Read KapsikiDC 1 Timotɛ 3 Bible Online

1 Timotɛ 3 - KapsikiDC bible

1 Timotɛ 3

¹Wa nya ghena nya kaganda nya: ma keɗe wəndə kanza kawəndə nya te ghəa Jikə ta ka Kriste ne, slene ganyɛ yaɗehwe ŋkɛ.

²Tagha gɛ, nahe ŋkɛ kehi kanza wəndə nya te ghəa Jikə ta ka Kriste kawəndə nya ɗema ŋele te, kaza nya nza male kwetɛŋe yite, kawəndə nya keɗema kaghwəyi, kawəndə nya ganyɛa mehele, kawəndə nya kehi, kawəndə nya kemane mentiɓə, kawəndə kenza katekete nda wəshi ke mbeli,

³kaɗema ŋkɛ kande sa wəshi kesa, kande mpa, ama kande gwedəa mehele, kande ɗe kwelɛŋe ba'a kande ve nda ma ghə ke cɛdɛ.

⁴Nahe ŋkɛ kehi kaɗepe nza ŋkɛ megela te ghəa ghɛa ŋkɛ ba'a kanza ŋwale nyi kehawe fate fate ve.

⁵Kwa nza ŋkɛ ma keɗepema nza wəndə te ghəa ghɛa ŋkɛ ne, tsema nza ŋkɛ kanzate nza te ghəa Jikə ta ka Kriste nya kaŋa Shala wa?

⁶Kehi ŋkɛ kanza kawəndə nya keyɛte ghena ta Shala kamɛnɛfɛ we. Ma kenza ŋkɛ tsagha ne, katekele ghəa ŋkɛ ŋkɛ ba'a kateve nda geva fete kala gətəli.

⁷Nahe ŋkɛ kehi kanza ŋkɛ kawəndə nya hawe ka ɗepema Kriste ve, yitea ɗema ŋkɛ kanza kawəndə nya ɓelama ŋkɛ mbeli ba'a yitea ɗema ŋkɛ kateɗe te keleŋa ta gətəli.

⁸Ma ka kemane ŋkwa hwa Jikə ta ka Kriste ne, pa hɛ hi kanza kambeli nyi hawe va hɛ, kwetɛŋe nza ghena va hɛ, mba hɛ kenza kaka sa tɛ kwele kwele, ya kaka sepa cɛdɛ le mbəɗəkwə,

⁹nda hɛ kandeke nda ghəa nci ke kaganda nya kencɛte geva laka yɛ mbe mehele nya ganyɛ.

¹⁰Nda mbeli kadzeghakɛ hɛ kaba. Ma keɗema ŋele te hɛ ne, wərə hɛ kamene slene ta kemane ŋkwa mbe Jikə ta ka Kriste tsagha.

¹¹Ma mia nci perə ne, kami nyi hawe mbeli va hɛ hi hɛ kanza, kaɗema kaka ŋwashɛ ŋwashɛ, kaka ghwəyi, ama kami nyi tiɗiɗi mbe yayata slene.

¹²Nda ka kemane ŋkwa mbe Jikə ta ka Kriste kanza le male kwetɛŋe, pa hɛ nza kambeli nyi kesleke ŋwalea nci ba'a ghɛa nci.

¹³Ma ka kemane ŋkwa mbe Jikə ta ka Kriste nyi kemenete slene ta nci megela ne, te ŋkwa ganyɛ nza hɛ hwa mbeli, tiɗiɗi geze ghena hɛ te ghəa yɛ nya kejikə ɓəmə le Yɛsə Kriste.

¹⁴Ma nda rafe ŋa palepa nya 'ya ne, mbe zəzə 'ya kalə kanewe ŋa temə vireɗi.

¹⁵Ma kedera 'ya kese sha gha ne, wərə palepa nya kancɛte ŋa mene slene le mbelia Shala, geze ta ŋkɛ, Jikə ta ka Kriste nya kaŋa Shala nya teghweme, selə ba'a wəsə nya dɛŋe geva kaganda te.

¹⁶Kaganda ne, wəbake ɗepe wəsə nya tewəfərə nya ve ɓəmə yɛ: Kala wəndə ŋelɛ ncɛte geva Kriste. Nahe Sefəa Shala kencɛte nza ta ŋkɛ tiɗiɗi. Nahe ka ghwene ta Shala kenakɛ ŋkɛ. Nahe mbeli kezlapete ghena ta ŋkɛ hwa kweci hwelefefi. Nahe mbeli keyɛte ŋkɛ kwake te hɛɗi. Nahe ŋkɛ kekeleghe geva kadzeme ghweme le zləvə.