Read KapsikiDC Zhake 5 Bible Online

Zhake 5 - KapsikiDC bible

Zhake 5

¹Veyite mə sleme yitea ghena ta ɗa tsetsenya, gheyɛ ka mcɛləa kɛfi. Nehwene mə ba'a ŋələvə mə va ndiremi nyi ketedzete gheyɛ.

²Nahe mcɛləa ŋayɛ kedaɗənji, nahe lema kezememte lekwesa ta ŋayɛ.

³Nahe vɛa kezehwe mze kwa tere tere nyi tseneyi yɛ le yɛ mze kwa tɛawetɛa ta ŋayɛ, ma zeme nya zehwe vɛa ne, kezha ncɛ fete nya va gheyɛ, kazeme geva ta ŋayɛ ŋkɛ kala ghwə. Kwa nza ŋkɛ, nahe yɛ ketsenete wəshi te keɗaŋe ta və.

⁴Kese yɛ kaŋki nda meleɓe ta mbeli nyi kemene ŋayɛ slene mbe wəvea ŋayɛ we. Fate mə fete nya ndeke ŋayɛ hɛ. Nahe lewela ta mbeli nyi kemeneke ŋayɛ wəshi se te wəve kentsehe hwa'a kwa sleme va Shala Mahwətə, nde berete.

⁵Nahe yɛ kekemave zeɗe nza le farefa ta wənə kwake te hɛɗi. Nahe yɛ keneghate negha kamerege kezha veci nya tehene ŋayɛ mbeli kwa.

⁶Nahe yɛ kendeke nda fete ke mbeli nyi ɗema fete va hɛ ba'a nahe yɛ kempəmte hɛ. Kaghereŋe hɛ kwa kema ta ŋayɛ we.

⁷Zereghe mə ghena ke ta ŋayɛ, ka kesaka ma hwa'a te veci nya tese Mahwətə. Newe ma mə tsema tsema zereghe mbeli nyi kewəza, mbe zereghe hɛ shanda nda tenaka wəshi nyi wəzate hɛ te hɛɗi, mbe neghe kwa ghate ta va hɛ kame pa tekiɗi ta va feghwe.

⁸Zereghe mə perə, zlama mə kwele kwele, kwa nza se ta Nde sleke ŋkwa takwa takwa.

⁹Yagha yɛ kandəghwə ndəghwə kwelɛ ghəa ŋayɛ, ka kesaka ma, yagha Shala katemeha ghwə te gheyɛ. Wa nya wəndə kemeha ghwə nya mɛa degha, takwa takwa kasawa katemeha ghwə ta mbeli.

¹⁰Ka kesaka ma, zəzəte mə ka mɛ ŋkwa ta Shala nyi kese kageze ghena te sləa Mahwətə, yipə mə geva le hɛ kezha zereghe yaka kala nya se hɛ kazereghe.

¹¹Zlama ya va mbeli nyi kezereghehwe yaka ke gheɓəmə sha geze. Nahe yɛ kefate zereghe ghena ta Job, nahe yɛ keɗepe wəsə nya menete nda Mahwətə kakwa keɗaŋe, kwa nza ŋkɛ kwele kwele zhɛ heli Mahwətə yitea mbeli, ganyɛke mehele ta ŋkɛ.

¹²Ma gɛ ka kesaka ma, mba yɛ kezeme fela, ya le ŋkwa nya pelɛ ghweme[1], ya le ŋkwa nya te hɛɗi, ya le yayata wəsə. Ma ghena nya geze yɛ nahe ne, e'e kenza nde e'e ŋkɛ, ewə kenza nde ewə ŋkɛ, yagha fete kakeseve ŋayɛ te ghwə ta Shala.

¹³Le wəndə nya kesa yaka shɛ hwa gheyɛ na? Səkwə ghə ŋkɛ. Le wəndə nya kezlama shɛ na? Gha cimə ŋkɛ kezha tsahe Shala.

¹⁴Le wəndə nya shewə shɛ hwa gheyɛ na? Pa kaheka mbelia jama ta Jikə ta ka Kriste, pa hɛ kasəkwəte ghə kezha gheŋkɛ kwa sebe ta nya fikɛ hɛ le n'yi te sləa Mahwətə.

¹⁵Səkwə ghə nya kala nya ne, səkwəte mə le yɛ, pələsə tenza nde zereghwea shɛ. Kateve nda kwelɛŋe Mahwətə, ma jaɗafa nya menete ŋkɛ ne, pɛtɛ tekelemte nda Mahwətə te wənə.

¹⁶Kelemte mə jaɗafa ta ŋayɛ kwelɛ ghəa ŋayɛ te wənə, səkwə mə Shala kezha ghəa ŋayɛ nda nza yɛ lɛŋe lɛŋe. Ma səkwə ta wəndə nya tiɗiɗi ne, berete ya mbe kwele kwele.

¹⁷Wəndə ŋelɛ Ɛli kala gheɓəmə, pa səkwəte Shala le berete yagha va kame, kese va kame te hɛɗi kava mahekene ba'a tere ŋkwaŋe we.

¹⁸Zhɛne ne, pa səkwəte ghə, pa va meke me, pa hɛɗi kemave berete kawəza wəshi mbeli te.

¹⁹Ka kesaka ma, ma kesərəakɛ hweŋkwa ta kaganda kwete wəndə hwa gheyɛ nda zhɛneke kwete wəndəa ŋayɛ ne,

²⁰zəzəte mə, ma wəndə nya kezhɛneke nde jaɗafa, kakelemte kwa hweŋkwa nya ndiremi nya nza ŋkɛ kwa ne, nahe kembelete mpia nde jaɗafa shɛ va mte. Ya tsemanyɛ nza jaɗafa ta ŋkɛ kwele kwele ne, katekelemte Shala te wənə.