Read KapsikiDC Ka Meha ghwə 3 Bible Online

Ka Meha ghwə 3 - KapsikiDC bible

Ka Meha ghwə 3

¹Pa Mahwətə sərəakɛ hɛ kanza te hɛɗia shɛ. Gheŋkɛ ɗe kadzeghe ka Israyɛl nyi keɗema ghena ta mpa pɛtɛ kezha ŋkamte ka Kanan.

²Kaɗe ŋkɛ kezha tekeve mpa mbeli nyi mbe vəa shɛ, nyi keghama kase kwamte mpa.

³Wa nyi mbeli nyi sərəakɛ nyi Mahwətə te hɛɗia shɛ: ka meghe mcɛfe nyi kesleke ka Filisti, pɛtɛa ka Kanan le ka Sidon. Pa sərəakɛ ka Hava nyi pelɛ ghweme ta Liban, se te ghweme ta Ba'al-Hɛrmon hwa'a kwa Lebo-Hamat.

⁴Mahwətə kaɗe mene slene le hɛ kezha newe kenza nde kateyɛ nda fete ka Israyɛl, kwa nza nde nahe ŋkɛ kendeke nda wəsə mahalegəa ŋkɛ ke ka shihɛ nci laka wəndə nya kwelɛ hɛ Moyize.

⁵Ntishɛ ka Israyɛl hwa ka Kanan, ka Hɛt, ka Amor, ka Pɛrɛs, ka Hava, le ka Zhɛbəs.

⁶Mbe wəme ŋwalea kwɛa nci hɛ kami, mbe ve nda zhigə ŋa nci hɛ ŋwalea kwɛ ke ŋwale tezhilia mbeli nyighɛ kami. Kahawe hɛ va yɛ shala ta nci perə.

⁷Wəsə kwa ndiremi yamene ka Israyɛl kwa kema ta Shala Mahwətə ta nci. Pa hɛ zaghəyite ŋkɛ kezha hawe va yɛ Ba'al ba'a yɛ Ashɛra.

⁸Pa Mahwətə hwepete wənə va hɛ, pa ŋkɛ veyi hɛ mbeyitere berete ta Kəwshan-Rishatayim, meghea ka Mɛzopotami, kava deghese.

⁹Katsa nda lewela ka Israyɛl ke Mahwətə, pa Mahwətə kaghwene wəndə kambele hɛ. Otniyɛl, wəzege ta Kəwnaz, wəza meghekɛ Kalɛb nya ɓɛhwɛ.

¹⁰Pa Sefəa Shala dzembenyɛ pa ŋkɛ zhɛrenyɛ kande meha ghwə ta mbelia ka Israyɛl. Cape Otniyɛl yitea mpa, pa Mahwətə ndeke nda berete te ghəa meghea ka Kəwshan-Rishatayin

¹¹Pa kwelɛŋe te hɛɗi kava wəfaɗemsə. Ca mtiwə Otniyɛl wəzege ta Kenaz.

¹²Zhɛne ka Israyɛl kamene wəsə kwa ndiremi kwa ntsə ta Mahwətə. Vatse mtsehete nda berete Mahwətə ke Ɛglon, meghea ka Mowab, kezha ɗa ka Israyɛl.

¹³Pa Ɛglon jikəte geva le ka Amon ba'a le ka Amalɛk, cape kaɗa ka Israyɛl. Pa hɛ kelehwe meleme ta Peha.

¹⁴Va meŋe degheseghəmbe menete ka Israyɛl mbe dzeve ta Ɛglon, meghea ka Mowab.

¹⁵Pa hɛ tsave nda lewela ke Mahwətə kezha kemane, pa Mahwətə ghwenakɛ nde mbele hɛ, Ɛhəwd, wəndə nya kagwela nya kawəzege ta Gɛra, kwa yita ta Bɛnjamɛn. Pa ka Israyɛl ghwenakɛ ŋkɛ le wəshi gəmə ke Ɛglon, meghea ka Mowab.

¹⁶Pa Ɛhəwd gezlate kafayɛ nya nza mɛ bake te, gare mcɛfemsə kwa gwəmsə ta bela ta mɛtre. Pa ŋkɛ hwepeyi mbeyitere lekwesa ta ŋkɛ, te ghwela kwa zeme.

