Read KapsikiDC 2 Tɛsalonike 2 Bible Online

2 Tɛsalonike 2 - KapsikiDC bible

2 Tɛsalonike 2

¹Ka kesaka ma, ma te ghəa se ta Nde sleke ɓəmə Yɛsə Kriste ba'a tsene geva ta ɓəmə yite ne, wa nya wəsə nya 'yɛwe n'yɛ va gheyɛ nya:

²pelema mehele ta ŋayɛ kabeze kahe kahe ba'a ve nda ma ghazlənə yɛ ke ghəa ŋayɛ, kegeze kwete wəndə nahe vecia Nde sleke ŋkwa kese ma. Vema ghə yɛ te ghena shɛ, ya mbeli geze kaghena nya kese va Shala, kwete ghena keɗema palepa nya kese va ghen'yɛ ŋkɛ ma.

³Pelave nda ma ghəa ŋayɛ yɛ ke kwete wəndə kaghwete ŋayɛ tɛape ma. Katese vecia shɛ kaɗema fama ghena nya wəba laka Shala kemenete geva we. Nda Nde 'yaghwa mehele nya keveyi geva kezha za kancake geva kaba.

⁴Gheŋkɛ ya kande ghema. Kateɗema yayata wəsə nya keveyi geva tekeleke ba'a nya hawe mbeli ve ŋkɛ. Katedzeghe ntishɛ ŋkɛ le ghəa ŋkɛ mbe ghɛa Shala ba'a kategeze ŋkɛ nahe ŋkɛ kenza kaShala.

⁵Kezəzəte yɛ nahe 'ya kegezete ŋayɛ ghena shɛhɛ pɛtɛ kwa nza 'ya hwa gheyɛ wəka?

⁶Nahe yɛ keɗepe wəsə nya kefɛake tsetsenya kese, ma kemenete geva vəa ŋkɛ ne, katenca geva ŋkɛ.

⁷Ya tsetsenyanyɛ ne, berete ta Nde 'yaghwa mehele nya tewəfərə nde mene slene. Nda wəndə nya kefɛake nda hweŋkwa tsetsenya kazamte geva.

⁸Tagha gɛ, katenca Nde 'yaghwa mehele nya teza sebe Nde sleke ŋkwa Yɛsə le sefə nya kesame kwa mɛa ŋkɛ ba'a nya tepesle ŋkɛ laka ɓele ta se ta ŋkɛ.

⁹Katese Nde 'yaghwa mehelea shɛ le berete ta Satan kezha mene wəshi meŋele, wəshi kencɛ wəshi ba'a wəshi nyi jama jama kezha ghwete mbeli.

¹⁰Katemene kwete ŋkɛ ntsehwele kezha ghwete mbeli nyi keteza ŋkɛ, kwa ɗema hɛ kekemaneve ɗe ta kaganda nya kenza katembelete hɛ.

¹¹Vatse ghwene nda berete keghwete ŋkwa Shala ke hɛ kezha ve nda yɛ tseŋwə ke hɛ.

¹²Ma pɛtɛa mbeli nyi keɗema kayɛ kaganda, nyi kezlama yitea wəsə kwa ndiremi ne, kateve nda fete Shala ke hɛ.

¹³Ka kesaka ma nyi ɗehwe Nde sleke ŋkwa, nahe ŋkɛ kehite geva kezha tsa nda ŋ'wese ghen'yɛ ke Shala kezha gheyɛ. Kwa nza ŋkɛ nahe Shala ketsehave ŋayɛ mpelɛa ma, kezha mbele yɛ, laka Sefəa Shala nya kezhɛre ŋayɛ kambelia ŋkɛ ba'a laka yɛ kaganda.

¹⁴Kezha wəsə nya kala nya hekakɛ ŋayɛ Shala laka Ghena kwatenca nya ganyɛ nya gezete ŋayɛ ghen'yɛ. Kaɗe ŋkɛ kezha kemave ŋa ŋayɛ yɛ bela mbe zləvəa Nde sleke ŋkwa Yɛsə Kriste.

¹⁵Ma kala nya ŋkɛ gɛ ka kesaka ma, ntsə mə geva kanza mbe Yɛsə ba'a nza dɛŋe dɛŋe te wəshi nyi tekave ŋayɛ ghen'yɛ, ya nyi gezete ghen'yɛ le mɛ, ya nyi rafete ghen'yɛ te palepa.

¹⁶Pa Nde sleke ɓəmə Yɛsə Kriste le ghəa ŋkɛ ba'a Shala Yiteyɛ ɓəmə, nya keɗehwe ɓəmə ba'a kendeke ɓəmə hwepe ghə nya kaghala ghala ba'a ve ghə nya ganyɛ laka zlaɓa ta ŋkɛ,

¹⁷gweɗakwete ŋayɛ wənə ba'a ntsəte ŋayɛ berete mbe mene ganyɛ laka wəshi nyi mene yɛ ba'a ghena nyi geze yɛ.