Read KapsikiDC Ka Ɛbrə 10 Bible Online

Ka Ɛbrə 10 - KapsikiDC bible

Ka Ɛbrə 10

¹Kenza wəsə mahalegəa Moyize kapa ta wəshi nyi kenza shɛ kaganda we. Nahe nde kenza kashenaŋkwe ta wəshi nyi ketese. Ka'yɛwe nde kezha dzeghe melɛ nya kwetɛŋe mbeli keva keva, kaɗema kafɛa yite. Vatse ɗema nde kazhɛrete mbeli nyi kehende nda geva ke Shala tiɗiɗi.

²Ma ya kaɗema ŋkɛ tsagha ne, nza nahe mbeli kefɛa yitea dzeghe melɛa shɛhɛ, va nya nza nahe mbeli nyi kemene slenea shɛ, nyi keyaɓemte geva kwetɛŋe zhigə kakwa fəyitekeghə kenza kaɗema zəzə ta jaɗafa mbe hɛ wəka?

³Ama laka melɛa shɛhɛ ne, kazəzə nda geva jaɗafa ta nci ke hɛ keva keva.

⁴Kwa nza ŋkɛ kakelemte yɛ jaɗafa mimia mcɛmcɛli ba'a ŋa zhɛfa lɛmə tɛape we.

⁵Vatse gɛ, ma kwa sawa Kriste kadzete hɛɗi ne, ma ke sha Shala: «Keɗete yɛ melɛ, ya wəshi nyi fə ŋa mbeli na we, ama nahe na kepate geva.

⁶Zeɗehwe ŋa melɛ nyi tere ŋa mbeli te reghwetɛ ba'a yɛ melɛ kekele jaɗafa seyi te wənə we.

⁷Tagha gɛ, ma 'ya: Shala yawe, wa nya 'ya nya kase sha gha kezha mene ɗe ta ŋa, kala nya kerafete geva te ghəa ɗa mbe palepa kwa peɗe peɗe.»

⁸Ma ke kaba: «Keɗete yɛ melɛ, ya wəshi nyi fə ŋa mbeli kase, ya yɛ melɛ kwa tere tere, ya yɛ melɛ kekele jaɗafa seyi te wənə na we.» Nda nahe melɛa shɛhɛ kedzeghekɛ geva kala nya gezete wəsə mahalegə.

⁹Ma ke zhɛkwa: «Wa nya 'ya nya kese kezha mene ɗe ta ŋa.» Kaza sebe ŋkɛ te melɛ nyi vəashi kezha ve ŋa ŋkɛ te ŋkwa nci.

¹⁰Kwa nza nde nahe Yɛsə Kriste kemenete wəsə nya ɗe Shala, kedzeghekɛ melɛ le ghəa ŋkɛ kwetɛŋe zhigə. Tagha gɛ, nahe jaɗafa ta ɓəmə keyaɓemte geva.

¹¹Keveci keveci slete yayata nde dzeghe Shala kezha mene slene ta ŋkɛ. Melɛ nya kwetɛŋe yadzeghe ŋkɛ, nya keɗema kakelemte yɛ jaɗafa tɛape.

¹²Ama melɛ kwetɛŋe yadzeghekɛ Kriste kezha yaɓe jaɗafa. Ma kwa sebe ta ŋkɛ ne, pa Yɛsə ntishɛ laka dzeve kwa zeme ta Shala kaghala ghala.

¹³Ma tsetsenya gɛ, neghe yaneghe ŋkɛ kezha fəyi ka ghema ta ŋkɛ Shala mbe hwəa seɗa ta ŋkɛ.

¹⁴Kwa nza ŋkɛ, laka wəsə nya ndeke nda ŋkɛ ke Shala kwetɛŋe zhigə ne, nahe ŋkɛ kezhɛrete mbeli nyi yaɓemte geva jaɗafa ta nci kambeli ganji kaghala ghala.

¹⁵Nahe Sefəa Shala kencɛte kaganda ghena shɛ. Kwa nza ŋkɛ ma ke gezete kaba:

¹⁶«Ma ke Mahwətə: Wa nya jikə geva nya temene 'ya le hɛ kwa sebe ta hɛa shɛhɛ nya: Kateve wəsə mahalegəa ɗa 'ya kwa wənəa nci, katerafe hɛ 'ya mbe mehele ta nci.»

¹⁷Ma ke zhɛkwa: «Katezhɛne 'ya kazəzə jaɗafa ta nci, ya wəshi nyi ndiremi ndiremi nyi menete hɛ we.»

¹⁸Ma kwa nza ŋkɛ nahe yɛ jaɗafa kekelemte geva te wənə ne, kazhɛne mbeli kafə wəshi kase kezha yɛ jaɗafa we.

¹⁹Kala nya gɛ ka kesaka ma, hweŋkwa ya va gheɓəmə kadzembe ŋkwa nya keveyi geva tekeleke tsape te zlaɓa ta mimia Yɛsə.