¹⁷Pa ŋkɛ lə kandeke nda wəshi ke Ɛglon, wəndə kedekenyɛ ŋkɛ.

¹⁸Ma kwa ndeke nda wəshi gəmə ŋkɛ ne, Ɛhəwd hɛ le mbeli nyi kefəghe wəshia shɛhɛ lə ŋkɛ.

¹⁹Ma kwa kekave ŋkwa wəshi nyi zhɛrete mbeli kashala hɛ takwa yitea Gilgal ne, pa ŋkɛ zhɛnete geva kalə te sebe, ma ke: «Meghea ɗa, kaɗe 'ya kaŋwashɛ ŋwashɛ le gha.» Pa meghe gezete nda ke ka mene nda slene kasərə ŋkɛ, pɛtɛ hɛ slənji.

²⁰Mentishɛ Ɛglon te hɛɗi mbe cɛ nya lɛnɛa nya pelɛ ghəa cɛ nya kehite geva kaŋa ŋkɛ. Ma ke Ɛhəwd shɛ: «Ghena ta Shala ya va 'ya kezha gha.» Pa meghe satenyɛ te ŋkwa kenza ta ŋkɛ.

²¹Le dzeve kwa gwela ne, pa Ɛhəwd nteɗeve kafayɛ nya te ghwela kwa zeme ve, tɛapa'a ŋkɛ shɛ te hwə va meghe.

²²Pa nde 'yiame geva mbe zlaɓe le ghə, pa merege zhiɓəyi geva kənəa hwa, va nya ɗema Ɛhəwd kese kanteɗe ŋkɛ.

²³Ma kwa sebe ta ŋkɛ, pa Ɛhəwd ŋzlete cɛ le lakelɛ, pa ŋkɛ shavenyɛ kwetere wəmbə laka kwete mɛa cɛ.

²⁴Ma kwa shavenyɛ ŋkɛ ne, se ka mene slene ta meghe ne, teŋzle ŋkwa le lakelɛ. Ma zəzə hɛ ne, meghe nza kanteɗe geva ta ŋkɛ mbagha, a ke hɛ.

²⁵Mba hɛ kaneghe kavə kwele kwele ne, keghwenemte ŋkwa meghe we. Tagha gɛ, pa hɛ kelete lakelɛ, pelemte ba'a ntsate wəndə ke hɛ tehwepərə te hɛɗi kemte mte!

²⁶Ma mbe və nyagha ne na Ɛhəwd kehwɛnyɛ. Nahe ŋkɛ kezlakemte ŋkwa wəshi nyi zhɛrete mbeli kashala kambelenyɛ laka hɛɗia ka Sɛyira.

²⁷Ma kwa ntsehe ŋkɛ tagha ne, ntake ŋkɛ kavɛ veke pelɛ ghweme ta hɛɗia Ɛfrayim, kezha tsene ka Israyɛl. Pa hɛ sawa pelɛ ghweme kwetere wəmbəa ŋkɛ.

²⁸Ma ke sha hɛ: «Zare ɗa mə, nahe Mahwətə kendeke ŋayɛ ka ghema ta ŋayɛ ka Mowab mbeyitere berete ta ŋayɛ.» Cape ka Israyɛl kwa sebe ta Ɛhəwd pa hɛ fɛake hweŋkwa ta hələa Zhəwrdɛŋe va ka Mowab kepelakɛ wəndə hɛ kajive te we.

²⁹Ma te vecia shɛ ne, nahe hɛ kempəmte ka Mowab gare 10.000 zhili, ka sewajɛ nyi deke deke ba'a nyi ghyana ghyana. Wəndə shɛ ketene le mpi we.

³⁰Se te vəa shɛ ne, mbeyitere berete ta ka Israyɛl ka Mowab, pa kwelɛŋe te hɛɗi kava deghesemsə.

³¹Kwa sebe ta Ɛhəwd se Shamgar, wəzege ta Anat. Pa ŋkɛ mpəmte ka Filisti gwəmsə ŋkwaŋe le geta nya nza lɛ ken'yi sla kezha dzeghwa ŋkɛ mɛ. Pa ŋkɛ mbelete ka Israyɛl perə.