Read KapsikiDC Filɛmon 1 Bible Online

Filɛmon 1 - KapsikiDC bible

Filɛmon 1

¹Se va Pol, nde daŋgayɛ tewəmbəreke Yɛsə Kriste ba'a se va wəza meyɛ ɓəmə Timotɛ. Ke gha Filɛmon, mcɛ n'yɛ ganyɛ nya kemene slene le ghen'yɛ

²ba'a ke Jikə ta ka Kriste nya ketsene geva ki ghɛa ŋa, ke wəzha ta meyɛ ɓəmə Afiya ba'a ke Arshipe, wəndə nya jikə le ghen'yɛ mbe mpa.

³Pa Shala Yita ba'a Nde sleke ŋkwa Yɛsə Kriste ndeke ŋayɛ zlaɓa ba'a kwelɛŋe.

⁴Filɛmon, ma yayata və nya səkwə Shala 'ya ne, mbe zəzə ŋa 'ya ba'a mbe tsa nda ŋ'wese 'ya ke Shala ta ɗa,

⁵kwa nza ŋkɛ nahe 'ya kefate ghena nya geze mbeli te ɗe ta ŋa laka pɛtɛa ka zele Yɛsə ba'a yɛ ta ŋa laka Nde sleke ŋkwa Yɛsə.

⁶Ka'yɛwe 'ya va Shala kezha mene wəshi ganji yɛ nya kejikə ɓə. Ncɛte wəsə ganyɛ nya nza mə kamenete kezha mene nda slene ke Kriste.

⁷Wəza meyɛ ɗa, ma ɗe ta ŋa nya ne, kwele kwele ndeke ɗa zlama ba'a mtsehete ɗa berete ŋkɛ, kwa nza ŋkɛ nahe na kelɛnɛakakɛ nda wənəa mbelia Shala.

⁸Ya hweŋkwa nza va 'ya laka nza jikə le Kriste kezha geze yayata wəsə nya mene na ne,

⁹megela ma səkwə ŋa 'ya laka ɗe. Kala nya nza nya 'ya Pol nya kameha za, kwa dəŋwə tewəmbəreke Yɛsə Kriste ne,

¹⁰ka'yɛwe zlaɓa 'ya va gha kezha Onɛzime nya kezhɛrenyɛ kawəzege ta ɗa ŋkɛ laka Yɛsə Kriste teke kwa daŋgayɛ.

¹¹Ma vəashi ne, keketekɛ ŋa ŋkɛ we, ama tsetsenya ne, kakete ŋa ŋkɛ kala 'ya.

¹²'Ya kaghwene ŋa ŋkɛ kalə tsetsenya, kala kwete bela ta geva ta ɗa.

¹³Kaɗe 'ya kanza ŋkɛ teke yitea 'ya kwa daŋgayɛ tewəmbəreke Ghena kwatenca nya ganyɛ, yitea kemane ɗa ŋkɛ mbe slene te ŋkwa ŋa.

¹⁴Ama kaɗe 'ya kamene kwete wəsə kaɗema na keyɛhwe we. Kaŋka ŋa 'ya kezha mene wəsəa shɛ le berete we, ama deke le ɗe ta ghəa ŋa.

¹⁵Nda kwete nda se nya na kanehemte geva le Onɛzime ne, kezha zhɛne na kasləyi ŋkɛ kaghala ghala.

¹⁶Kwa nza ŋkɛ ma tsetsenya ne, deke kamava ŋkɛ we, ama za ma ŋkɛ ke mava, wəza ma nya ganyɛ mbe Kriste. Kwele kwele ɗehwe 'ya, ama kwele ma tenza ŋa ŋa ɗe kezha gheŋkɛ, ya mbe nza kawəndə ŋelɛ, ya mbe nza kande Kriste.

¹⁷Ma kenza nde nahe na keveyi ɗa kawəza meyɛ ŋa mbe yɛ ne, kemaneve ŋkɛ kala wəsə nya nza ŋkɛ ka'ya.

¹⁸Ma kenza nde nahe ŋkɛ kebezemte ŋa ghena keɗema nahe ŋkɛ kenzəɓəve dewa va gha ne, va 'ya te'yɛwe na.

¹⁹Le dzeve ta ɗa rafete ŋa palepa nya 'ya, 'ya Pol: kateŋki ŋa 'ya. Kezəzə ŋa 'ya nahe na kenzəɓəve dewa ta mpia ŋa va 'ya we.

²⁰Tsagha shɛ nde wəza meyɛ ɗa, kasəkwə ŋa 'ya kezha mene wəsəa shɛ kezha ɗe ta Nde sleke ŋkwa, lɛnɛakakɛ ɗa wənəa ɗa mbe Kriste.

²¹Nahe 'ya keɗepe ma te və nya rafe ŋa palepa nya 'ya ne, kateyɛ ɗa ghena nya 'yɛwe 'ya na, nahe 'ya keɗepe katemene na za ma ke nya 'yɛwete 'ya.

²²Ɓiyitsa ne, hite ɗa ŋkwa kehɛ. Ma zəzə 'ya te zlaɓa ta səkwə ta ŋayɛ ne, takwa takwa 'ya katezhɛne kanza le gheyɛ.

²³Kanjiŋwe ŋa Ɛpafras nya kwa daŋgayɛ teke le 'ya tewəmbəreke Yɛsə Kriste,

²⁴tsagha Mark, Aristarke, Dɛmas ba'a Ləwke, mbeli nyi kekemane ɗa mbe slene.

²⁵Pa zlaɓa ta Nde sleke ŋkwa Yɛsə Kriste nza le gheyɛ.