Read KapsikiDC Ka Meha ghwə 6 Bible Online

Ka Meha ghwə 6 - KapsikiDC bible

Ka Meha ghwə 6

¹Nahe ka Israyɛl kezhɛne kamenete wəshi nyi ndiremi ndiremi kwa kema ta Mahwətə. Pa Mahwətə kaveyi hɛ mbe dzeve ta ka Madiyan kava mberefaŋe.

²Ɗaŋe ɗaŋe berete ta ka Madiyan kənəa ka Israyɛl. Va ɗa ta nci ne, pa ka Israyɛl nzanji kwelɛ ghweme mbe zlera, te ŋkwa nya dzawe kadzete.

³Ya hweŋkwa hweŋkwa tsawe wəshi ka Israyɛl mbe wəvea nci ne, kase ka Madiyan le ka Amalɛk le mbeli nyi kese kwa ŋkwa nya same veci kaɗa hɛ.

⁴Pa hɛ menete ghedəkwə te hɛɗia nci kabeze wəshi nyi te wəvea nci kadzawa takwa yitea Gaza. Katene wəsə kezeme hɛ kezha ka Israyɛl we, kasərə timɛti hɛ we, kasərə yɛ sla hɛ we, kasərə kwara lɛmə hɛ we.

⁵Kase hɛ ne le wəshi keseɗa ta nci le yɛ cɛ lekwesa ta nci. Pəɗəmə se hɛ kala dzale. Kwele kwele hɛ le yɛ zlegweməa nci, kaɓelate hɛ wəndə we, kadzete hɛɗia shɛ kezha bezemte.

⁶Pa ka Madiyan vate yaka te ka Israyɛl, ntake hɛ katsa nda lewela ke Mahwətə.

⁷Ma kwa heka Mahwətə ka Israyɛl kezha mbele hɛ va ka Madiyan ne,

⁸pa Mahwətə ghwenakɛ nda nde mɛ ŋkwa ke hɛ. Ma ke wəndə nyagha sha hɛ: «Wa nya ghena nya gezete Mahwətə nya: ‹'Ya, Mahwətə, Shala ta ka Israyɛl, nahe 'ya kekelakave ŋayɛ mbe Ɛzhipte, te hɛɗi nya se yɛ kamava.

⁹Nahe 'ya kembelemte ŋayɛ va ka Ɛzhipte le mbeli nyi kesa ŋayɛ yaka. Pa 'ya ŋkamte ka ghema ta ŋayɛ te kema ta ŋayɛ pa 'ya ndeke ŋayɛ hɛɗia nci.

¹⁰Ma 'ya gezete ŋayɛ: 'ya ya kaShala Mahwətə ta ŋayɛ. Ma gheyɛ nyi kenza te hɛɗia ka Amor, mene nda ma slene yɛ ke yɛ shala ta nci ma. Ama kefate ɗa ŋa ɗa yɛ we.›»

¹¹Pa nde ghwene ta Mahwətə se kadzembe meleme ta Ofra. Pa ŋkɛ ntishɛnyɛ yitea hwemeke ta Yowash, kwa peləa Abiyɛzɛr. Ha yaleke Zhɛdɛyon, wəzege ta Yowash, kwa ŋkwa keŋkeɗe rɛzɛŋe kezha ɗema ka Madiyan kanakɛ ŋkɛ.

¹²Pa nde ghwene ta Mahwətə ncɛte nda geva ke Zhɛdɛyon, ma ke shɛ: «Le gha Mahwətə nde mpa nya ghyana!»

¹³Ma ke Zhɛdɛyon zhɛnete: «Tehwə tehwə ŋa 'ya nde sleke ɗa yawe! Ma nda le ghen'yɛ Mahwətə ne, tsema nza ghen'yɛ kambeli nyi zhɛ ŋkwa heli yitea hɛ wa? Nahe ka shihɛ n'yɛ kegezete n'yɛ slene meŋele nyi menete Mahwətə le hɛ kwa shave hɛ mbe Ɛzhipte. Kema slene ta ŋkɛa shɛ wa? Tsetsenya nahe Mahwətə kesərəakɛ n'yɛ kandeke nda n'yɛ ke ka Madiyan.»

¹⁴Pa Mahwətə zhɛrete geva laka Zhɛdɛyon ma ke shɛ: «Le berete nya va gha nya, kwiɗi mbelemte ka Israyɛl va ka Madiyan! E'e, 'ya nde ghwene ŋa.»

