Read KapsikiDC Ka Meha ghwə 21 Bible Online

Ka Meha ghwə 21 - KapsikiDC bible

Ka Meha ghwə 21

¹Ma kwa tsenete geva ka Israyɛl pelɛ Mispa, pa hɛ zemete fela yagha wəndə hwa hɛ kave nda wəzha ta ŋkɛ ke wəndəa ka Bɛnjamɛn kawəme ma.

²Ma te nyagha və ne, pa mbeli dzeme Bɛtɛl ba'a ntishɛnji pelɛagha pa va tɛhwɛɗi kwa kema ta Shala. Pa hɛ ŋgaɗete ghə ba'a nehwenete nehwene kwele kwele.

³Ma ke hɛ gezete: «Shala Mahwətə ta Israyɛl, va wa nza ndiremi nya shɛ wa? Va wa nda za geva sebe ɓeshi te kwete hwa yitehɛ nyi mbe Israyɛl wa?»

⁴Masheke masheke te hendɛ ta ŋkwa ne, pa mbeli ŋate reghwetɛ te ŋkwa shɛ ba'a dzeghekɛ yɛ melɛ kwa tere tere ba'a yɛ melɛ kejikə ghə.

⁵Kwa sebe ta ŋkɛ, ma ke ka Israyɛl gezete: «Hwa pɛtɛa yitehɛ nyi mbe Israyɛl ne, nyama yita nde ɗema kese yitea tsene nya kemenete geva nya kwa kema ta Mahwətə wa?» Kwa nza ŋkɛ ne, nahe hɛ kezemete fela kapesle yayata wəndə nya ke kedzemema sha Mahwətə pelɛ Mispa.

⁶Pa ka Israyɛl zhɛakɛ heli yitea ka Bɛnjamɛn nyi kaka menəhɛ nci. Ma ke hɛ gezete: «Ɓeshi ne, nahe kwete yita kentamte geva shave hwa ka Israyɛl.

⁷Tsema temene gheɓəmə kezha zele nda mi ke ka Bɛnjamɛn nyi ketene teghweme, kwa nza ŋkɛ nahe gheɓəmə kezemete fela kaɗema kave nda ŋwalea kwɛa ɓəmə ke hɛ wa?»

⁸Ntake hɛ ka'yɛwe kwelɛ ghəa nci kenza nde le kwete yita shɛ mbe hwelefe ta ka Israyɛl nya kesema pelɛ Mispa kwa kema ta Mahwətə. Pa mbeli ntsate kese wəndə ya kwetɛŋe hwa ka Yabɛsh nya mbe Gala'ad tagha mbe ghedəkwə te ŋkwa nya se tsene nya wəba we.

⁹Ma kwa rafe mbeli nyi tagha mbe tsene mbeli ne, ya kwetɛŋe kese wəndəa Yabɛsh tagha we.

¹⁰Pa mbeli nyi mbe tsene ghweneghe mbeli nyi kehwepe ghə 12.000 kalə kadzembe Yabɛsh, ma ke hɛ sha hɛ: «Kwiɗi mə kalə kampə mbeli nyi mbe Yabɛsh, te hɛɗia Gala'ad, zlaɓe le mi ba'a ŋwale.

¹¹Katempə zhili yɛ kala nza ta nci pɛtɛ ba'a mi nyi yitea zhili. Tsetse temene yɛ.»

¹²Ma hwa mbeli nyi mbe meleme ta Yabɛsh ne, pa hɛ sləyi ŋwalea kwɛ gwəmsə wəfaɗe nyi kesema le zhili. Pa hɛ fəke hɛ kase kadzembe ghedəkwəa Silo.

¹³Ma kwa sebe ta ŋkɛ, pa mbeli nyi mbe tsene nya wəba ghwenakɛ mɛ kalə kageze nda ke mbelia Bɛnjamɛn nyi kewəfərə nci pelɛ ghweme ta Rimon, kezha ve nda kwelɛŋe ke hɛ.

¹⁴Pa ka Bɛnjamɛn zhɛneke geva kase kadzembe meleme kahe kahe. Pa mbeli ndeke nda mi nyi mpəmtema mbeli mbe Yabɛsh ke hɛ, ama dewə nda mia shɛ ke hɛ pɛtɛa nci.

¹⁵Kazhɛ nda helia nci ke ka Israyɛl yitea mbelia Bɛnjamɛn, kwa nza ŋkɛ nahe Mahwətə keŋeyi fenagwə kwelɛ hwelefe ta kaIsrayɛl.

¹⁶Ma ke mbelia jama nyi te ghəa tsene nya wəba: «Mi shɛ ketene mbe hwelefe ta Bɛnjamɛn we. Tsema mene mə kezha zele nda mi ke zhili nyi ketene teghweme wa?

¹⁷Katesərə nda hwelefe gheɓəmə ke mbelia Bɛnjamɛn yagha kwete hwelefe ta Israyɛl kazamte geva.

¹⁸Ama kashɛ mə ndeke nda hweŋkwa ke hɛ kawəme ŋwalea kwɛa ɓəmə we, kwa nza ŋkɛ na mə kezemete fela kabezla wəndə nya keve nda wəzha ta ŋkɛ ke nde Bɛnjamɛn kawəme mbeli.»

¹⁹Pa hɛ zəzəte katelə hɛ mbe hɛ nya katemene gəsəkəa Mahwətə nya mene mbeli mbe va mbe Silo, meleme nya laka bela kwa gwela yitea Bɛtɛl, laka bela kwa zeme yitea Lebona ba'a laka same ta veci yitea hweŋkwa nya kejikəte Bɛtɛl le Sishɛm.

²⁰Ma ke hɛ ncɛte nda ntsehwele ke ka Bɛnjamɛn: «Kwiɗi mə wəfərə ŋayɛ mə mbe wəvea rɛzɛŋe!

²¹Nda newe yɛ, ma kwa se ŋwalea kwɛa ka Silo yitea beke ne, yayata wəndəa ŋayɛ kakese wəzha makwa, kakele kalə sha hɛɗia Bɛnjamɛn kezha nza kamale ta ŋkɛ.

²²Ma kese yiteyɛa nci keɗema ka kesaka megheyɛa nci kave n'yɛ mpa ne, kageze nda ghen'yɛ ke hɛ: kasəkwə ŋayɛ ghen'yɛ kezha fate nza ta mbelia Bɛnjamɛn yɛ kwa nza ŋkɛ shaŋe ghen'yɛ va mi ke hɛ pɛtɛ vəa ŋkwa mpa nya mbe Yabɛsh. Ma kwa ɗema ŋkɛ, gheyɛ ka ndeke nda ŋwalea ŋayɛ kami ke hɛ we, kashɛ mbeli ve ŋayɛ fete va nya yipətema meɗe mɛa ŋayɛ yɛ we.»

²³Pa mbelia Bɛnjamɛn kelete ghena shɛ: pa hɛ keseve mi kala nya ɗe hɛ te ghəa nci hwa ŋwalea ka Silo nyi kese yitea beke kakeleghe hɛ kadzete hɛɗia nci. Zhɛne hɛ kadzete hɛɗia nci kaŋate meleme ta nci kanza mbe.

²⁴Pa kweci ka Israyɛl peslenji mbe tsene nya wəba. Yayata wəndə kalə sha hwelefe ta ŋkɛ mbe yita ta ŋkɛ te hɛɗia ŋkɛ.

²⁵Ma te nyagha və ne, meghe shɛ hwa ka Israyɛl we, kala nya nakɛ yayata wəndə megela mene ŋkɛ.