Read KapsikiDC Ka Meha ghwə 18 Bible Online

Ka Meha ghwə 18 - KapsikiDC bible

Ka Meha ghwə 18

¹Ma vəa ŋkwa shɛ ne, meghe mbe ka Israyɛl we. Kazele ŋa nci ŋkwa kenza hwelefe ta Dan, kwa nza ŋkɛ hwa kweci hwelefefi nyi kekemave ŋkwa ne, kekemave hɛ kaba we

²Pa ka Dan tsehave mbeli nyi kehwepe ghə mcɛfe. Pa hɛ ghwenakɛ hɛ se mbe hɛɗia Sora ba'a Ɛshetawol kalə kanewe hɛɗia shɛ megela. Ma ke sha hɛ: «Kwiɗi mə kalə kanewe hɛɗi.» Pa mbeli nyi mcɛfea shɛhɛ ntsehe pelɛ ghweme ta Ɛfrayim ba'a ghereŋenji takwa yitea ghɛa Mika nya hɛnji hɛ ki.

³Ma vəa ŋkwa nya se hɛ takwa takwa yitea ghɛa Mika ne, pa hɛ ɗepete ŋwələa nde Lɛvi nyagha. Pa hɛ hendave nda geva, ma ke hɛ shɛ: «Wa nde keleke ŋa teke wa? Wa yamene na teke wa? Wa nde keseyi ŋa teke wa?»

⁴Ma ke zhɛnete nda ke hɛ: «Mika nde veyi ɗa teke kande dzeghe shala ta ŋkɛ nda ŋki ɗa ŋkɛ.»

⁵Ma ke hɛ shɛ: «'Yɛwakɛ va Shala kenza nde megela tenza dzeghwa ta n'yɛ nya.»

⁶Ma ke nde dzeghe shala sha hɛ: «Ghazlənəma yɛ ma! Mbe beghe ŋayɛ Mahwətə mbe dzeghwa ta ŋayɛ.»

⁷Pa mbeli nyi mcɛfe nyighɛ slə yitea dzeghwa ta nci kadzawa pa kwa Layish. Pa hɛ sləyi mbeli nyi gwezlayɛ, nyi mbe kwelɛŋe ba'a gweɗakwe, kala ka Sidon. Wəsə shɛ kaŋelekɛ wəndə nya kesleke hɛɗia shɛ wəndə le we. Cakeɗake melemea shɛ le mbelia ka Sidon.

⁸Pa mbeli nyi mcɛfe nyighɛ zhɛneke geva kase sha ka menəhɛ nci kwa Sora ba'a Ɛshetawol, pa mbelia nci ka'yɛwe va hɛ wəshi nyi nakɛ hɛ.

⁹Ma ke hɛ sha hɛ: «Nde mə, dzawa ɓəmə kaɗa ka Layish, nahe ghen'yɛ kenakɛ hɛɗia shɛ megela ŋkɛ. Dambeghəma ŋayɛ yɛ gəmə kaɗema lə kazeme hɛɗia shɛ ma!

¹⁰Ma vəa ŋkwa nya tentsehe yɛ te ne, katenakɛ mbeli nyi kegezleŋema ghə yɛ te hɛɗi nya bezle. Kateve ŋayɛ hɛɗia shɛ Shala. Wəsə nya ɗe mbeli kwake te hɛɗi shɛ kaɗema te we.»

¹¹Tagha gɛ, cape mbeli gwəmsə ŋkwaŋe zhili se mbe hwelefe ta Dan, le wəshi kempa kalə yitea mpa, slə mbe Sora le Ɛshetawol.

¹²Pa hɛ lə kamenete ghedəkwəa nci laka ŋkwa kepəkwə ta veci sha Kiriyat-Yɛyarim te hɛɗia Zhəwda. Vatse kemave slə ŋkwa shɛ kaMahanɛ-Dan, geze ta ŋkɛ “Ghedəkwəa Dan”, mba sləa shɛ pa tsetsenya.

¹³Slə tagha, pa hɛ dzeme bela nyi hwa ghweme ta Ɛfrayim kalə takwa yitea ghɛa Mika.

¹⁴Ma zhili nyi mcɛfe nyi kenewemte Layish ne, ma ke hɛ gezete nda ke mbelia nci: «Nahe yɛ kenakɛ wəsə nya zhɛrete mbeli kashala ba'a kweci pa ta wəshi nyi tewəfərə ki kwete ghɛ nya, tsagha kweci nyi vɛsəte mbeli yitea mze tse yi? Gheyɛ ka ɗepe wəsə nya temene yɛ le.»

