Read KapsikiDC Ka Meha ghwə 13 Bible Online

Ka Meha ghwə 13 - KapsikiDC bible

Ka Meha ghwə 13

¹Zhɛne ka Israyɛl kamene wəsə kwa ndiremi kwa kema ta Mahwətə zhɛkwa. Vatse pelave nda hɛ Mahwətə ke ka Filisti kava wəfaɗemsə.

²Ma te hɛɗia Sora, le kwete shɛ wəndə kwa yita ta ka Dan sləa ŋkɛ Manowa. Kajɛŋa male ta ŋkɛ.

³Ma te kwete hɛ ne, pa nde ghwene ta Mahwətə ncake nda geva ke malea shɛ, ma ke shɛ: «Nahe 'ya keɗepe kajɛŋa na, katedzawa hwə na kaya wəzege teza.

⁴Tsetsenyanyɛ ne, ya ghəa ŋa, mba na kesa tɛa rɛzɛŋe le yayata wəsə keghwəyi ŋkwa ba'a mba na kezeme wəsə kezeme nya wale wale,

⁵kwa nza ŋkɛ katedzawa hwə na kaya wəzege teza. Kaha mpiɗi mbeli kadzembe ghəa ŋkɛ we, kwa nza ŋkɛ kaŋa Shala veyi geva ŋkɛ se kwa hwə, gheŋkɛ nde tembele ka Israyɛl va ka Filisti.»

⁶Pa malea shɛ jɛghɛ ba'a gezete nda ke za nta, ma ke: «Nahe nde wəndəa Shala kencɛte ɗa geva. Kala nde ghwene ta Shala pa ta ŋkɛ, kaganda benake wəndə ve. Kese 'ya ka'yɛwe ve ne, tema se na wa 'ya shɛ we, ama kese kancɛ ɗa sləa ŋkɛ we.

⁷Ma ke sha 'ya: katedzawa hwə na kaya wəzege teza. Yagha na kasa tɛa rɛzɛŋe le yayata wəsə keghwəyi ŋkwa mbe nza ta ŋa ba'a mba na kezeme wəsə kezeme nya wale wale, kwa nza ŋkɛ kaŋa Shala veyi ŋkɛ tewə ŋkɛ keya ba'a pa te nza ta mpia ŋkɛ.»

⁸Ma ke Manowa səkwəte Mahwətə: «Nde sleke ɗa, te zlaɓa ta ŋa, zhɛneke n'yɛ wəndəa Shala nya ghweneke nya na vecagha kase sha ghen'yɛ, kezha tekete n'yɛ wəsə nya temene ghen'yɛ le wəzege teza nya keteya nya.»

⁹Pa Shala fate səkwə ta Manowa: zhɛne nde ghwene ta Shala kase sha male vəa ŋkwa nya nza nde kwamte. Ashɛ za nta tagha yite we.

¹⁰Tereŋe tehwɛ kahe kahe kalə kageze nda ke za nta: «Wəndə nya kese nya sha 'ya vecagha gɛ ne, na kencɛte ɗa geva zhɛkwa.»

¹¹Cape Manowa kwa sebe ta male ta ŋkɛ, pa hendave nda geva ke wəndəa shɛ, ma ke shɛ: «Gha nde gezete nda ghena ke male nya na?» -- «E'e, 'ya ŋkɛ», a ke zhɛnete nda.

¹²Ma ke Manowa shɛ: «Ma kemenete geva ŋkɛ kala ghena ta ŋa nya ne, tsema tenza ghen'yɛ laka gheŋkɛ wa? Wa yahi ghen'yɛ kamene kezha gheŋkɛ wa?»

¹³Pa nde ghwene ta Mahwətə zhɛnete nda ke Manowa: «Mba malea shɛ kekwaɗe wəshi nyi gezete nda 'ya pɛtɛ:

¹⁴mba nde kendɛame ya ta rɛzɛŋe, mba kesa ya wəsə nya keghwəyi ŋkwa, yagha kazeme wəsə kezeme nya wale wale. Pa kaya ghena ta ɗa nya gezave nda 'ya megela.»

¹⁵Ma ke Manowa sha nde ghwene ta Mahwətə: «Ndeke n'yɛ hweŋkwa kakeseyi ŋa ghen'yɛ katemə ɓɛhwɛ, katehene ŋa zhɛgwəa kwe ghen'yɛ.»

¹⁶Ma ke nde ghwene ta Mahwətə zhɛnete nda: «Ya 'ya nza katemə ne, ashɛ 'ya katezeme wəsə kezeme ta ŋa we. Ama keɗe na kadzeghe nda melɛ kwa tere tere ke Mahwətə, menete.» Keɗepe Manowa kande ghwene ta Mahwətə ŋkɛ we.

¹⁷Ma ke 'yɛwete ve: «Gezete n'yɛ sləa ŋa nda ɗepe ve zləvə ghen'yɛ te gha kemenete geva ghena nya gezete nya na.»

¹⁸Ma ke nde ghwene ta Mahwətə zhɛnete nda: «Yitea wa ɗe na kaɗepe slə ɗa wa? Kaslə meŋele sləa shɛ.»

¹⁹Pa Manowa kelete zhɛgwəa kwe ba'a wəsə nya keleke mbeli, pa beteyi hɛ te gela kezha ve nda ke Mahwətə, gheŋkɛ nya kemene wəshi meŋele. Ma vəa ŋkwa nya newe ŋkwa yɛ Manowa le male ta ŋkɛ ne,

²⁰geɗeɗe n'yia ghwə tagha kadzeme yitea ghweme, tarame nde ghwene ta Mahwətə pelɛ reghwetɛ hwa ghɛnia ghwə. Ma kwa nakɛ hɛ le male ta ŋkɛ, gwəɗəŋə hɛ ntiŋə ghə mbe hɛɗi.

²¹Nahe Manowa keɗepe tsetsenya gɛ kande ghwene ta Mahwətə ŋkɛ. Kezhɛne nde ghwene ta Shala kancɛ nda geva ke hɛ zhɛkwa we.

²²Ma ke Manowa sha male ta ŋkɛ: «Ghəpə yite we, katempə mə kwa nza ŋkɛ na mə kenakɛ Shala.»

²³Ma ke male ta ŋkɛ: «Ma keɗe Mahwətə kampə ɓə ne, nza kakele melɛ ɓə kwa tere tere nya ŋkɛ le kweci wəshi nyi we. Nza ashɛ kancɛ wəshi nyi nakɛ nyi mə le nyi gezete ɓə ŋkɛ kafate mə we.»

²⁴Pa male ta Manowa yake wəzege teza ba'a hekate nda slə kaSamson. Kakele wəzegea shɛ, pa Mahwətə wəpikɛ.

²⁵Ma te kwete hɛ kwa nza Samson mbe ghedəkwəa Dan, kwelɛ yɛ Sora le Ɛshetawol, pa Sefəa Mahwətə ghate kagagəzə ŋkɛ.