Read KapsikiDC Ka Meha ghwə 4 Bible Online

Ka Meha ghwə 4 - KapsikiDC bible

Ka Meha ghwə 4

¹Kwa sebe ta mte ta Ɛhəwd, zhɛne ka Israyɛl kamene wəshi nyi ndiremi ndiremi kwa kema ta Mahwətə.

²Pa Mahwətə fəyi hɛ mbeyitere berete ta Yabin Megha ka Kanan nya mbe meleme Hasor. Meghea ka sewajɛa ŋkɛ ne, Sisra, mbe meleme Haroshɛt-Goyim ŋkɛ.

³Va Yabin ne, gwəmsə mesli wəmata gədəwə kwa lɛ lɛ, pa ŋkɛ sahwe nda yaka ke ka Israyɛl kava bakemsə. Pa hɛ tsate nda lewela ke Mahwətə.

⁴Ma te vəa shɛ ne, Dɛbora ya kande mɛ ŋkwa ta Shala, male ta Lapidot, kande meha ghwə ta ka Israyɛl.

⁵Ntishɛ nde kameha ghwə yitea peha kwelɛ yɛ Rama le Bɛtɛl, laka bela ta Ɛfrayim nyi dzeme hwa ghweme. Ma temə kwa sebe ta ŋkɛ ne, pa mbeli hekate nda slə ke wəfea shɛ kapeha ta Dɛbora. Tagha se ka Israyɛl kanewe Dɛbora kezha hi ghena ta nci.

⁶Ma te kwete hɛ ne, pa Dɛbora hekakɛ Barak, wəzege ta Abinowam, mbe Kɛdɛsh, te hɛɗia Nɛftali. Ma ke shɛ: «Wa nya ghena nya geze ŋa Shala Mahwətə ta ka Israyɛl nya: 'Kwiɗi tsehave zhili 10.000 mbe hwelefe ta Nɛftali le ŋa Zabəlon nda dzeme ghweme ta Tabor yɛ le hɛ.

⁷Nda lə 'ya sha gha laka hələa Kishon, Sisra, meghea ka sewajɛa Yabin ne, kase ŋkɛ le wəmata gədəwəa ŋkɛ le wəvəsəa ŋkɛ: Kave hɛ 'ya mbeyitere berete ta ŋa.»

⁸Ma ke Barak zhɛnete nda: «Ma kenza nde kalə na zlaɓe le 'ya ne, kalə 'ya, ma keɗema na kalə ne, kalə 'ya we.»

⁹Ma ke zhɛnete nda: «Kalə 'ya zlaɓe le gha tsagha. Ama kakemave zləvə na ya ci'a mbe mpa nya we. Ke male teve nda Sisra Mahwətə mbe dzeve.» Cape Dɛbora kadzeme Kɛdɛsh hɛ le Barak.

¹⁰Pa tsenete hwelefe ta Nɛftali le ŋa Zabəlon: 10.000 zhili, ntəŋə hɛ le, le Dɛbora perə.

¹¹Hɛbɛr nde Kɛn, nya takwa takwa yitea Kɛdɛsh. Pa neheve geva le kweci ka Kɛn nyi kwa yita ta Hobab, madza Moyize. Pa ŋkɛ slate cɛ lekwesa ta ŋkɛ yitea cɛana te hɛɗia ka Sa'ananim.

¹²Pa Sisra fate nahe Barak, wəzege ta Abinowam kedzeme ghweme ta Tabor.

¹³Pa tsenete wəmata gədəwəa ŋkɛ nyi kakwa lɛ lɛ gwəmsə mesli pɛtɛ zhilia ŋkɛ nyi kwa Haroshɛt-Goyim. Cape ŋkɛ dzeyi laka hələa Kishon.

¹⁴Ma ke Dɛbora sha Barak: «Mbi ɓə! Ɓəshi teve Sisra Mahwətə mbeyitere berete ta ŋa. E'e, Mahwətə le ghəa ŋkɛ nde dzeghwa te kema ta ŋa.» Cape Barak sawa pelɛ ghweme ta Tabor te ghəa zhilia ŋkɛ 10.000.

¹⁵Pa ŋkɛ have nda mpa, pa Mahwətə ŋkamte Sisra te kema ta ŋkɛ, tsagha pɛtɛa wəmata gədəwəa ŋkɛ ba'a pɛtɛa wəvəsəa mbelia ŋkɛ. Ɓereme Sisra sawa pelɛ wəmata gədəwə kahwɛ le seɗa.

¹⁶Tereŋe Barak yitea wəmata gədəwəa Sisra le yɛ mbelia ŋkɛ hwa'a kwa Haroshɛt-Goyim. Pɛtɛ wəvəsəa mbelia Sisra kempə, wəndə shɛ ketene le mpi we.

¹⁷Pəkwə Sisra le hwɛ pa mbe cɛ lekwesa ta Yayɛl, male ta Hɛbɛr nde Kɛn. Kwelɛŋe ya kwelɛ yɛ Yabin, meghea ka Hasor ba'a mbelia Hɛbɛr.

¹⁸Pa Yayɛl shave kabegeme le Sisra. Ma ke shɛ: «Səaki ŋa teke, meghe, ghazlənəma na ma!» Shilimə Sisra ki, pa Yayɛl ntikəakɛ mbe gwada.

¹⁹Ma ke shɛ: «Ma keɗe na, same ɗa yɛmə ɓɛhwɛ, shewə 'ya va ndere.» Pa Yayɛl ghwenemte jɛŋa viɗi ŋ'wa te pa ŋkɛ ndeke nda kasa. Pa zhɛnaghe gwada kənə.

²⁰Ma ke shɛ zhɛkwa: «Nza ŋa mɛa degha, ma kese mbeli ka'yɛwe va gha: ‹Nahe wəndə kesəaki teke na?›, ke hɛ ne, ‹Ewə›, pa.»

²¹Kwele kwele leɓenyɛ Sisra. Shelɛŋe ŋkɛ yitea hɛ kwa kele le gezle. Yayɛl, male ta Hɛbɛr, pa Yayɛl kelete lɛ nya baŋe cɛ lekwesa mbeli te, laŋe ŋkɛ sha ndevele, tiɗɛake tiɗɛake ŋkɛ hendeyite geva yitea Sisra. Baŋe shɛ mbe ghə ve, petekwe dzawa mbe ghə kare mbe hɛɗi. Mtiwə Sisra.

²²Pɛkwe Barak nya kekeka le ŋa ŋkɛ. Pa Yayɛl shave ki ghɛ kabegeme le, ma ke shɛ: «Nde shɛ 'ya ncɛte ŋa wəndə nya zele na.» Shilimə Barak mbe cɛ tagha Sisra ɓelayɛ, kemte mte te hɛɗi, lɛa cɛ lekwesa yagepe mbe ghəa ŋkɛ.

²³Te vecia shɛ veyi Yabin, meghea ka Kanan Shala mbeyitere berete ta ka Israyɛl.

²⁴Kwele kwele temə hɛ kampa le, le mpa nya dzawe, ya tsagha shɛ ŋkɛ ne, nahe hɛ kepeslekɛ ŋkɛ.