Read KapsikiDC Ka Ɛbrə 4 Bible Online

Ka Ɛbrə 4 - KapsikiDC bible

Ka Ɛbrə 4

¹Nahe Shala kemeɗeyi ɓəmə dzete ŋkwa kezhɛne mpi nya hite ɓəmə ŋkɛ. Ya ɓəmə ghəa ɓəmə megela yagha kwete wəndəa ɓəmə kashaŋe va ntsehe te ŋkwa shɛ.

²Kwa nza ŋkɛ nahe gheɓəmə kekemave Ghena kwatenca nya ganyɛ perə kala mbeli nyi kese kwamte te ɓerama. Ama kekemanakɛ hɛ ghena shɛ va nya ɗema hɛ keyɛte ŋkɛ we.

³Ma gheɓəmə nyi nza yɛ ve ne, katelə gheɓəmə kadzete ŋkwa kezhɛne mpi. Ma ke Shala gezete: «Ma 'ya zemete fela mbe hwepe ta wənəa ɗa: Katedzete hɛɗi nya hite nda ŋkwa kezhɛne mpi 'ya te ke hɛ hɛ tɛape we.» Ndagwara nahe ŋkɛ kekiɗimte slene ta ŋkɛ ŋkɛ se mɛa nya pate geva hɛɗi lema.

⁴Kwa nza ŋkɛ ma ke gezete geva te kwete ŋkwa mbe Ghena ta Shala te ghəa kwa mberefaŋe ta hɛ: «Nahe Shala kezhɛnakɛ mpi va pɛtɛa slene ta ŋkɛ te kwa mberefaŋe ta hɛ.»

⁵Ma ke Shala gezete te kwete ŋkwa zhɛkwa: «Katedzete hɛɗi nya hite nda ŋkwa kezhɛne mpi 'ya te ke hɛ hɛ tɛape we.»

⁶Ma mbeli nyi keghate kafate Ghena kwatenca nya ganyɛ ne, kekemave ntsehe hɛ te ŋkwa kezhɛne mpia shɛ va nya ɗema hɛ keyɛhwe ghena shɛ we. Vatse gɛ, wərə kweci mbeli kazhɛne kadzete ŋkwa kezhɛne mpia shɛ.

⁷Vatse veyi kwete veci nya heka ŋkɛ kaƁeshi Shala. Ma ke gezete nda vecia shɛ ke mbeli cakeɗake kwa sebe laka David mbe ghena nya kegezete geva nya mshena: «Ma kefate ŋwələa Shala yɛ ɓeshi ne, mba yɛ kezhɛre ghəa ŋayɛ ntɛaŋe ntɛaŋe.»

⁸Ma ya nahe Zhozəwɛ kebegheghe mbeli kadzete ŋkwa kezhɛne mpia shɛ ne, nza kategeze ghena ta kwete veci Shala kwa sebe we.

⁹Tsagha gɛ, kwete zhɛne mpia ya shɛ kaŋa mbelia Shala kala zhɛne mpi nya te kwa mberefaŋe ta hɛ.

¹⁰Kwa nza ŋkɛ ma wəndə nya kedzembe zhɛne mpi nya hite Shala ne, mpi yazhɛne ŋkɛ va slene ta ŋkɛ kala nya kezhɛnakɛ mpi Shala va ŋa ŋkɛ.

¹¹Ntsə ɓəmə geva kadzembe zhɛne mpia shɛ, kezha ɗema kwete wəndəa ɓəmə kateɗe laka yɛma fete kala ka shihɛ ɓəmə.

¹²Kwa nza ŋkɛ nahe ghena ta Shala kenza teghweme ba'a bereteke. Mɛ ma te ke kafayɛ nya nza mɛ bake te. Kadzembe ghena shɛ kezha nehe yɛ mpi le zəzə, geze ta ŋkɛ, yɛ membeɗe ta 'yɛ'yɛ le 'wanda[1], kameha ghwə ŋkɛ te yɛ sla ntsə ba'a zəzə nyi kwa wənəa wəndə ŋelɛ.

¹³Wəsə shɛ tewəfərə sha Shala we, darahwe rahwe pɛtɛa wəshi shɛ. Gheŋkɛ yategeze nda wəshi nyi menete gheɓəmə gheɓəmə.

¹⁴Keseve ɓəmə yɛ ta ɓəmə bake dzeve kala nya zlape gheɓəmə. Kwa nza ŋkɛ wəndə kwelea ka dzeghe Shala nya kentsehe hwa'a kwa kema ta Shala ya va gheɓəmə: gheŋkɛ Yɛsə, Wəzege ta Shala.

¹⁵Wəndə kwelea ka dzeghe Shala nya kepeslema yitea sa yaka le gheɓəmə mbe dewe ŋelia ɓəmə ya va gheɓəmə we. Kwa nza ŋkɛ nahe wəndə kwelea ka dzeghe Shala ta ɓəmə kadzeghakɛ geva laka pɛtɛa wəshi kala nya nza gheɓəmə, ama kemenete jaɗafa ŋkɛ we.

¹⁶Hende ɓəmə geva ke pasla ta Shala le gezleŋema ghə, yitea kemave zeɗe helia ŋkɛ ba'a zlaɓa ta ŋkɛ. Tsagha gɛ, katekemane ɓəmə ŋkɛ mbe və ganyɛ.