Read KapsikiDC Ka Meha ghwə 1 Bible Online

Ka Meha ghwə 1 - KapsikiDC bible

Ka Meha ghwə 1

¹Ma kwa sebe ta mte ta Zhozəwɛ ne, pa ka Israyɛl 'yɛwakɛ ghena va Mahwətə ma ke hɛ shɛ: «Wa hwelefe nya kelə te kema kezha mpa le ka Kanan wa?»

²Ma ke Mahwətə zhɛnete: «Hwelefe ta Zhəwda, kave hɛɗia shɛ 'ya mbeyitere berete ta ŋkɛ.»

³Ma ke mbelia Zhəwda sha hwelefe ta Simɛyon wəza meghekɛa Zhəwda: «Mbi ɓəmə le ghen'yɛ kakele hɛɗi nya keveyi geva kaŋa ɓəmə. Ve nda ɓəmə mpa kanya kwetɛŋe ke ka Kanan! Ma kwa sebe ta ŋkɛ nda lə mə le gheyɛ zlaɓe kakele ŋayɛ ŋa ŋayɛ hɛɗi.» Cape hwelefe ta Simɛyon le hwelefe ta Zhəwda,

⁴cape hɛ yitea mpa. Pa Mahwətə ndeke nda ka Kanan ba'a ka Pɛrɛs ke hɛ, pa hɛ mpəmte Zhili 10.000 mbe Bɛzɛk.

⁵Mbe melemea shɛ ne, pa ŋkɛ sləyi meghe Adoni-Bɛzɛk ba'a have nda mpa. Pa hɛ ɗate ka Kanan ba'a ka Pɛrɛs.

⁶Ntəŋə Adoni-Bɛzɛk yitea hwɛ. Tereŋe ka Israyɛl yite, pa hɛ keseve ŋkɛ ba'a slamte gweŋəa dzeve ba'a gweŋəa seɗa te.

⁷Tagha gɛ, ma ke meghe sha hɛ: «Mberefaŋemsə ka meghea kɛfi nyi ketseha kwetiɓəa ɗafa yitea tabelea ɗa, nahe mbeli keslamte gweŋəa dzeve ba'a gweŋəa seɗa te hɛ. Nahe Shala kemenete ɗa wəsə nya menete nda 'ya ke kweci!» Pa ka Israyɛl keleghe Adoni-Bɛzɛk kadzembe Zhɛrəzalɛm, kwagha mtenyɛ ŋkɛ.

⁸Pa ka Zhəwda have nda mpa ke Zhɛrəzalɛm ba'a kelehwe ŋkɛ. Pa hɛ mpəmte mbeli nyi mbe, pa hɛ ndəmte melemea shɛ le ghwə.

⁹Ma kwa sebe, cape hwelefe ta Zhəwda kampa le ka Kanan nyi nza meleme ta nci hwa ghweme, kwete bela ta hɛɗi nya laka bela kwa zeme ba'a meleme nyi kwake te ŋwela.

¹⁰Ntake hɛ kampa le mbeli nyi mbe meleme ta Hɛbron, nya nza sləa ŋkɛ kaKiriyat-Arba. Pa hɛ ɗate yɛ peləa Shɛshay, Ahiman ba'a Talmay.

¹¹Slə tagha ne, ntəŋə hwelefe ta Zhəwda yitea ɗa mbeli nyi mbe meleme ta Debir, nya heka mbeli vəashi kaKiriyat-Sɛfɛr.

¹²Ma ke Kalɛb: «Kave nda Aksa, wəzha ta ɗa 'ya kamale ke wəndə nya kenza kaɗate Kiriyat-Sɛfɛr ba'a kakelehwe melemea shɛ.»

¹³Otniyɛl wəzege ta Kenaz, wəza meghekɛa Kalɛb nya ɓɛhwɛ, nde kelehwe melemea shɛ, pa Kalɛb ndeke nda wəzha ta ŋkɛ kamale.

¹⁴Ma kwa ntsehe Aksa yitea Otniyɛl, ma ke shɛ: «'Yiwəakɛ wəve va yiteyɛ ɗa!» Pa ŋkɛ sawa nda pelɛ kwara ta nta, ma ke Kalɛb 'yɛwete ve: «Wa yaɗe na wa?»

¹⁵Ma ke zhɛnete: «Te zlaɓa ta ŋa, ndeke ɗa ghwa, kwa nza ŋkɛ ma ŋkwa nya ndeke ɗa na laka bela kwa zeme ne, keghwele ghwele ŋkɛ.» Pa Kalɛb ndeke nda ghwa pelɛ ghəa ŋkwa, pa ŋkɛ ndeke nda kwete kwake.

¹⁶Pa mekwea Moyize nya kande Kɛn slə mbe meleme nya nza Peha mbe zlaɓe le hwelefe ta Zhəwda kalə kanza te ɓerama ta Zhəwda, laka bela kwa zeme yitea Arad. Ntishɛ hɛ le nza hwa ka Amalɛk.

