Read KapsikiDC Ka Meha ghwə 17 Bible Online

Ka Meha ghwə 17 - KapsikiDC bible

Ka Meha ghwə 17

¹Nahe kwete wəndə nya nza sləa ŋkɛ kaMika kese pelɛ ghweme ta Ɛfrayim.

²Ma te kwete hɛ ne, ma ke sha meghekɛ: «Mba yitea ghəa ŋa, ma vəa ŋkwa nya kelehwe dəɓərəa mze kwa tɛawetɛa mbeli slibə ba'a gwəmsə yitea gha ne, nahe na kebezlakɛ ghərəa shɛ kwa kema ta ɗa. Yawa, va 'ya mze kwa tɛawetɛa shɛhɛ, 'ya nde kelehwe hɛ.» Ma ke meghekɛ shɛ: «Pa Mahwətə wəpikɛ ŋa wəzege ta ɗa.»

³Pa Mika ŋkikɛ nda cɛdɛ nya meŋe kwetɛŋeghəmbe nyagha ke meghekɛ, ma ke shɛ: «'Ya kaveyi cɛdɛ nya kaŋa Mahwətə, kezha vɛsə ŋa pa ta wəsə kala shala, wəzege ta ɗa, 'ya kave ŋa tsetsenya.»

⁴Pa ŋkɛ ndeke nda cɛdɛa shɛ ke meghekɛ zhɛkwa. Pa kelete cɛdɛ gwəmsə bake kandeke nda ke nde vɛsə mze. Pa wəndəa shɛ vɛsəte pa ta wəsə kashala, pa mbeli veyi ki ghɛa Mika.

⁵Ma Mika shɛ ne, ŋkwa kesəkwə shala ya ve ki ghɛa ŋkɛ. Pa ŋkɛ menete pa ta wəsə kala shala le yɛ kweci pa ta wəshi tewəfərə, pa veyi kwete wəzege ta ŋkɛ kande dzeghe nda shala.

⁶Ma vəa ŋkwa shɛ ne, meghe mbe ka Israyɛl we. Yayata wəndə kamene wəsə nya nakɛ ŋkɛ megela shɛ.

⁷Le kwete mempɛhweta shɛ kande Lɛvi kwa Bɛtelɛhɛm, te hɛɗia hwelefe ta Zhəwda.

⁸Pa slənyɛ mbe Bɛtelɛhɛm kazele kwete ŋkwa kenza. Ma kadzeghwanyɛ ŋkɛ ne, pa kekave ghɛa Mika pelɛ meleme nyi hwa ghweme ta Ɛfrayim.

⁹Ma ke Mika 'yɛwete ve: «Tema se na wa?» Ma ke zhɛnete nda: «Nde Lɛvi nya mbe Bɛtelɛhɛm te hɛɗia Zhəwda 'ya, 'ya kasepa ŋkwa kenza.»

¹⁰Ma ke Mika shɛ: «Nza ŋa ki ghɛa ɗa nda nza na kande dzeghe Shala ta mbelia ɗa, nda ŋki ŋa 'ya kadəɓərəa mze kwa tɛawetɛa meŋe mbe va, lekwesa le wəshi kezemea nde Lɛvi ne, kave ŋa 'ya.»

¹¹Pa yɛte kanza ki ghɛa Mika, pa veyi kala wəzege ta ŋkɛ.

¹²Pa Mika veyi kande dzeghe shala ta ŋkɛ ntishɛ ŋkɛ ki ghɛa ŋkɛ.

¹³Ma ke Mika: «Ma zəzə 'ya ne, megela temene ɗa Mahwətə tsetsenya kwa nza nde Lɛvi kande dzeghe shala ta ɗa.»