¹⁵Ma ke Zhɛdɛyon zhɛnete: «Nde sleke ɗa, təhwə təhwə, tsema nza 'ya kambelete ka Israyɛl wa? Yita ta n'yɛ ya kaka dewə ŋeli mbe hwelefe ta Manasɛ. 'Ya ne, 'ya ya ɓɛhwɛ ma kwa peləa n'yɛ.»

¹⁶Ma ke Mahwətə shɛ: «Le gha tenza 'ya, kala wəndə kwetɛŋe tempə ka Madiyan na.»

¹⁷Ma ke Zhɛdɛyon shɛ: «Ma nda le 'ya na kaganda ne, ndeke ɗa wəsə kencɛ wəsə kezha ɗepete 'ya gha nde geze ghena kaganda.

¹⁸Mba na kedzeghwa ŋa nda tese 'ya, wəsə kedzeghe Shala ya va 'ya kezha gha, 'ya kalə kakele ŋa.» Ma ke Mahwətə zhɛnete: «Teke nza 'ya nda se na.»

¹⁹Pa Zhɛdɛyon lə kazeleve zhɛfa. Pa ŋkɛ ntave hə kakiləwə mahekenemsə ba'a takɛ ɗafa kaɗema tenjɛne hwe, pa ŋkɛ veyi sli kwa kwaciga ba'a yɛməa rɛzɛŋe kwa ghwelepe. Pa ŋkɛ fəke hɛ pɛtɛ kadzeyitea hwemeke ba'a veyi hɛ kwa kema ta nde ghwene ta Shala.

²⁰Ma ke nde ghwene ta Shala shɛ: «Kelete sli ba'a ɗafa shɛ na beteyi hɛ te ŋkwa nya kwetɛŋe. Fəyi te tigə nya, shekaghe ŋkɛama kənə.» Pa Zhɛdɛyon yɛte fete yite.

²¹Pa nde ghwene ta Mahwətə kwaɗakɛ sli le yɛ ɗafa le geta nya yitea dzeve ve. Pa ghwə shave mbe gela kateremte yɛ sli le ɗafa. Bətə nde ghwene ta Shala zanyɛ.

²²Nahe Zhɛdɛyon keɗepe nda nde ghwene ta Mahwətə ŋkɛ. Ma ke: «Yaka ya te 'ya Shala Mahwətə! Nahe 'ya kenakɛ nde ghwene ta ŋa ntsə le ntsə.»

²³Ma ke Mahwətə shɛ: «Pa kwelɛŋe nza le gha! Ghazlənəma na ma, kamte na we.»

²⁴Te ŋkwa nyagha, pa Zhɛdɛyon ŋate reghwetɛ ke Mahwətə pa hekate nda slə “Mahwətə ya kakwelɛŋe”. Mba reghwetɛa shɛ pa ɓeshi kwa Ofra, mbe meleme ta ka yita ta Abiyɛzɛr.

²⁵Ma heviɗia shɛ ne, ma ke Mahwətə sha Zhɛdɛyon: «Kelete mca ta yiteyɛ ŋa, nya keya kande bake nya nza nya va ta ŋkɛ mberefaŋe. Ma kwa sebe ta ŋkɛ ne, pa na ŋzlamte reghwetɛa shala Ba'al, pa na tsaslemte seləa ŋkɛ nya tagha vare.

²⁶Ma kwa sebe ta ŋkɛ ne, ŋate reghwetɛ nya kehi hi pelɛ ghəa wəmbəa shɛ kezha Shala Mahwətə ta ŋa. Kelete mca ba'a dzeghekɛ melɛ kwa tere tere le. Kezha meha ghwə ne, fəte sheghwəa selə nya keveyi geva tekeleke nya tetsasle na.»

²⁷Pa Zhɛdɛyon tsehave mbeli meŋe hwa ka mene slene ta ŋkɛ kezha mene wəsə nya 'yɛwete Mahwətə ve. Ama pa ghazlənə keseve va mene heveci va ka menəhɛnyɛ le yɛ mbeli nyi mbe meleme. Pa ŋkɛ menete heviɗi.

