Read KapsikiDC 2 Tɛsalonike 1 Bible Online

2 Tɛsalonike 1 - KapsikiDC bible

2 Tɛsalonike 1

¹Se va Pol, Silas ba'a Timotɛ, ke Jikə ta ka Kriste nya kaŋa Shala Yiteyɛ ɓəmə ba'a Nde sleke ɓəmə Yɛsə Kriste nya mbe Tɛsalonike.

²Pa Shala Yita ba'a Nde sleke ŋkwa Yɛsə Kriste wəpikɛ ŋayɛ ba'a ndeke ŋayɛ kwelɛŋe.

³Ka kesaka ma, nahe ŋkɛ kehite geva kezha tsa nda ŋ'wese ghen'yɛ ke Shala keveci keveci tewəmbəreke gheyɛ, kwa nza ŋkɛ mbe mtsehe geva yɛ ta ŋayɛ kwele kwele, mbe mtsehe geva ɗe nya kwelɛ ghəa ŋayɛ kwele kwele perə.

⁴Tewəmbəreke wəsə nya kala nya fege ghen'yɛ le gheyɛ hwa Jikə ta ka Kriste pɛtɛ nyi kaŋa Shala, kwa nza ŋkɛ nahe gheyɛ kekeseve ghena ta Shala megela, mbe hwepe ghə yɛ kayɛ ghena ta Shala, ya tsema ɗema ntsə ta ŋayɛ mbeli ba'a sa ŋayɛ yaka mbeli.

⁵Ma yaka nya nza nya yɛ mbe tsetsenya ne, gheŋkɛ nde tencɛ meha ghwə ta Shala tiɗiɗi, va nya nza ŋkɛ yaka ta ŋayɛ nde teve ŋayɛ kambeli nyi wərə dzembe Meghea Shala nya sa yaka yɛ kezha gheŋkɛ.

⁶Ghəpə yite we, katemene wəsə nya tiɗiɗi Shala. Ma kala nya sahwe yaka yɛ va mbeli ne, tsagha shɛ tesa yaka hɛ va Shala perə.

⁷Ma gheyɛ mbeli nyi kesa yaka tsetsenya ne, kateve ŋayɛ zhɛne mpi Shala, tsagha ke ghen'yɛ perə. Ma wəshia shɛhɛ ne, katemene geva hɛ te veci nya tesawa Nde sleke ɓəmə Yɛsə pelɛ ghweme le ka ghwene ta ŋkɛ nyi berete berete.

⁸Katesawa Nde sleke ɓəmə Yɛsə hwa ghɛnia ghwə, katesa nda yaka ŋkɛ ke ka ɗema ghena ta Shala ba'a ka ɗema yɛ fete yitea Ghena kwatenca nya ganyɛ ta Nde sleke ɓəmə Yɛsə.

⁹Yaka nya ketedzeghəa hɛ ne, kandiremi nya te hɛ tenza ŋkɛ kaghala ghala, kwa nza ŋkɛ ndaŋe tenza hɛ ke nza te ŋkwa nya kwetɛŋe le Nde sleke ŋkwa mbe zləvəa ŋkɛ.

¹⁰Ma te vecia shɛ ne, katese ŋkɛ ba'a kateve zləvə mbelia ŋkɛ te, katetsahe mbeli nyi keyɛhwe ŋkɛ, katenza yɛ hwa hɛ perə, kwa yɛte ghena ta ŋkɛ nya gezete ŋayɛ ghen'yɛ yɛ.

¹¹Vatse səkwə Shala ghen'yɛ keveci keveci kezha gheyɛ. Kasəkwə Shala ghen'yɛ kezha hite ŋayɛ ŋkɛ kambeli nyi wərə kemave mpi kala nya hekakɛ ŋayɛ ŋkɛ yite. Mbe səkwə Shala shɛ ghen'yɛ kezha kemane ŋayɛ ŋkɛ kamene yayata ganyɛ nya mawe yɛ, ndeke ŋayɛ yɛ nya kemene slene ŋkɛ.

¹²Tsagha ne, kateve geva zləvə te sləa Nde sleke ɓəmə Yɛsə Kriste laka gheyɛ, gheŋkɛ perə ne, kateve zləvə ŋkɛ te gheyɛ. Tsetse tenza wəsə nya kese va zlaɓa ta Shala ta ɓəmə ba'a Nde sleke ŋkwa Yɛsə Kriste.