Read KapsikiDC Zhake 4 Bible Online

Zhake 4 - KapsikiDC bible

Zhake 4

¹Se tema se mpa le tseha mɛ hwa gheyɛ wa? Ashɛ se mbe sla ntsə ta ŋayɛ yitea wəshi nyi kempa mbe geva ta ŋayɛ wəka?

²Kasla ntsə yɛ yitea wəshi, kakemave hɛ yɛ we, kampə ŋkwa yɛ, kave ghema yɛ, ndɛare yɛ va kemave wəshi nyi ɗe yɛ, va nya ɗepema səkwə yɛ va Shala.

³Ma kwa səkwə yɛ kaɗema yɛ kekemave ne, kwa nza ŋkɛ kezha ɗe ta geva ta ŋayɛ nda səkwə wəshia shɛhɛ yɛ.

⁴Mi nyi kemene vale tahe yɛ, keɗepe yɛ ne, ɗe wəshi nyi te hɛɗi nde ve wəndə kande ghema ta Shala wəka? Ma wəndə nya keɗe nza kamcɛ le ŋkwa nya teke te hɛɗi ne, gheŋkɛ ya kande ghema ta Shala.

⁵Zəzəma yɛ gəmə gezete Ghena ta Shala ma, ma ke: «Kazhɛ nda zlɛ ke Shala kebeze Sefəa ŋkɛ nya veyi ŋkɛ mbe gheɓəmə.»

⁶Ama nahe Shala kezlaɓa le gheɓəmə, kwele kwele zlaɓa ŋkɛ, kwa nza ŋkɛ, ma ke mbe Ghena ta Shala: «Kazhɛne nda ghə Shala ke ka kele ghə, ama kamene nda ganyɛ ŋkɛ ke ka shifə ghə.»

⁷Ma kala nya ŋkɛ gɛ ne, fa nda mə ghena ke Shala, zhɛne nda mə ghə ke gətəli, tagha gɛ, katehwɛnyɛ ŋkɛ cakeɗake yitea gheyɛ.

⁸Hende nda mə geva ke Shala, katehende ŋayɛ geva ŋkɛ. Pɛmte mə dzeve ta ŋayɛ, gheyɛ ka jaɗafa, tsewemte mə wənəa ŋayɛ, gheyɛ nyi kaka mbəɗəkwə.

⁹Nza mə teheɗe le kema, nehwene mə, ŋgaɗe mə ghə, nehwene mə kamejara ŋ'wəshi nya ŋ'wəshi yɛ, heɗe mə kema kamejara zlama ta ŋayɛ.

¹⁰Shifəmte mə ghəa ŋayɛ kwa kema ta Mahwətə, kateve ŋayɛ kwele ŋkɛ.

¹¹Ka kesaka ma, mba yɛ kegeze ghena kwa ndiremi kwelɛ ghəa ŋayɛ. Ma wəndə nya kegeze ghena nya ndiremi kadzete wəza meghekɛ ba'a nya keve nda fete ne, wəsə mahalegə yagezete ghena nya ndiremi ŋkɛ te ba'a fete yandeke nda nde. Ma kenza nde pa na ndeke nda fete ke wəsə mahalegə ne, mba na kawəndə nya kefa nda ghena ke wəsə mahalegə we, ama kawəndə nya keve nda fete na.

¹²Shala kwetɛŋenyɛ nde ve nda wəsə mahalegəa ŋkɛ ke mbeli, gheŋkɛ nde ve nda fete ke mbeli, gheŋkɛ nde mbele ŋkwa, gheŋkɛ nde nza kazamte ŋkwa. Kawa zhɛrete ŋa ŋa na ghə nda ve nda fete na ke nde ghedəkwəa ŋa wa?

¹³Veyite mə sleme yitea ghena ta ɗa tsetsenya, ma pe yɛ sha geze kafa 'ya: «Ɓəshi keɗema hendɛ ne, kalə mə kadzehwa mte, kateva gheɓəmə təhə hwa ŋkwa, kamene fəli mə baŋe mə kakemave cɛdɛ kwele kwele.»

¹⁴Ndagwara keɗepe yɛ tsema tsema tenza mpia ŋayɛ hendɛ we. Kala meləkwə ləkwə nya kenza kazhiɓəmte ŋkwa, temə vireɗi ne, bətə ŋkɛ, tsagha yɛ.

¹⁵Wa nya ghena nya hi yɛ kageze nya: «Ma keɗe Mahwətə, mba mə teghweme ne, katemene nya mə wəsə, katemene nya mə tsetse.»

¹⁶Ama nza ta ŋayɛ tsetsenya ne, kaka kele ghə yɛ. Yayata fege nya kala nya ne, wəsə ganyɛ ŋkɛ we.

¹⁷Ma wəndə nya keɗepe wəsə nya kehi nda ɗema ŋkɛ kemenete ne, jaɗafa yamenete ŋkɛ.