¹⁷Cape zhili nyi mbe Zhəwda yitea mpa zlaɓe le hwelefe ta Simɛyon, wəza meghekɛ Zhəwda. Pa hɛ ɗate ka Kanan nyi mbe meleme ta Sefat. Kala nya gezete Mahwətə ne, pɛtɛ hɛ teremte melemea shɛ. Ma tsetsenya gɛ, Horma heka ŋkɛ mbeli.

¹⁸Ɓiyitsa ne, pa ka Zhəwda kelehwe Gaza, Askalon, Ɛkron ba'a hɛɗi nyi kwa ghala le hɛ.

¹⁹Mahwətə le ghəa ŋkɛ ya le mbelia Zhəwda nda kelehwe meleme nyi hwa ghweme hɛ. Ndagwara shaŋe hɛ ve kaghate, va nya nza wəmata gədəwə nyi kalɛ va hɛ.

²⁰Pa mbeli ndeke nda meleme ta Hɛbron ke Kalɛb, kala nya gezeke Moyize. Pa ŋkɛ kelehwe meleme nya va yɛ peləa Anak nyi mahekene nyi mbe nyi le nza.

²¹Keŋkamte ka Zhɛbəs nyi mbe Zhɛrəzalɛm hwelefe ta Bɛnjamɛn we, pa ɓeshi hɛ le nza hwa ka Bɛnjamɛn mbe Zhɛrəzalɛm.

²²Pa mbelia Zhozɛf lə kampa le ka Bɛtɛl, nahe Mahwətə kenza le hɛ.

²³Pa hɛ ghwenakɛ ŋkwa kalə kanewemte meleme nya nza sləa ŋkɛ vəashi kaLəwz.

²⁴Pa mbeli nyi ghwenakɛ mbeli kanewe meleme nakɛ kwete wəndə shave mbe melemea shɛ. Ma ke hɛ shɛ: «Ncɛte n'yɛ tsema tsema nza ghen'yɛ kadzembe meleme nya, megela tenza ghen'yɛ laka gha.»

²⁵Pa wəndəa shɛ ncɛte nda ŋkwa kedzembe meleme ke hɛ. Pa mbelia Zhozɛf mpəmte mbeli nyi mbe melemea shɛ pɛtɛ, deke wəndəa shɛ le mbeli nyi kwa peləa ŋkɛ yasərəakɛ hɛ.

²⁶Cape hɛ kadzete hɛɗia ka Hɛt. Pa hɛ ŋate meleme nya heka mbeli kaLəwz. Mba sləa shɛ te pa ɓeshi nya.

²⁷Ma hwelefefia Manasɛ ba'a ŋa Zhozɛf ne, kese hɛ kaŋka mbeli nyi mbe Bɛt-Shɛyan, nyi mbe Ta'anak, nyi mbe Dor, nyi mbe Iblɛyam, nyi mbe Mɛgido, ya nyi mbe meleme nyi kwa ghala le hɛ we. Mba ka Kanan le nza ta nci mbe melemea shɛhɛ.

²⁸Pa le nya kemave berete ka Israyɛl ne, kese hɛ kaŋka hɛ we, ama slene mava yave nda hɛ ke hɛ le berete kamene.

²⁹Ma mbelia Ɛfrayim ba'a ŋa Zhozɛf ne, kese hɛ kaŋka ka Kanan nyi mbe Gɛzɛr le nza we. Mba hɛ kanza nza ta nci le mbelia Ɛfrayim.

³⁰Kese mbelia Zabəlon kaŋka ka Kanan nyi mbe Kitron ba'a nyi mbe Nahalal we. Mba hɛ kanza nza ta nci hwa mbelia Zabəlon, slene mava yaŋka hɛ hɛ yite.

³¹Kese mbelia Asɛr kaŋka mbeli nyi mbe Ako ba'a nyi mbe Sidon, ya nyi mbe Alab, nyi mbe Akzib, nyi mbe Hɛlba, nyi mbe Afɛk ba'a nyi mbe Rehob we.

³²Mba hɛ kanza nza ta nci le ka Kanan nyi mbe melemea shɛ, kwa ɗema keka hɛ hɛ.

³³Kese mbelia Nɛftali kaŋka mbeli nyi mbe Bɛt-Shɛmɛsh ba'a nyi mbe Bɛt-Anat we. Mba hɛ hɛ kanza nza ta nci le hɛ. Ama slene mava yaŋka hɛ hɛ yite le berete.

³⁴Pa ka Amor ŋkamte mbelia Dan nyi hwa ghweme le nza. Kepelakɛ hɛ hɛ kasawa te ŋwela we.

³⁵Mba ka Amor le nza ta nci mbe Har-Hɛrɛs, Ayalon ba'a Sha'albim. Temə kwele kwele ne, pa mbelia Zhozɛf hərəte hɛ ba'a ŋkeyite hɛ yitea slene mava le berete kamene.

³⁶Ma ghala ta ka Amor ne, laka bela kwa zeme, kaslə tagha laka ŋkwa kesame ta veci yitea wəmbəa yɛ Yɛte, kadzeyi laka ghala ta ka Ɛdom.