Read KapsikiDC 1 Zhaŋe 3 Bible Online

1 Zhaŋe 3 - KapsikiDC bible

1 Zhaŋe 3

¹Newe ma mə tsema tsema ɗehwe ɓəmə Yita nda heka ɓəmə ŋkɛ kaŋwalea ŋkɛ gi! Kaganda ne, ŋwalea ŋkɛ gheɓəmə. Vatse ɗepema ɓəmə mbeli nyi kwake te hɛɗi, va nya ɗepema Shala hɛ.

²Ka mcɛhɛ ɗa ganji, nahe gheɓəmə kenza kaŋwalea Shala tsetsenya, ama kenaka nza ta ɓəmə nya te kwete hɛ kancɛte geva we. Wa nya wəsə nya ɗepe gheɓəmə nya: ma vəa ŋkwa nya tenca Kriste ne, kala gheŋkɛ tenza gheɓəmə, va nya nza gheɓəmə katenewe ŋkɛ kala nya nza ŋkɛ.

³Ma yayata wəndə nya keve ghə kala nya te Kriste ne, ghəa ŋkɛ yazhɛre ŋkɛ wɛŋe, kale nya nza Yɛsə Kriste le ghəa ŋkɛ wɛŋe.

⁴Yayata wəndə nya kemene jaɗafa ne, wəsə kwa ndiremi yamene ŋkɛ. Kwa nza ŋkɛ jaɗafa ya kawəsə kwa ndiremi.

⁵Nahe yɛ keɗepe: nahe Kriste kencake geva kezha yaɓe yɛ jaɗafa, jaɗafa shɛ ya ci'a mbe we.

⁶Ma yayata wəndə nya kenza jikə le Yɛsə Kriste ne, kazhɛne ŋkɛ kamene jaɗafa we. Ma wəndə nya mba kamene jaɗafa ne, kenakɛ Yɛsə ŋkɛ we, keɗepe ŋkɛ ŋkɛ we.

⁷Ŋwalea ɗa, mba yɛ kesərə ghəa ŋayɛ kaghwete ŋayɛ wəndə. Ma wəndə nya kemene wəsə tiɗiɗi ne, tiɗiɗi ŋkɛ le ghəa ŋkɛ, kala nya nza Yɛsə Kriste tiɗiɗi.

⁸Ma wəndə nya mba kamene jaɗafa ne, ŋa gətəli ŋkɛ, kwa nza ŋkɛ nahe gətəli kemenete jaɗafa se vəashinyɛ. Kezha zamte slene ta gətəli fate fate ncake geva Wəzege ta Shala.

⁹Kazhɛne yayata wəndə nya kezhɛrenyɛ kawəzege ta Shala kamene jaɗafa we, kwa nza ŋkɛ berete ta mpi nya kese va Shala nde mene slene mbe. Ma kwa nza ŋkɛ kawəzege ta Shala ne, kazhɛne ŋkɛ kamene jaɗafa we.

¹⁰Wa nya wəsə nya keneheve ŋwalea Shala le ŋwalea gətəli nya: ma yayata wəndə nya kemenema wəsə nya tiɗiɗi ba'a nya keɗema menənyɛ ne, wəzege ta Shala ŋkɛ we.

¹¹Kwa nza ŋkɛ wa nya ghena nya fate yɛ se vəashinyɛ nya: ɗe ɓəmə ghəa ɓəmə.

¹²Nzama gheɓəmə kala Kayin ma, wəndəa Nde ndiremia mehele ŋkɛ, nahe ŋkɛ keslamte ghə te wəza meghekɛ. Tewəmbəreke wa slamte ghə ŋkɛ te wa? Va nya nza slene nyi mene Kayin kendiremi ndireminji, vəa ŋkwa nya nza ŋa wəza meghekɛ tiɗiɗia tiɗiɗia.

¹³Ka kesaka ma, nzama yɛ heheɓake kenza mbeli nyi te hɛɗi kazlɛ va gheyɛ ma.

¹⁴Nahe mə keɗepe nahe gheɓəmə keshave mbe mte kadzembe mpi, va nya ɗe ka kesaka meyɛ ɓəmə gheɓəmə. Ma wəndə nya keɗema ŋkwa ne, kenaka wəndə shɛ kashave mbe dzeve ta mte we.

¹⁵Ma yayata wəndə nya kezlɛ va wəza meghekɛ ne, nde pesle ŋkwa ŋkɛ. Nahe yɛ keɗepe kaɗema ŋkwa kenza ta mpi nya kaghala ghala shɛ mbe nde pesle ŋkwa.

¹⁶Wa nya tsetse ɗepete ɗe gheɓəmə: nahe Yɛsə Kriste kezamte mpia ŋkɛ kezha gheɓəmə. Ma gheɓəmə perə ne, nahe gheɓəmə kehi kaza mpia ɓəmə kezha ka kesaka meyɛ ɓəmə.

¹⁷Ma kenza kwete wəndə nya nza wəshi kezeme nyi kwake te hɛɗi shɛ ve, nda nakɛ wəza meghekɛ ŋkɛ shewə va titikwə ba'a nda ɗema ŋkɛ zəzə wəndəa shɛ ne, tsema nza ŋkɛ kaveyi ghəa kande ɗe Shala wa?

¹⁸Ŋwalea ɗa, ɗema ŋkwa gheɓəmə le mɛ ba'a ghena nyi zeɗe zeɗe ma, ama laka slene ba'a kaganda.

¹⁹Wa nya tsetse tenza gheɓəmə kaɗepete kenza nde kambeli nyi kezele kaganda gheɓəmə. Wa nya kala nya tenza wənəa ɓəmə gweɗakwe kwa kema ta Shala.

²⁰Kwa nza ŋkɛ ma kenza mehele ta ɓəmə kave ɓəmə fete ne, nahe gheɓəmə Shala ya kwele ma ke mehele ta ɓəmə ba'a nahe ŋkɛ keɗepe wəshi pɛtɛ.

²¹Ka mcɛhɛ ɗa ganji, ma keɗema mehele ta ɓəmə kave ɓəmə fete ne, kategezleŋema ghə gheɓəmə kwa kema ta Shala.

²²Ma yayata wəsə nya 'yɛwe gheɓəmə ne, kaŋ'we gheɓəmə ve, va nya nza gheɓəmə kahawe va ghena nyi gezete ŋkɛ ba'a nya mene wəsə nya zeɗehwe nda gheɓəmə.

²³Wa nya ghena nya geze ɓəmə ŋkɛ nya: nahe gheɓəmə kayɛ Shala te sləa Wəzege ta ŋkɛ Yɛsə Kriste ba'a kaɗe ghəa ɓəmə gheɓəmə, kala nya gezete ɓəmə Kriste.

²⁴Ma wəndə nya kehawe va ghena nyi gezete Shala ne, kanza ŋkɛ jikə le Shala, kanza Shala jikə le wəndəa shɛ perə. Wa nya tsetse ɗepe gheɓəmə mbe gheɓəmə Shala: laka Sefəa ŋkɛ nya ndeke ɓəmə ŋkɛ.