Read KapsikiDC Ka Ɛbrə 1 Bible Online

Ka Ɛbrə 1 - KapsikiDC bible

Ka Ɛbrə 1

¹Ma vəashi ne, nahe Shala kegezete nda ghena ke ka shihɛ ɓəmə kwele kwele zhigə ba'a laka mama ta ntsehwele laka ka mɛ ŋkwa.

²Ama te keɗaŋe ta və nya ne, nahe ŋkɛ kegezete ɓəmə ghena laka Wəzege ta ŋkɛ. Laka Wəzegea shɛ pate pɛtɛa wəshi Shala, gheŋkɛ yaveyi Shala kande zeme ghɛ yitea pɛtɛa wəshi.

³Nahe zləvəa Shala keɓelete geva mbe Wəzege ta ŋkɛ, gheŋkɛ nde ncɛte pa ta Shala tɛfɛa tɛfɛa, le berete ta ghena ta ŋkɛ keseyi geva pɛtɛa wəshi. Ma kwa yaɓemte nda jaɗafa ta mbeli ŋkɛ ne, nahe ŋkɛ kentishɛnyɛ te kwa zeme ta Shala nde berete pelɛ ghweme.

⁴Kwele ma Wəzege ke ka ghwene ta Shala fate fate kwa nza ŋkɛ nahe Shala kendeke nda slə nya za ma ke ŋa nci.

⁵Kegha Shala kageze sha kwete wəndəa ka ghwene ta ŋkɛ: «Gha ya kawəzege ta ɗa. Se te ɓəshi nya ne, 'ya ya kayiteyɛa ŋa», ke we. Kegha ŋkɛ kageze nda nde ghwene ta ŋkɛ: «Katenza 'ya kaYitenyɛ, katenza ŋkɛ kaWəzege ta ɗa.»

⁶Ama vəa ŋkwa nya ghwene Tezhɛa Wəzege ta ŋkɛ Shala kasawa kadzete hɛɗi ne, ma ke: «Nda pɛtɛa ka ghwene ta ɗa kagwəɗəŋə kwa kema ta ŋkɛ.»

⁷Wa nya ghena nya gezete Shala te ghəa ka ghwene ta ŋkɛ nya: «Kamene 'ya le ka ghwene ta ɗa kala nya mene 'ya le yɛ sefə. Kamene ɗa slene hɛ kala nya mene slesla ta va.»

⁸Ama te ghəa Wəzege ne, ma ke Shala: «Gha ya kaShala, kaghala ghala tenza pasla ta ŋa. Le nza tiɗiɗi tesleke mbelia ŋa na.

⁹Kaɗe wəsə nya tiɗiɗi na, kaɗe wəsə kwa ndiremi na we. Vatse veyi ŋa Shala nya kaShala ta ŋa tekeleke laka sheke n'yia zlaɓa kwa ghəa ŋa. Nahe ŋkɛ keɗehwe ŋa za ma ke kweci ka meghea kɛfi.»

¹⁰Ma ke gezete zhɛkwa: «Nde sleke ŋkwa, kaghate ne, gha nde pate hɛɗi. Slene ta dzeve ta ŋa ghweme.

¹¹Kateza pɛtɛa wəshia shɛhɛ, ama gha ne, kanza na. Katehalenji yɛ ghweme le hɛɗi kala lekwesa.

¹²Katepeɗe hɛ na kala karalame, pɛtɛ tembeɗe geva hɛ kala lekwesa, ama gha ne, kala ghəa nza na, kakiɗi mpia ŋa we.»

¹³Take ne, wa wəndəa ka ghwene ta Shala nya gha Shala kageze shɛ: «Ntishɛ ŋa te kwa zeme ta ɗa nda ŋkeyi ka ghema ta ŋa 'ya mbe hwəa seɗa ta ŋa», ke shɛ wa?

¹⁴Kaɗema ka ghwene ta Shala kasefə nyi kemene nda slene, nyi ghwene ŋkɛ kezha kemane mbeli nyi ketekemave mbele na?