²⁰Nahe Yɛsə keperawete hweŋkwa mɛnɛfɛ ba'a nya te ghweme jive mbe mayafe ta ghɛa Shala, geze ta ŋkɛ, jive mbe geva ta ŋkɛ.

²¹Nde dzeghe Shala nya wəba nya te ghəa ghɛa Shala ya va gheɓəmə.

²²Ma kala nya nde gɛ ne, hende nda ɓəmə geva ke Shala le wənə nya tiɗiɗi ba'a ve ghə nya kaganda, le wənə nya keyaɓe yaɓe va zəzə kwa ndiremi ba'a geva nya kepɛ pɛ le yɛmə nya wɛŋe.

²³Yate ɓəmə ve ghə nya zlape gheɓəmə, kwa nza ŋkɛ dɛŋe dɛŋe Shala te wəsə nya meɗeyi ŋkɛ.

²⁴Ya ɓəmə ghəa ɓəmə kezha mtsehe nda berete ke ghəa ɓəmə kaɗe ŋkwa ba'a kamene ganyɛ.

²⁵Mba gheɓəmə kewəfə yɛ tsene ta ɓəmə kala nya seneve mene kweci mbeli. Ama ntsə nda ɓəmə berete ke ghəa ɓəmə kwa nza ŋkɛ kanewe newe yɛ kahende geva vecia Nde sleke ŋkwa kase.

²⁶Ma kenza gheɓəmə kamene jaɗafa le ɗe ta ɓəmə kwa sebe ta nya ɗepete kaganda gheɓəmə ne, kwete melɛ shɛ kezha kelemte jaɗafa zhɛkwa we.

²⁷Deke neghe meha ghwə ta Shala le ghazlənə, geze ta ŋkɛ, ghwə nya dzawe nya ketetere ka ghema ta ŋkɛ nde tene va gheɓəmə.

²⁸Kapesle yayata wəndə nya keɗema kahawe va wəsə mahalegəa Moyize mbeli kakwa zhɛma heli, kenza nde nahe mbeli bake keɗema mahekene kendeke nda fete.

²⁹Tsema tenza ŋa wəndə nya keɓelama Wəzege ta Shala tsagha wa? Kwa nza ŋkɛ ne, nahe ŋkɛ kezhɛrete mimia jikə geva nya keyaɓemte ŋkɛ va jaɗafa ta ŋkɛ kawəsə kesehwe zeweve. Ŋele yaŋele Sefəa Shala nya kencɛ ɓəmə ganyɛa Shala ŋkɛ.

³⁰Kwa nza ŋkɛ nahe gheɓəmə keɗepe wəndə nya kegezete: «'Ya nde tewa dewa, 'ya teŋki nda zhɛme ke yayata wəndə.» Ma ke gezete zhɛkwa: «Mahwətə nde temeha ghwə ta mbelia ŋkɛ.»

³¹Wəsə dzawe ŋkɛ kateɗe kadzembe dzeve ta Shala teghweme.

³²Zəzəte mə nza ta ŋayɛ nya vəashi. Ma vəa ŋkwa shɛ, kwa sebe ta kemave waŋea Shala yɛ ne, nahe yɛ kesahwe yaka kwele kwele ba'a kempahwe mpa nya dzawe.

³³Te kwete və ne, kaŋele ŋayɛ mbeli ba'a kasa ŋayɛ yaka mbeli kwa kema ta mbeli, te kwete və ɓiyitsa, nahe yɛ kese kakemane mbeli nyi mene nda mbeli ke hɛ kala nya.

³⁴Nahe yɛ kesahwe yaka le mbeli nyi kwa daŋgayɛ. Ma kwa zləgwəhwe wəshia ŋayɛ mbeli ne, nahe gheyɛ kesərəakɛ nda ke hɛ le farefa ta wənə, kwa nza nde nahe yɛ keɗepe mcɛlə nya wəba ba'a nya ketemə ya va gheyɛ.

³⁵Mba yɛ kezamte ve ghə ta ŋayɛ, kwa nza ŋkɛ katekemave zhɛme nya wəba yɛ mbe.

³⁶Kaɗe zereghe ghena yɛ kezha mene wəsə nya ɗe Shala ba'a kezha kemave wəsə nya meɗeyi ŋkɛ.

³⁷Kwa nza ŋkɛ ma ke Ghena ta Shala: «Ma temə ɓɛhwɛ, kavə ɓɛhwɛ mbarave ne, katese wəndə nya ketese, katedera ŋkɛ we.»

³⁸Ma ke Shala: «Ma wəndə nya tiɗiɗi kwa kema ta ɗa ne, katenza ŋkɛ teghweme laka yɛ. Ama kezhɛrete geva ŋkɛ dzeyi te sebe ne, katezlama 'ya te we.»

³⁹Ma gheɓəmə ne, kenza gheɓəmə kambeli nyi kezhɛre geva dzeyi te sebe kezha za we, ama kambeli nyi keyɛ Shala ba'a nyi kwa hweŋkwa ta mbele.