba'a kezha reghwetɛa Mahwətə, te ŋkwa nya tentave ŋkɛ. Pa ɓeshi ne, slenea shɛhɛ yamene hwelefefia nci.