Read KapsikiDC Ka Meha ghwə 10 Bible Online

Ka Meha ghwə 10 - KapsikiDC bible

Ka Meha ghwə 10

¹Kwa sebe ta mte ta Abimɛlɛk, Tola, wəzege ta Pəwva le shia Dodo, mbe hwelefe ta Isakar, nde se kambelete mbelia ka Israyɛl. Mbe Shamir ŋkɛ le nza ta ŋkɛ, laka ŋkwa nyi hwa ghweme ta hɛɗia Ɛfrayim.

²Gheŋkɛ ya kande meha ghwə ta ka Israyɛl kava bakemsə mahekeneghəmbe, pa ŋkɛ mtenyɛ, pa mbeli lamte ŋkɛ kwa Shamir.

³Kwa sebe ta ŋkɛ se Yayir, nde Gala'ad. Gheŋkɛ ya kande meha ghwə ta ka Israyɛl kava bakemsə bakeghəmbe.

⁴Ŋwale mahekene ve nyi kedzeghwa te kwara lɛmə mahekenemsə, mahekenemsə meleme nyi ɓɛhwɛ ɓɛhwɛ va hɛ. Pɛtɛa nci mbe hɛɗia Gala'ad, pa ɓeshi zhɛkwa mbeli kaheka hɛ kameleme ta Yayir.

⁵Ma kwa mte Yayir ne, pa mbeli lamte ŋkɛ mbe Kamon.

⁶Pa ka Israyɛl kamene wəsə nya ndiremi kwa kema ta Mahwətə. Kahawe hɛ va yɛ shala Ba'al le shala nya kamale Astartɛ. Kahawe hɛ va yɛ shala ta ka Siri, ŋa ka Sidon, ŋa ka Mowab, ŋa ka Amon, ŋa ka Filisti. Pa hɛ ɗema Mahwətə kamene nda slene hɛ tɛape we.

⁷Pa Mahwətə hwepete wənə va ka Israyɛl, pa pelave nda hɛ ke ka Filisti le ka Amon.

⁸Se mɛa vəa shɛ, kajive kava meŋe degheseghəmbe, kasa yaka hɛ ba'a kampə ka Israyɛl nyi mbe Gala'ad le nza te hɛɗia ka Amor nyi laka ŋkwa kesame ta veci yitea hələa Zhəwrdɛŋe.

⁹Kashave ka Amon te kema ta Zhəwrdɛŋe kaɗa hwelefe ta Zhəwda, le ŋa Bɛnjamɛn, le ŋa Ɛfrayim. Kwetɛ kwetɛŋe mehele ta ka Israyɛl.

¹⁰Pa hɛ kaheka Mahwətə kezha kemane hɛ, ma ke hɛ shɛ: «Nahe ghen'yɛ kemenete ŋa fete, e'e, nahe ghen'yɛ keɗema ŋa, gha nya kaShala ta n'yɛ, kezha hawe va yɛ Ba'al.»

¹¹Ma ke Mahwətə sha hɛ: «Ma kwa ɗate ŋayɛ ka Ɛzhipte, le ka Amor, le ka Amon, le ka Filisti,

¹²le ka Sidon, le ka Amalɛk, le ka Mawon, pa yɛ heka ɗa kezha kemane ne, ashɛ 'ya kembeleke ŋayɛ shave mbe dzeve ta nci wəka?

¹³Ama gheyɛ ne, nahe yɛ keɗema ɗa kezha kweci shala. Vatse ɗema mbele ŋayɛ 'ya zhɛkwa.

¹⁴Heka mə kezha kemane ŋayɛ kweci shala nyi ntave yɛ. Hɛ nde mbele ŋayɛ kwa nza yɛ te yaka!»

¹⁵Ma ke ka Israyɛl sha Mahwətə: «Nahe ghen'yɛ kebezemte ghena. Mene n'yɛ wəsə nya nakɛ na megela sha gha. Ama ya tsagha shɛ ŋkɛ ne, mbelete n'yɛ zhɛkwa ɓeshi!»

¹⁶Ma kwa sebe ta ŋkɛ ne, pa hɛ sərəakɛ shala ta ka mentiɓə kamene nda slene ke Mahwətə kamɛnɛfɛ. Kazereghete yaka nya te ka Israyɛl Mahwətə kavə kwele kwele we.

¹⁷Pa ka Amon tsenete geva kamenete cɛ lekwesa ta nci laka hɛɗia Gala'ad. Pa ka Israyɛl tsenete geva kamenete ŋa nci cɛ lekwesa pelɛ Mispa.

¹⁸Ma ke mbeli ba'a mbeli nyi te ghə nyi mbe hwelefe nyi laka hɛɗia Gala'ad kwelɛ ghəa nci: «Wa wəndə nya ketelə kaha nda mpa ke ka Amon mpelɛa ma wa? Wəndəa shɛ nde tenza te ghəa mbeli nyi te hɛɗia Gala'ad pɛtɛ.»