Read KapsikiDC 2 Piyɛre 3 Bible Online

2 Piyɛre 3 - KapsikiDC bible

2 Piyɛre 3

¹Ka mcɛhɛ ɗa ganji, nya ya kakwa bake ta palepa ta ɗa nya rafe ŋayɛ 'ya. Ma mbe hɛ bake nci ne, nahe 'ya keɗe kafeɗeghe mehele ta ŋayɛ kezha kemane ŋayɛ kazəzə ghena kala nya kehi.

²Zəzəte mə ghena nyi gezete ka mɛ ŋkwa ta Shala vəashi, tsagha ghena ta Nde sleke ŋkwa ba'a Nde mbele ŋkwa nyi tekave ŋayɛ ka ghwene ta Yɛsə.

³Kaba ne, ɗepete ghena nya: ma mbe ka keɗaŋe ta hɛ ne, katese mbeli nyi ketenza kala wəshi nyi mawe geva ta nci. Kateŋ'wəshi ŋayɛ hɛ,

⁴ma ke hɛ sha tegeze: «Ashɛ Yɛsə kemeɗeyi katese ŋkɛ wəka? Tema ŋkɛ tse gɛ? Kwa nza ŋkɛ ghala mpənji ka shihɛ ɓəmə ne, mba wəshi kala nya te və nya ghate pa geva wəshi.»

⁵Laka geze ghena kala nya ne, kazaghə wəsə kwetɛŋe hɛ: Nahe yɛ ghweme le hɛɗi kepate geva se vəashi. Laka ghena ta ŋkɛ ne, nahe Shala kekelemte hɛɗi shave mbe yɛmə ba'a kepate ŋkɛ le yɛmə,

⁶le yɛmə shɛnyɛ, nya kayɛmə nya wəba zamte geva hɛɗi lema nya vəashi.

⁷Ama laka ghena shɛnyɛ wəmbə geva yɛ ghweme le hɛɗi nyi tsetsenya kezha ghwə nya ketetere hɛ. Nahe hɛ kewəmbəyi geva kezha vecia meha ghwə ba'a za ta ka jaɗafa.

⁸Ka mcɛhɛ ɗa ganji, kwete wəsə nya hima yɛ kezaghə ya shɛ: ma sha Nde sleke ŋkwa ne, nahe veci kwetɛŋe kenza kava slibə ba'a nahe va slibə kenza kaveci kwetɛŋe.

⁹Kadera Nde sleke ŋkwa yitea yipə meɗe mɛa ŋkɛ kala nya zəzə kweci mbeli we. Ama nahe ŋkɛ kenza kande zereghe ghena laka gheyɛ, va nya ɗema ŋkɛ kaza kwete wəndə. Ama kaɗe ŋkɛ kezha zhɛre nza ta nci mbeli pɛtɛ.

¹⁰Katese vecia Nde sleke ŋkwa kala ghərə. Ma vəa ŋkwa shɛ ne, katezamte geva ghweme le gaka nya keve nda ghazlənə ke mbeli, katetere geva wəshi nyi pelɛ ghweme le ghwə, katemeha geva ghwə te yɛ hɛɗi le pɛtɛa wəshi nyi te.

¹¹Ma kwa nza pɛtɛa wəshi katezamte geva kala nya ne, fave mə wəsə nya hi yɛ kamene megela. Nda yɛ kadzeghwa kala nya ɗe Shala ba'a kanza dɛŋe dɛŋe te.

¹²Neghe yaneghe vecia Shala yɛ kase ba'a mawe yamawe se ta ŋkɛ kahe kahe yɛ. Ma te vecia shɛ ne, katetere ghweme va ghwə, katerɛɗɛ saseregwa va ghyana ta ghwə.

¹³Ama nahe Shala kemeɗeyi mɛnɛfɛa ghweme ba'a mɛnɛfɛa hɛɗi nya tenza nza tiɗiɗi te. Kaganda ne, gheŋkɛ yaneghe gheɓəmə.

¹⁴Vatse gɛ ka mcɛhɛ ɗa ganji, ma mbe neghe vecia shɛ ne, ntsə mə geva kanza wɛŋe wɛŋe ba'a kaɗema ŋele te gheyɛ kwa kema ta Shala yitea nza yɛ kwelɛŋe le gheŋkɛ.

¹⁵Ɗepete mə mbele yave ŋayɛ zereghe ghena ta Nde sleke ŋkwa, kala nya gezete ŋayɛ wəza meyɛ ɓəmə ba'a mcɛ ɓəmə Pol laka ntsehwele nya ndeke nda Shala.

¹⁶Tsagha rafate ŋkɛ mbe pɛtɛa palepa nyi geze ghena ŋkɛ te ghəa ghena shɛ. Kweci ŋkwa nyi nza fa ta nci dzawe dzawe ya mbe hɛ. Kazhɛre ghena nyi mbe ka ɗepema wəshi ba'a ka tekevema wəshi, kala nya mene hɛ le kweci bela nyi mbe Ghena ta Shala. Kezha za ta nci mene wəshi nyi kala nyi hɛ.

¹⁷Ama gheyɛ gɛ ka mcɛhɛ ɗa, nahe mbeli kegezete ŋayɛ ghena shɛ. Ntsehwele mə, yagha yɛ kazamte ghəa ŋayɛ le wəshi nyi mene ka ghema ta Shala. Tsagha ne, katenza bereteke mbe yɛ.

¹⁸Ama jive mə mbe kema mbe zlaɓa ba'a ɗepe Nde sleke ɓəmə ba'a Nde mbele ɓəmə Yɛsə Kriste. Tsahe ɓəmə ŋkɛ se tsetsenya pa kaghala ghala. Amɛn.