¹⁵Pa mbeli nyi mcɛfe nyighɛ lə kadzeki ghɛa Mika kezha 'yɛwe tsema tsema nza ta ŋkɛ va nde Lɛvi.

¹⁶Ma vəa ŋkwa shɛ ne, mbelia Dan nyi gwəmsə ŋkwaŋe nyi le wəshi kempa va hɛ, pelɛke hɛ mɛa degha.

¹⁷Pa mbeli nyi mcɛfe dzeki ba'a fəte wəshi nyi zhɛrete mbeli kashala ba'a kweci pa ta wəshi nyi keveyi geva tekeleke, tsagha wəsə nya zhɛrete mbeli kashala nya fiaghe mze kwa ta ta mbeli kənə. Pelɛke nde dzeghe shala mɛa degha le mbeli nyi gwəmsə ŋkwaŋe le wəshi kempa.

¹⁸Ma kwa nakɛ mbeli nde dzeghe shala kadzeki ghɛa Mika ba'a kafə wəshi nyi zhɛrete mbeli kashala ba'a kweci wəshi nyi keveyi geva tekeleke ne, ma ke 'yɛwete va hɛ: «Wa wəsə nya mene nya yɛ wa?»

¹⁹Ma ke hɛ zhɛnete nda: «Ŋzlete mɛa ŋa, gezema ghena na ya kwetɛŋe ma! Zare n'yɛ, nza kande dzeghe Shala ta hwelefe ta n'yɛ. Nyama yaɗe na kwelɛ yɛ nza kande dzeghe shala ta ghɛa wəndə kwetɛŋe le ŋa pɛtɛa hwelefe ta Israyɛl wa?»

²⁰Pa nde dzeghe Shala fəte wəshi nyighɛ, ntəŋə ŋkɛ yitea mbeli, fare fare wənəa ŋkɛ.

²¹Pa mbelia Dan zhɛrete geva kase, pa hɛ tseneyi ŋwale le wəshi keseɗa le yɛ wəshi nyi kele mbeli kwa ghə te kema.

²²Nahe hɛ kelə cakeɗake le ghɛa Mika nda tetsenete geva hɛ le yɛ ka ghedəkwəa ŋkɛ kakeka hɛ.

²³Pa hɛ tsate lewela yitea mbelia Dan, pa hɛ ka'yɛwe va Mika: «Kawa yaheka na kala nya wa?»

²⁴Ma ke sha hɛ: «Pa yɛ fəhwe shala nyi menete 'ya le nde dzeghe shala ta ɗa. Wa kwete wəsə nya ketene va 'ya wa? Tsema geze ɗa yɛ ɓiyitsa: ‹Wa wəsə nya va gha wa›, a pe yɛ?»

²⁵Ma ke hɛ shɛ: «Gezema ghena ta ŋa na teke yagha mbeli nyi tehwepe nyi le wənə kaɗa ŋa, yagha na kazelave nda za ta mpia ŋa ke ghəa ŋa le mbeli nyi kwa yita ta ŋa ma.»

²⁶Cape hɛ yitea dzeghwa ta nci. Ma kwa nakɛ Mika berete ma hɛ ne, pa zhɛrete geva ba'a senyɛ sha ghɛ.

²⁷Pa mbelia Dan fəhwe wəshia Mika nyi menete ŋkɛ ba'a kelehwe nde dzeghe shala nya kemene nda slene. Pa hɛ lə kaha nda mpa ke Layish, kampəmte mbeli nyi gwezlayɛ ba'a nyi kegezleŋema ghə mbe le kafayɛ, kandəmte meleme le ghwə.

²⁸Layish ne, kwa zlərə ŋkɛ kwelɛ yɛ Bɛt-Rehob, cakeɗake le Sidon. Ma mbelia nyi mbe ne, wəndə nya kesleke hɛ shɛ laka kwete ŋkwa we. Vatse ɗema wəndə kekemane hɛ shɛ. Pa mbelia Dan ŋate melemea shɛ kantishɛnji mbe.

²⁹Pa hɛ mbeɗemte sləa Layish kandeke nda sləa Dan shia nci, wəzege ta Zhakob.

³⁰Pa hɛ veveyi wəshi nyi zhɛrete mbeli kala shala nyi kese kaŋa Mika kezha hawe hɛ va hɛ. Yonatan, wəzege ta Gɛrshom shia Moyize, ya kande dzeghe Shala ta hwelefe ta Dan. Mba slenea shɛ va ŋwalea Yonatan kaka dzeghe Shala mbe hwelefe ta Dan pa te və nya fəhwe hɛ mbeli.

³¹Pa hɛ veyi wəshi nyi zhɛrete nyi mbeli kashala pa te və nya nza ghɛa Shala mba mbe Silo.