Read KapsikiDC 2 Piyɛre 2 Bible Online

2 Piyɛre 2 - KapsikiDC bible

2 Piyɛre 2

¹Nahe ka mɛ ŋkwa nyi kaka tseŋwə kese hwa ka Israyɛl vəashi, tsagha tenca geva ka teke nda tseŋwə ke mbeli hwa gheyɛ. Le ntsehwele teteke nda tseŋwə hɛ ke mbeli ba'a teneghamte Nde sleke ŋkwa nya kembelete hɛ hɛ. Tsagha ne, katekele nda za nya vəkə hɛ kase ke ghəa nci.

²Kwele kwele mbeli nyi ketezele hɛ laka mene wəshi nyi kehitema geva. Kateyiɗə hweŋkwa nya kaganda mbeli tewəmbəreke hɛ.

³Mbe sla ntsə ta nci yitea cɛdɛ ne, kateghwete ŋayɛ hɛ laka ghena nyi ncake hɛ. Ama se vəashi ne, kenza meha ghwə tikə tikə we, kateme ndiremi kahe kahe te hɛ.

⁴Kwa nza ŋkɛ ne, kenzanyɛ Shala keve ɗa te ka ghwene ta ŋkɛ nyi kemenete nda jaɗafa we, ama nahe ŋkɛ kebeteyi hɛ kwa ŋkwa yaka nya nza hɛ kehwepe hwepe mbe ŋkwesle le zewe lɛ kezha vecia meha ghwə.

⁵Kenzanyɛ Shala keve ɗa te hɛɗi nya vəashi perə we. Ama nahe ŋkɛ kekeleke yɛmə nya wəba kadzete hɛɗia ka 'yaghwa mehele, deke Nowɛ nya kezlape nza tiɗiɗi ba'a kweci mbeli mberefaŋe yambelete ŋkɛ.

⁶Nahe Shala keteremte meleme ta Sodome ba'a Gomore le ghwə. Nahe ŋkɛ kehi kanza kawəsə keyipə pa sha ka 'yaghwa mehele, kezha ncɛ nda wəsə nya ketemene nda geva ke hɛ ke ka 'yaghwa mehele.

⁷Nahe ŋkɛ kembelete Lot, wəndə nya tiɗiɗi, kwa nza ŋkɛ kazhɛ nda wənəa ŋkɛ va jaɗafa nya mene ka mefətekwə nyi vəa ŋkwa shɛ.

⁸Ma wəndə nya tiɗiɗi nyagha, nda nzahwe nza ŋkɛ hwa hɛ ne, kanewe hɛ ŋkɛ ba'a kafa wəshi nyi mene hɛ keveci keveci ŋkɛ, kwele kwele sahwe yaka ŋkɛ va nza ta ŋkɛ hwa hɛ.

⁹Tsagha ne, nahe Nde sleke ŋkwa keɗepe tsema tsema tembele mbelia ŋkɛ nyi dɛŋe dɛŋe te ŋkɛ ba'a tsema tsema tewəmbə ka mene wəsə kwa ndiremi ŋkɛ kezha ɗa hɛ te vecia meha ghwə.

¹⁰Kateve ɗa ŋkɛ halama te mbeli nyi kezele ɗe nyi wale wale ta geva ta nci ba'a nyi keɓelama berete ta Shala. Nahe ka teke wəshi tseŋwəa shɛhɛ kenza kaka kele ghə ba'a kaka ŋkele ntsə, kaghazlənə hɛ va ŋele mbeli nyi nza zləvə te hɛ pelɛ ghweme we.

¹¹Ya ka ghwene ta Shala nyi berete ma ba'a nyi za ma ke hɛ ne, kaŋele hɛ hɛ kwa kema ta Nde sleke ŋkwa we.

¹²Nahe mbelia shɛhɛ kenza kaka zəzəma ghena kala wəshi keseɗa nyi hwa gamba nyi keyake geva kezha kese hɛ mbeli kahene hɛ. Kaŋele wəndə nya ɗepema hɛ hɛ, katempə hɛ kala wəshi keseɗa nyi hwa gamba.

¹³Zhɛme ta wəsə kwa ndiremia nci yatekemave hɛ. Zeɗehwe nda mene mawe ta geva ta nci ke hɛ mbe waŋe ta veci. Ma vəa ŋkwa nya mene gəsəkə hɛ le gheyɛ ne, zeɗehwe nda sla ŋayɛ tseŋwə ke hɛ. Nahe nza ta nci hwa gheyɛ kenza kawəsə hawe ba'a katehene.

¹⁴Mene vale tahe yamawe ntsə ta nci, kesərəakɛ mene jaɗafa hɛ we. Kaghwete ka dewə ŋeli hɛ. Dzeghwama ntsə ya kwa wənəa nci, bezla ta Shala ya kənəa hɛ.

¹⁵Nahe hɛ kewəfəyite hweŋkwa nya tiɗiɗi ba'a kezamte ghəa nci, nahe hɛ kezelete hweŋkwa ta Balam, wəzege ta Bosor, nya keɗehwe zhɛme ta wəsə kwa ndiremi,

¹⁶ama nahe ŋkɛ kekemave yɛ ŋele te fama ghena ta ŋkɛ, kwa nza ŋkɛ nahe ŋemalea kwara nya kegezema ghena kegezete ghena kala wəndə ŋelɛ ba'a kedzakwemte slene gezhia nde mɛ ŋkwa Balam.

¹⁷Nahe mbelia shɛhɛ kenza yipə yipə le ɗasle nyi kehase hase ba'a le ləmbə nyi kele sefə nya wəba. Nahe Shala keveyi nda ŋkwa ke hɛ mbe ŋkwesle nya zhikwətəkwə ma.

¹⁸Ghena kele ghə nyi ɗema ghena mbe yageze hɛ, kaghwete mbeli nyi kakatenehemte geva le mbeli nyi keza za hɛ le wəshi nyi mawe geva ta nci.

¹⁹Kameɗe nda nza kaka mamzashi hɛ ke hɛ, ama nahe hɛ kenza kaka mavashi jaɗafa le ghəa nci, kwa nza ŋkɛ nahe yayata wəndə kenza kamava ta wəsə nya kesleke ŋkɛ.

²⁰Ma mbeli nyi kembele nyi shave mbe wəshi nyi ndiremi ndiremi nyi te hɛɗi, laka ɗepe Nde sleke ɓəmə ba'a Nde mbele ɓəmə Yɛsə Kriste hɛ ne, kazhɛne hɛ kapele ghəa nci kezha sleke hɛ wəshia shɛhɛ. Nahe nza ta nci nya tsetsenya kenza ndiremi ma ke kwa ghate.

²¹Megela ma ɗepetema hweŋkwa nya tiɗiɗi hɛ kenya ɗepete hweŋkwa shɛ hɛ ba'a nya zhɛrave nda wəmbə hɛ ke ghena ta Shala nya kegezete nda geva ke hɛ kwa sebe.

²²Nahe wəsə nya kemenete nda geva ke hɛ kencɛte kaganda ta ghena ŋela nya: «Kazhɛne geva kelɛ kadzeghəa wəsə nya vənəhwəyi ŋkɛ» ba'a «kahwehwe geva gərədə nya kepɛkɛ pɛ mbe nzaɓe ɓiyitsa.»