Read KapsikiDC 2 Piyɛre 1 Bible Online

2 Piyɛre 1 - KapsikiDC bible

2 Piyɛre 1

¹Se va Simon Piyɛre, nde mene slene ba'a nde ghwene ta Yɛsə Kriste, ke mbeli nyi kekemave yɛ nya nza zləvəa ŋkɛ kanya kwetɛŋe le ŋa ɓəmə, laka nza tiɗiɗia Shala ta ɓəmə ba'a Nde mbele ŋkwa Yɛsə Kriste.

²Pa zlaɓa ba'a kwelɛŋe ndeke ŋayɛ geva kwele kwele, laka ɗepe Shala ba'a Yɛsə, Nde sleke ɓəmə.

³Nahe berete ta Shala kendeke ɓəmə pɛtɛa wəshi nyi kehi kezha dɛŋe dɛŋe te Shala. Kwa nza ŋkɛ nahe beretea shɛ kencɛte ɓəmə nde hekakɛ ɓəmə kadzembe zləvəa ŋkɛ ba'a ganyɛa ŋkɛ.

⁴Laka zləvəa shɛ ba'a ganyɛa shɛ ne, nahe Shala kemeɗeyi ɓəmə wəshi nyi jama jama ba'a nyi nza zləvə te hɛ tsape tsape, yitea nza yɛ jikə le Shala laka hɛ, gheyɛ nyi kezləgwəke geva shave mbe beze nya ve nda sla ntsə ke mbeli te hɛɗi nya.

⁵Tewəmbəreke wəsə nya kala nya ne, ntsə mə geva kamtsehe dzeghwa ganyɛ yitea yɛ ta ŋayɛ, ɗepe Shala yitea dzeghwa ganyɛa ŋayɛ,

⁶tsefe ghə yitea ɗepe Shala, hwepe ghə yitea tsefe ghə, nza dɛŋe dɛŋe te Shala yitea hwepe ghə,

⁷ɗe ghə yitea nza dɛŋe dɛŋe te Shala ba'a ɗe yitea ɗe ghə.

⁸Ma kenza nde mbe gheyɛ wəshi nyi kala nyi ba'a keyate hɛ yɛ ne, kateve ŋayɛ mene slene hɛ ba'a kateve ŋayɛ jive mbe kema hɛ kezha ɗepe Nde sleke ɓəmə Yɛsə Kriste.

⁹Ama wəndə nya ɗema wəshia shɛhɛ ve ne, kala ghwələ nya kefafela ŋkwa ŋkɛ, kazaghə ŋkɛ nahe jaɗafa ta ŋkɛ nyi vəashi keyaɓemte geva.

¹⁰Vatse gɛ ka kesaka ma, ntsə mə geva kenza dɛŋe dɛŋe te heka ta Shala ba'a te nta nya ntave ŋayɛ ŋkɛ. Ma kemenete yɛ kala nya ne, kateteɗe yɛ mbe beze ghena tɛape we.

¹¹Ma kala nya ne, waɗe tenza hweŋkwa kedzembe Meghe nya kaghala ghala ta Nde sleke ɓəmə ba'a Nde mbele ɓəmə Yɛsə Kriste va gheyɛ.

¹²Vatse gɛ, kaɗe 'ya kazəzə ŋayɛ wəshia shɛhɛ keveci keveci, ya gheyɛ ɗepe hɛ ba'a nza dɛŋe dɛŋe te kaganda nya kemave yɛ.

¹³Nahe ŋkɛ kehi sha 'ya kezha feɗeghe ŋayɛ le ghena nyi kala nyi mba 'ya teghweme.

¹⁴Kwa nza ŋkɛ nahe 'ya keɗepe takwa takwa 'ya kamte, kala nya ncɛte ɗa Nde sleke ɓəmə Yɛsə Kriste.

¹⁵Ama katentsə geva 'ya kezha zəzə ghena shɛhɛ yɛ kevə kevə kwa sebe ta mte ta ɗa.

¹⁶Kwa nza ŋkɛ kenza laka ghena heca nyi dzawe dzawe ncɛte ŋayɛ se nya le berete ta Nde sleke ɓəmə Yɛsə Kriste ghen'yɛ we, ama kwa sebe ta nya nakɛ kwelea ŋkɛ ghen'yɛ.

¹⁷Kwa nza ŋkɛ nahe ŋkɛ kekemave zləvə ba'a kwelea Shala Yita. Ma ke ŋwələa Shala nde berete shɛ: «Nya ya kaWəzege ta ɗa nya ɗehwe 'ya, nya ntave 'ya le zlama.»

¹⁸Nahe ghen'yɛ kefate ŋwələa shɛ sawa pelɛ ghweme, vəa ŋkwa nya se ghen'yɛ le pelɛ ghəa ghweme nya keveyi geva tekeleke.

¹⁹Zhɛne ne, ghena ta ka mɛ ŋkwa ya va ghen'yɛ. Berete ya va ghena shɛ, megela ŋkɛ kendeke nda mehele yɛ. Kwa nza ŋkɛ ne, kala paterela nya kewaŋe ŋkwa hwa ŋkwesle ŋkɛ hwa'a te veci nya tenca waŋe ta veci ba'a nya tesame saseregwa kwa kiɗi ŋkwa mɛa wənəa ŋayɛ.

²⁰Kaba ne, ɗepete mə ghena nya megela: wəndə shɛ kancɛte ghena nya mbe ghena kelɛŋə nya mbe Ghena ta Shala le ghəa ŋkɛ we.

²¹Kwa nza ŋkɛ ghena kelɛŋə shɛ kegha kagezete geva laka ɗe ta wəndə ŋelɛ we, ama laka kemane ta Sefəa Shala gezete ghena nyi kese va Shala mbeli.