Read KapsikiDC 2 Tɛsalonike 3 Bible Online

2 Tɛsalonike 3 - KapsikiDC bible

2 Tɛsalonike 3

¹Ma kakwa keɗema gɛ ka kesaka ma, səkwə mə Shala kezha ghen'yɛ, yitea pesleyi geva ghena ta Nde sleke ŋkwa kahe kahe ba'a yitea nza zləvə te, kala nya menete geva ŋkɛ hwa gheyɛ.

²Səkwə mə ghə perə kezha ya n'yɛ ŋkɛ va ka mefətekwə ba'a ka 'yaghwa mehele. Kwa nza ŋkɛ ne, mbeli pɛtɛ ka yɛte Yɛsə we.

³Kanza Nde sleke ŋkwa dɛŋe dɛŋe te ghena ta ŋkɛ, katemtsehe ŋayɛ berete ŋkɛ, kaya ŋayɛ ŋkɛ va Nde ghwete ŋkwa.

⁴Kave n'yɛ gezleŋema ghə Nde sleke ŋkwa te ghəa ŋayɛ. Nahe ghen'yɛ keɗepe mbe mene wəsə nya gezete ghen'yɛ yɛ, katemene yɛ shanda.

⁵Pa Nde sleke ŋkwa zhɛrete wənəa ŋayɛ laka ɗe ta Shala ba'a laka səwə kala Kriste.

⁶Ka kesaka ma, te sləa Yɛsə Kriste Nde sleke ɓəmə geze ŋayɛ ghena ghen'yɛ: hende nda ma geva yɛ ke ka kesaka ma nyi kaka meɗəa kɛfi ba'a nyi keɗema kafa ghena nyi gezete ŋayɛ ghen'yɛ ma.

⁷Nahe yɛ keɗepe tsema tsema hi yɛ kateke nza ta n'yɛ le ghəa ŋayɛ. Kese n'yɛ kanza kaka meɗəa kɛfi hwa gheyɛ we.

⁸Kese ghen'yɛ kasəkwə ɗafa va kwete wəndəa ŋayɛ we. Ama mtiwə ghen'yɛ va slene viɗi le veci, yagha ghen'yɛ kasahwe nda yaka ke wəndə laka wəsə kezeme ta n'yɛ.

⁹Ma nda menete slene ghen'yɛ kala nya ne, va nya ɗema hweŋkwa va ghen'yɛ kakele wəsə nya kemane n'yɛ yɛ le we, ama va nya ɗe ghen'yɛ kancɛ ŋayɛ hweŋkwa nya hi yɛ kazele.

¹⁰Ma vəa ŋkwa nya se ghen'yɛ hwa gheyɛ ne, ma ke ghen'yɛ gezete ŋayɛ: «Ma keɗema wəndə kamene slene ne, mba ŋkɛ kezeme wəsə kezeme perə.»

¹¹Ma nda rafete ŋayɛ ghena nyi ghen'yɛ ne, va nya fate n'yɛ ka meɗəa kɛfi ya hwa gheyɛ, kamene slene hɛ we, ama ghena ta kweci mbeli yadzehwe hɛ.

¹²Ke mbeli nyi kala nyighɛ ne, ma ke ghen'yɛ sha geze ba'a ncɛ nda ntsehwele ke hɛ te sləa Nde sleke ŋkwa Yɛsə Kriste: mene slene hɛ keveci keveci kezha kemave wəsə kezeme ta nci.

¹³Ma gheyɛ gɛ ka kesaka ma, leɓema yɛ va mene ganyɛ ma.

¹⁴Ma keɗema kwete wəndə kahawe va ghena nya gezete ghen'yɛ te palepa nya ne, neweve mə ŋkɛ ndeɗekə, jikəma geva yɛ le kezha zhɛ nda hawe ma.

¹⁵Mene nda ma yɛ kala nde jaga ma, ama ncɛ nda mə ntsehwele kala nde Kriste.

¹⁶Pa Nde sleke ŋkwa nya keve nda kwelɛŋe ke mbeli ndeke ŋayɛ kwelɛŋe keveci keveci ba'a laka yayata hweŋkwa. Pa Nde sleke ŋkwa nza le gheyɛ pɛtɛ.

¹⁷'Ya Pol le ghəa ɗa nde rafete ŋayɛ palepa nya le dzeve ta ɗa kezha njiŋwe ŋayɛ. Nya ya kawəsə nya kencɛ pɛtɛa yɛ palepa ta ɗa: gheŋkɛ ya karafe wəsə ta ɗa.

¹⁸Pa zlaɓa ta Nde sleke ɓəmə Yɛsə Kriste nza le gheyɛ pɛtɛ.