²⁸Masheke masheke, kwa feɗeghe mbeli nyi mbe meleme ne, newe ke hɛ ne keŋzla ŋzla reghwetɛa Ba'al ba'a selə ketsasle tsasle. Ma mca nya keya kande bake ne, nahe mbeli kedzeghekɛ melɛ kwa tere tere le te reghwetɛ nya ŋate mbeli heviɗi.

²⁹Ma ke hɛ 'yɛwete kwelɛ ghəa nci: «Wa nde menete wəsə nya wa?» Ntake hɛ kazele, fa hɛ ne Zhɛdɛyon wəzege ta Yowash.

³⁰Ma ke mbeli nyi mbe meleme sha Yowash: «Keleke wəzege ta ŋa ghen'yɛ katepesle kwa ŋzlamte reghwetɛa Ba'al ŋkɛ, pa ŋkɛ tsaslemte seləa ŋkɛ nya mɓete mbeli vare.»

³¹Ma ke Yowash sha mbeli nyi terasle vare pɛtɛ: «Gheyɛ ka hi kaya Ba'al na? Ma wəndə nya keya ŋkwa yitea Ba'al ne, nda ŋkɛ kamte mpelɛa ke gheŋkɛ masheke hendɛ! Ma kenza nde shala Ba'al ne, yate ghəa ŋkɛ ŋkɛ le ghəa ŋkɛ, kwa nza ŋkɛ reghwetɛa ŋkɛ yaŋzlamte mbeli!»

³²Ma se mɛa vecia shɛ, Yerəwba'al heka Zhɛdɛyon mbeli, geze ta ŋkɛ, yate ghəa ŋkɛ Ba'al! Ma nda heka mbeli le slə nya ne, va nya gezete Yowash: «Yate ghəa ŋkɛ Ba'al le ghəa ŋkɛ, kwa nza nde reghwetɛa ŋkɛ yaŋzlamte mbeli!»

³³Pa ka Madiyan le ka Amalɛk le mbeli nyi kese laka ŋkwa kesame ta veci tsenete geva. Kashave te hələa Zhəwrdɛŋe kamenete ghedəkwəa nci pelɛ ŋwela ta Zhizrɛyɛl.

³⁴Pa Sefəa Mahwətə dzembenyɛ mbe Zhɛdɛyon, ntake kavɛ veke. Cape zhili nyi kwa yita ta Abiyɛzɛr katəkwə təkwə.

³⁵Pa Zhɛdɛyon ghwenakɛ mɛ dzeyi te hɛɗia Manasɛ pɛtɛ. Pa mbeli nyi mbe hwelefe ta nci təkwə təkwəte perə. Pa ghwenakɛ mɛ ke hwelefe ta Asɛr zhɛkwa, le ŋa Zabəlon le ŋa Nɛftali, pa zhilia nci se yitea hɛ.

³⁶Ma ke Zhɛdɛyon sha Shala: «Ma pa na ne, kaɗe na kambele ka Israyɛl laka 'ya.

³⁷'Ya kateve hweta ta təmə nya nza shinti te te lane nya leke ha mbeli. Ma kenza nde ncɛhwɛaɓɛ ŋkɛ va mɛnɛ nya heviɗi, mba ŋkwa nya te hɛɗi nya dzeyi yite keghwele ghwele ne, gheŋkɛ ya kawəsə kencɛ wəsə nya ɗe na kambele ka Israyɛl laka 'ya kala nya gezete na.»

³⁸Ma wəsə nya 'yɛwete Zhɛdɛyon ne, nahe ŋkɛ kese. Ma te masheke ta ŋkwa, pa Zhɛdɛyon peɗete hweta ta təmə, pa ŋkɛ hetəsəakave yɛmə gare viɗi kwa wəmbete.

³⁹Ma ke Zhɛdɛyon sha Shala: «Hwepema wənə na va 'ya ma. 'Ya kate'yɛwe kwete wəsə kwetɛŋe va gha. 'Ya kaɗe kwete wəsə kencɛ wəsə. Ma nya ɓeshi ne, hweta ta təmə nde nza keghwele ghwele nahe, pa mɛnɛ nya heviɗi nza ncɛhwɛaɓɛ ntəslə dzeyi yite!»

⁴⁰Ma heviɗia shɛ ne, pa Shala menete nda wəsə nya 'yɛwete Zhɛdɛyon. Deke hweta ta təmə ya keghwele ghwele, ncɛhwɛaɓɛ mɛnɛ nya heviɗi te hɛɗi dzeyi yite.