Read KapsikiDC 1 Timotɛ 5 Bible Online

1 Timotɛ 5 - KapsikiDC bible

1 Timotɛ 5

¹Ntsehe nda ma ŋzle na ke meha za ma, geze nda ghena kala yiteyɛ ŋa, le megelɛgeshi kala ka kesaka ma,

²le meha mi kala ka mehɛ, le jɛmbezlɛshi kala ŋwalea kwɛa ma mbe nza nya ganyɛ.

³Hawe va ka wedidi nyi kaka wedidi fate fate.

⁴Ama kenza nde ŋwale keɗema hwelefefi ya va wede ne, pa hɛ hi katekeve mene slene le yɛ ta nci kaba laka mbelia nci ba'a kamene nda wəshi nyi kehi ke mbeli keyake hɛ keɗema ke ka shihɛ nci. Nya ya kawəsə nya zeɗehwe nda ke Shala.

⁵Nahe male wede nya kamale wede kaganda, nya ɗema wəndəa ŋkɛ te, keveyi zəzə ta ŋkɛ te Shala, kantsə geva nde kasəkwə ghə viɗi le veci ba'a ka'yɛwe kemane ta Shala.

⁶Ama wede nya kezele zeme zeɗe nza ne, kemte mte nde ya ghenta nza teghweme.

⁷Nya ya kawəsə nya yahi na kageze nda ke hɛ, yitea ɗema ŋele kanza te hɛ.

⁸Ma keɗema wəndə kezəzəte mbeli nyi ki ghɛa ŋkɛ ba'a ka menəhɛnyɛ ne, nahe ŋkɛ keneghakɛ yɛ, ndiremi ma ŋkɛ ke wəndə nya keɗema kezelete Shala.

⁹Karafe geva sləa male kadzehwa sləa ka wedidi keɗema nde kemenete va ŋkwaŋemsə ɓɛhwɛ ta ŋkɛ. Nda nde kase yitea za kwetɛŋe.

¹⁰Nda mbeli kaɗepete ŋkɛ te slene ganjia nta: nahe nde kekelete ŋwalea nta megela, kekemaneve ka mentiɓəa sli megela, kepɛkɛ seɗa ta mbelia Shala, kakemanakɛ mbeli nyi kesa yaka ba'a kemenete mama ta slene ganji.

¹¹Ama rafema sləa ka wedidi nyi kajɛmbezlɛshi na hwa sləa ka wedidi ma, kwa nza nde katesla ntsə hɛ yitea zhili kawəme, katesərə Kriste hɛ te kwete və.

¹²Tagha gɛ, katenza hɛ kaka menete fete va nya ɗema hɛ kese dɛŋe dɛŋe te zəzə ta nci nya kaghate.

¹³Ɓiyitsa ne, pa hɛ seneve ndendeŋe keghɛ keghɛ. Ma wəsə nya ndiremi ma ɓiyitsa ne, kwele kwele mene mɛ ba'a ŋwashɛ ŋwashɛ hɛ, ghena nya keɗema kehite geva yadzehwe hɛ.

¹⁴Vatse ɗe 'ya kezha zhɛne ka wedidi nyi kajɛmbezlɛshi kawəmeve zhili kezha kemave ŋwale ba'a kezha newe ghweme hɛ te ghɛa nci. Tagha gɛ, kateve nda hweŋkwa hɛ ke ka ghema ta ɓəmə kageze wəsə kwa ndiremi te gheɓəmə we.

¹⁵Kwa nza ŋkɛ nahe kweci ka wedidi kesərəakɛ hweŋkwa nya tiɗiɗi kazele Satan.

¹⁶Ama kenza nde ka wedidi ya shɛ hwa ka menəhɛnyɛa male nya kawəndəa Kriste ne, megela ma kemane hɛ nde, mba nde kesərəakɛ nda hɛ ke Jikə ta ka Kriste, yitea kemane ka wedidi nyi ɗema wəndə te hɛ fate fate Jikə ta ka Kriste.

¹⁷Ma mbelia jama nyi te ghəa Jikə ta ka Kriste megela ne, wərə mbeli kave nda kwele ke hɛ bake zhigə, halama nyi kesa yaka kezha ghena ta Shala ba'a kezha teke nda wəshi ke mbeli.

¹⁸Kwa nza ŋkɛ ma ke Ghena ta Shala: Katehwepe nda wəsə yɛ mbe mɛ ke mca nya keleke ha we. Ma ke ɓiyitsa: Nahe ŋkɛ kehi kaŋ'we zhɛme ta ŋkɛ nde mene slene.

¹⁹Yɛma fete nya ve nda mbeli ke wəndə kwele nya hwa jikə ta ka Kriste na, keɗema na kefate ghena shɛ va mbeli bake keɗema mahekene ma.

²⁰Ŋele wəndə nya kebezemte ghena mbe kema ta mbeli pɛtɛ, kezha baŋe kweci mbeli kaghazlənə va beze ghena perə.

²¹Ma 'ya sha gha gheci gheci kwa kema ta Shala, kwa kema ta Yɛsə Kriste, ba'a kwa kema ta ka ghwene ta Shala nyi kentave geva: hawe va ghena nyi kaɗema kanta ghala, kaɗema kakemane kwete wəndə, kakemane kwete.

²²Vema dzeve na kahe kahe kənəa wəndə kezha dape nda slene hwa Jikə ta ka Kriste ma. Nzama na hwa yɛ jaɗafa ta kweci mbeli ma, yate ghəa ŋa wɛŋe.

²³Mba na kesa deke yɛmə, ama sakɛ tɛ ɓɛhwɛ kezha kemane hwəa ŋa nya kezhɛ ŋa, va nya nza na shewə mbe kweci və.

²⁴Nahe jaɗafa ta kweci mbeli kencɛte geva darahwe tewə mbeli kenaka kameha ghwə te hɛ, ama ŋa kweci mbeli ne, kwa sebe tencɛ geva hɛ.

²⁵Tsagha slene ganji perə, mbe newe hɛ mbeli darahwe. Ya kweci nyi kenakama kancɛte geva ne, kenzanji hɛ tewəfərə we.